Estere 1:1-22
1 Muna lumbu ya Akasurose,* i sia vo, o Akasurose ona wayalanga mvivu 127,+ tuka kuna India yakuna Etiopia,*
2 muna lumbu ina Akasurose wa Ntinu wakala vana kunda kia kimfumu muna lûmbu lwa Susani,*+
3 muna mvu una wantatu wa luyalu lwandi, olambisidi akuluntu andi awonso ye ntaudi zandi e lambu. E mfumu za makesa ma Parasa,+ ma Madai,+ akwa zitu ye akuluntu a mvivu bakedi vana kena,
4 ubasongele kimvuama kia kintinu kiandi kia nkembo yo nene wandi yo zitu wa kimfumu kiandi muna lumbu yayingi, i sia vo, lumbu 180.
5 E lumbu yayina vava yalunga, o ntinu olambisi e lambu dia lumbu nsambwadi mu kuma kia nkangu wawonso wakala muna lûmbu lwa Susani,* ambuta ye aleke, vana yanzala kia mpatu a lûmbu lwa ntinu.
6 Vakala ye nlele mia lino, miavusu diambote ye mia se kia bule miayengelekwa muna nsinga miavangilwa muna nlele miambote. Vakala mpe ye nsinga mia mika mia se kia nduwa miavakikwa muna nlunga mia palata, malunzi ma matadi ma mâbele. Vana yanzala kiayalwa matadi ma pofire,* ma mâbele, perle ye ma mâbele ya ndombe vakala ye kunda ya wolo ye ya palata.
7 Banuinìni vinyu muna mbungwa za wolo; konso mbungwa yaswaswana ye yankaka, e vinyu ya ntinu yayingi, kadi ntinu kaka wafwana yo vana.
8 Ke muntu ko wakomekenua mu nua,* ediadi i diasikidiswa, kadi o ntinu ye mbanda-mbanda za lûmbu lwandi babaka nzengo vo konso muntu kavanga una kazolele.
9 O Vasiti+ wa Ntinu ankento olambisi mpe lambu mu kuma kia akento a nzo a kimfumu kia* Akasurose wa ntinu.
10 Muna lumbu kia nsambwadi, vava ntim’a ntinu wayangalala mu kuma kia vinyu, ovovese Mumani, Bizete, Karebona,+ Bingeta, Abangata, Zeta yo Kakasi, mbanda-mbanda nsambwadi ana basadilanga Akasurose wa Ntinu,
11 vo batwasa Vasiti wa Ntinu ankento vana vena ntinu ye kolow’a* kintinu vana ntu andi, kasonga o vienga kwandi kwa nkangu ye kw’akuluntu, kadi nkento wambote-mbote kakala.
12 Kansi, o Vasiti wa Ntinu ankento kazolele lemvokela mvovo mia mbanda-mbanda za ntinu ko. Dianu vo ntinu ofungidi kikilu makasi, e nsita zandi zifusukidi.
13 O ntinu ovovele kw’akwa ngangu ana bazeye lusansu, (kadi mambu ma ntinu i mpila yayi malwakilanga kw’awonso bazeye nsiku ye nzengo,
14 aludiki ana bakala lukufi i Karesena, Seta, Ademata, Tasisi, Merese, Maresena yo Memukane, awaya i akuluntu nsambwadi+ a Parasa ye Madai ana balwakanga vana vena ntinu, yau bakala vana fulu yantete ya kintinu).
15 O ntinu oyuvuidi vo: “Mun’owu wa nsiku, adieyi difwete vangwa kwa Vasiti wa Ntinu ankento wau vo kalemvokele nkanikinu a mbanda-mbanda za Akasurose wa Ntinu ko e?”
16 Memukane ovutwidi kwa ntinu ye akuluntu vo: “Vasiti wa Ntinu ankento kavangidi kaka mbi kwa ntinu ko,+ kansi kw’akuluntu awonso mpe ye nkangu mia mvivu miawonso mia Akasurose wa Ntinu.
17 Kadi akento awonso bewa dina Ntinu ankento kavangidi, yau mpe beveza akazi au, oku vo: ‘Akasurose wa Ntinu watumisa Vasiti wa Ntinu ankento keza vana kena, kansi kayiza ko.’
18 O unu kiaki akento a akuluntu a Parasa ye Madai ana bawidi diambu divangidi ntinu ankento, diau dimosi bevova kwa akuluntu awonso a ntinu yo twasa luvuezo ye makasi mayingi.
19 Avo diambote kuna kwa ntinu, yambula vasikidiswa nkanikinu a kintinu mu kuma kiandi, wasonekwa muna nsiku mia Parasa ye Madai, mina ke milendi sobwa ko vo:+ Vasiti kalendi kwiza diaka vana ndose a Akasurose wa Ntinu ko; o ntinu kavana fulu kiandi kia ntinu ankento kwa nkento ona unsundidi o wete.
20 E nkanikinu a ntinu vava uwakana muna kintinu kiandi kiawonso, akento awonso bezitisa akazi au, tuka ambuta ye aleke.”
21 E ngindu zazi ziyangidikidi ntinu ye akuluntu, o ntinu ovangidi dina kavovele Memukane.
22 Muna diadi, o ntinu otwikidi nkanda muna mvivu miandi miawonso,+ muna konso mvivu mun’owu wa nsonekeno au, kuna kwa konso nkangu muna nding’au, kinumana konso yakala kakala se mfumu muna nzo andi, kavovela muna nding’a nkangu andi.
Mvovo vana yand'a lukaya
^ Nanga i Xerxer 1, mwan’a Dareyuse, Wanene (Dareyuse Histaspes).
^ Yovo “Kuse.”
^ Yovo “Susa.”
^ Yovo “Susa.”
^ Tadi diangolo dia ndombe a fufukila dina ye matete mampembe.
^ Yovo “Ke muntu ko wasimwanga muna nua.”
^ Yovo “lûmbu lwa.”
^ Yovo “banda kia.”
