Daniele 3:1-30
-
Teke kia wolo kia Nebukandesa wa Ntinu (1-7)
-
Ntinu okanikini vo teke kifwete sambilwa (4-6)
-
-
Ayibere atatu bafundilu vo ke basongele nlemvo ko (8-18)
-
“Oyeto ke tusadila nzambi zaku ko” (18)
-
-
Batubilu muna soka dia tiya (19-23)
-
Bavulwizu mu mpila yasivi muna tiya (24-27)
-
Ntinu osanisini Nzambi a Ayibere (28-30)
3 Nebukandesa wa ntinu ovangidi teke kia wolo kia yinkoso 60* muna lá ye yinkoso sambanu* muna sanzuka. Otelamese kio kuna ndimb’a Dura muna mvivu a Babele.
2 I bosi, Nebukandesa wa Ntinu otwikidi nsamu muna kutakesa akumbi a ntinu, akengi, nguvulu, aludiki, alundi a tusalu, afundisi, afundisi a nkangu ye ayadi awonso a mvivu muna lusunzulu lwa teke kiadongekwa kwa Nebukandesa wa Ntinu.
3 Ozevo, akumbi a ntinu, akengi, anguvulu, aludiki, alundi a tusalu, afundisi, afundisi a nkanu miandwelo ye atwadisi awonso a mvivu bakutakene muna lusunzulu lwa teke kiadongekwa kwa Nebukandesa wa Ntinu, batelamene vana vena teke kiadongekwa kwa Nebukandesa.
4 O mwangi a nsangu ovovele muna nding’angolo vo: “E yeno nkangu, zula ye ndinga nukanikinu vo,
5 vava nuwa e zú dia mpungi, matutu, lungungu, nsambi, kokolo, pesantele ye masikilu ma mpila zawonso, nuvumbama yo sambila e teke kia wolo kina Nebukandesa wa Ntinu kadongelekele.
6 Konso ona olembi vumbama yo sambila e teke, vana vau otubwa muna soka dia tiya twanyuyi.”+
7 I dianu vava bawidi e zú dia mpungi, lungungu, nsambi, kokolo, pesantele ye masikilu ma mpila zawonso, nkangu wawonso, zula ye ndinga bavumbamene yo sambila e teke kina kadongeleka Nebukandesa wa ntinu.
8 Muna ntangwa yayina akaka muna Akaladi bele kuna ntwala, bafundidi Ayuda.
9 Bavovese Nebukandesa wa ntinu vo: “E ntinu, zinga yakwele mvu.”
10 Ongeye e ntinu, ovenenge nkanikinu vo wantu awonso ana bewá e zú dia mpungi, matutu, lungungu, nsambi, kokolo, pesantele ye masikilu ma mpila zawonso, bavumbama yo sambila e teke kia wolo;
11 konso ona olembi vumbama yo sambila teke, kafwete tubwa muna soka dia tiya twanyuyi.+
12 Kansi vena ye Ayuda akaka ana watumbika se atwadisi a mvivu a Babele: Saderake, Mesake yo Abedenengo.+ E ntinu, wantu awaya ke bazitisi ko. Ke besadilanga nzambi zaku ko, ke bazolele sambila teke kia wolo ko kina wadongelekele.”
13 Ozevo, Nebukandesa kuna makasi mawonso okanikini vo batwasa Saderake, Mesake yo Abedenengo. Wantu awaya baneto vana ndose a ntinu.
14 Nebukandesa ubavovese vo: “E Saderake, Mesake yo Abedenengo, nga dialudi vo ke nusadilanga nzambi zame ko,+ ngatu sambila e teke kina yadongelekele?
15 Owau avo nuwidi e zú dia mpungi, matutu, lungungu, nsambi, kokolo, pesantele ye masikilu ma mpila zawonso, avo nutondele vumbama yo sambila e teke kina yavanga, diambote. Kansi, avo ke nusambidi kio ko nutubwa vana soka dia tiya twanyuyi. Nkia nzambi olenda kunuvuluza ova moko mame?”+
16 Saderake, Mesake yo Abedenengo bavutwidi kwa ntinu vo: “E Nebukandesa, ke dina mfunu ko twavana e mvutu muna diambu diadi.
17 Avo i wau, o Nzambi eto ona tusadilanga okutuvuluza muna soka dia tiya twanyuyi; okutuvuluza mpe vana koko kwaku, e ntinu.+
18 Kansi, avo ke kutuvuluza ko, e ntinu zaya wo vo, oyeto ke tusadila nzambi zaku ko ngatu sambila teke kia wolo kina odongelekele.”+
19 Nebukandesa ofungidi kikilu makasi, e mpw’a ndose andi isobele* kuna kwa Saderake, Mesake yo Abedenengo, otumini vo batoma yandula e soka dia tiya nkumbu nsambwadi vioka ngianduka ina diateka yandulwanga.
20 Otumini akaka muna makesa mandi bakanga Saderake, Mesake yo Abedenengo kimana babatuba muna soka dia tiya twanyuyi.
21 Dianu vo wantu awaya bakangilu ekolo bakinu ye mvuatu miau, yinkutu yau, mpu zau ye mvuatu miankaka, batubilu muna soka dia tiya twanyuyi.
22 Wau vo nkanikinu a ntinu wabala kikilu, e ziku mpe diasaka e ngianduka, o wantu ana banata Saderake, Mesake yo Abedenengo, yau bafwa muna nlaku a tiya.
23 Kansi, wantu awaya yau tatu, Saderake, Mesake yo Abedenengo babwidi bakangama muna soka dia tiya twanyuyi.
24 I bosi, Nebukandesa wa ntinu omwene kikilu wonga, vana vau otelamene ovovese mfumu a mbanda-mbanda vo: “Nga ke wantu atatu ko tukangidingi yo kubatuba muna soka dia tiya?” Bavutwidi kwa ntinu vo: “Ingeta, e ntinu.”
25 Ovovele vo: “Nutala! Wantu yá mbwene bakutululwa bekangalanga vana kati kwa tiya, ke bavidi ko, ona wa nyá una nze mwan’a zinzambi.”
26 Nebukandesa ofinamene vana mwelo a ziku dia tiya twanyuyi, ovovele vo: “E Saderake, Mesake yo Abedenengo, selo ya Nzambi a Mpungu-nene,+ luvaika, lwiza vava!” Saderake, Mesake yo Abedenengo bavaikidi vana kati kwa tiya.
27 Akumbi, akengi, anguvulu ye mbanda-mbanda za ntinu ana bakutakana+ bamwene vo e tiya ke tuvangidi diambu ko* muna nitu za wantu awaya;+ kana nkutu lusuki lumosi lwa ntu miau ke luvidi ko, e mvuatu miau ke mividi ko, e nitu zau nkutu ke zitele nsudi a mwisi ko.
28 I bosi, Nebukandesa ovovele vo: “Yambula Nzambi a Saderake, Mesake yo Abedenengo+ kakembelwa, ona otumini mbasi andi kavuluza selo yandi. Babundidi e vuvu muna yandi, ke balemvokele nkanikinu a ntinu ko, batambulwidi o fwa vana fulu kia sadila yovo sambila konso nzambi, avo ke Nzambi au kaka ko.+
29 Muna kuma kiaki, nkanikini vo konso nkangu, zula, ndinga iyiyikila Nzambi a Saderake, Mesake yo Abedenengo e mbi, yambula bazengononua, e nzo zau zakitulwa se kozo;* kadi kavena Nzambi ankaka ko olenda vuluza nze ndioyo.”+
30 Ntinu otundidikidi* Saderake, Mesake yo Abedenengo muna mvivu a Babele.+
Mvovo vana yand'a lukaya
^ Yovo “e kadilu kiandi kisobele emvimba.”
^ Yovo “e tiya ke tukedi ye ngolo ko.”
^ Nanga, “fuku dia titi; fuku dia nkal’a ngombe.”
^ Mvovo wa sina: “ovuamisi.”
