Daniele 1:1-21
1 Muna mvu watatu wa luyalu lwa Yoyakime+ wa Ntinu a Yuda, Nebukandesa wa Ntinu a Babele wizidi kuna Yerusaleme, ozungidi yo.+
2 Yave oyekwele Yoyakime wa Ntinu a Yuda ye salanganu yankaka ya nzo* a Nzambi aludi vana moko ma Nebukandesa wa Ntinu,+ onete yo kuna nsi ya Sina,*+ kuna nzo* a nzambi andi. Osidi salanganu yayi muna lundilu dia tusalu twa nzambi andi.+
3 I bosi, o ntinu okanikini Asipenaze wa mfumu a mbanda-mbanda zandi kimana katwasa Aneyisaele* akaka kumosi ye awana bena vo i mbongo a ntinu ye azitu.+
4 Bafwete kala matoko bakondwa fu muna nitu, bena ye mpw’ambote, akwa ngangu, zayi ye umbakuzi,+ ana bafwana sadila kuna lûmbu lwa ntinu. Kabalonga o tanga yo soneka e ndinga ya Akaladi.
5 Vana ntandu, ntinu osikidisi kunku kiau kia lumbu ke lumbu muna madia ma ntinu ye vinyu ina kanuanga. Balongwa* mu mvu tatu, kuna mfoko a kolo kiaki, basadila o ntinu.
6 Muna wantu awaya, akaka esi kanda dia* Yuda: Daniele,*+ Kananiya,* Misaele* yo Azareya.*+
7 O mfumu a mbanda-mbanda za lûmbu lwa ntinu ubavene nkumbu:* Daniele umvene e nkumbu a Beletesasa,+ Kananiya umvene e nkumbu a Saderake, Misaele umvene e nkumbu a Mesake, Azareya umvene e nkumbu a Abedenengo.+
8 Daniele obakidi nzengo muna ntim’andi vo kalendi kuyisafula ko muna madia ma ntinu ye muna vinyu kanuanga. Olombele nswa kwa mfumu a mbanda-mbanda kimana kalembi dia madia oma malenda kunsamfula.
9 Nzambi aludi ofididi mfumu a mbanda-mbanda kasonga ngemba kwa Daniele yo kumfwila e nkenda.+
10 O mfumu a mbanda-mbanda ovovese Daniele vo: “Wonga wa mfumu ame wa ntinu ngina wau, ona wasikidisa e kunku kia madia meno ye vinyu. Aweyi kevanga avo omwene vo nuamana tanda lutila matoko mankaka ma ntela eno? Se nuandatisa nkanu vana ntadisi a ntinu.”
11 Kansi, Daniele ovovese nyingidi ona wasolwa kwa mfumu a mbanda-mbanda kimana kalunga-lunganga Daniele, Kananiya, Misaele yo Azareya:
12 “Dodokolo, tonta ntaudi zaku muna lumbu kumi, yambula batuvana mbongo a mpatu twadia ye maza twanua;
13 i bosi, tezanesa e mpwa zeto ye mpwa za matoko ana bedianga madia ma ntinu, vanga kwa ntaudi zaku mun’owu wa dina omona.”
14 Ozevo, otondele e ngindu zau, ubatontele mu lumbu kumi.
15 Vava lumbu kumi yavioka, e mpw’au yasunda owete yo vimpi* ke mu matoko mawonso ko ana badianga madia ma ntinu.
16 I dianu vo, o nyingidi wakatulanga madia ye vinyu ina badi nua yo kubavana mbongo a mpatu.
17 O Nzambi aludi ovene kwa matoko mau yá, zayi ye umbakuzi wa sono ya mpila zawonso ye ngangu; Daniele wavewa umbakuzi wa mona-meso ya mpila zawonso ye ndozi.+
18 Vava yalunga e lumbu ina kasikidisa o ntinu muna kubatwasa vana kena,+ o mfumu a mbanda-mbanda ubatwese vana ndose a Nebukandesa.
19 O ntinu vava kamokena yau, vana bena yau awonso ke vasoloka mosi ko wakala nze Daniele, Kananiya, Misaele yo Azareya;+ bakwamanene sadila vana vena ntinu.
20 Vava ntinu kabayuvulanga muna konso diambu diavavanga ngangu ye umbakuzi, wamonanga vo nkumbu kumi bavioka nganga za mpandu ye nganga za ngombo+ ana bakala muna kintinu kiandi kiawonso muna ngangu ye umbakuzi.
21 Daniele wakwamanana kûna yamuna mvu wantete wa luyalu lwa Kurese wa Ntinu.+
Mvovo vana yand'a lukaya
^ Yovo “tempelo.”
^ I sia vo, Babele.
^ Yovo “tempelo.”
^ Mvovo wa sina: “wan’a Isaele.”
^ Nanga, “Badikilwa.”
^ Mvovo wa sina: “wan’a.”
^ Ina ye nsasa vo: “Yave Osadisi.”
^ Nanga ina ye nsasa vo: “Nani Ofwanane yo Nzambi?”
^ Ina ye nsasa vo: “Yave Osongele Dienga.”
^ Ina ye nsasa vo: “Nzambi i Mfundisi Ame.”
^ I sia vo, nkumbu za esi Babele.
^ Mvovo wa sina: “vonga.”
