Estere 2:1-23
2 Vava mambu mama mavioka, e nganzi za Akasurose+ wa Ntinu vava zakuluka, wayindula dina kavanga Vasiti+ ye nzengo kazengelwa.+
2 Mbanda-mbanda za ntinu bavovele vo: “Yambula ntinu kavavilwa ndumba zambote-mbote za mienze.
3 O ntinu katumbika wantu e kinkengi kia mvivu miawonso mia kintinu kiandi,+ bakutakesa ndumba zawonso zambote-mbote zina vo mienze kuna lûmbu lwa Susani,* muna nzo y’akento. Bayekekwa vana moko ma Engai+ wa nzimb’a ntinu, wa nlundi akento, kimana baviengeswa e nitu.*
4 Ndumba ona otoma yangalelwa kwa ntinu, yandi okala se ntinu akento vana fulu kia Vasiti.”+ E ngindu zazi ziyangidikidi o ntinu, ovangidi dio.
5 Muna lûmbu lwa Susani*+ mwakala Nyuda mosi, nkumbu andi Modekai+ wa mwan’a Yaire wa mwan’a Simei wa mwan’a Kisi wa Mbenyamini,+
6 ona wanatwa muna kinkole tuka kuna Yerusaleme ye awana banatwa yo Yekoneya*+ wa Ntinu a Yuda, ona Nebukandesa wa Ntinu a Babele kanata muna kinkole.
7 Yandi wasansa Kadasa,* i sia vo, Estere wa mwan’ankento wa mpangi a se diandi,+ kadi kakala ye se ko ngatu ngudi. Ndumba ambote-mbote kakala muna nitu ye muna mpwa, se diandi ye ngudi andi vava bafwa, Modekai wambaka yo kunkitula se mwan’andi.
8 Vava kiazayiswa e nzengo za ntinu ye nsiku andi ye vava ndumba zayingi zanatwa kuna lûmbu lwa Susani,* basiwa muna wisa kia Engai,+ Estere mpe wanatwa muna nzo a* ntinu muna wisa kia Engai wa nyingidi a akento.
9 O ndumba wayangidika Engai yo kunsonga e ngemba,* vana vau wamvana lekwa yaviengesela e nitu+ ye kunku kiandi kia madia ye ndumba nsambwadi zina zafwana vewa kwa yandi tuka muna nzo a ntinu. Wafila Estere ye ndumba zandi kuna fulu kisundidi wete kia nzo y’akento.
10 Estere kavova diambu ko mu kuma kia nkangu andi+ ye yitu yandi, kadi Modekai+ wankanikina vo kavovi wo kwa muntu ko.+
11 Lumbu yawonso Modekai wayendanga kuna ntwal’a yanzala kia nzo y’akento muna zaya o vimpi wa Estere ye mana mambwilanga.
12 Vitila kialwaka e lumbu kiandi kia kuyisunzula kwa Akasurose wa Ntinu, konso ndumba waviengeswanga e nitu mu ngonde 12 wauna wasikidiswa muna nsiku mu kuma kia akento. Baviengeselwanga e nitu mu mpila eyi: ngonde sambanu za kuswa mazi ma mô,+ ngonde sambanu za kuswa mazi ma balasamu+ ye lekwa yankaka ya nsunga yaviengesela nitu.
13 I bosi, ndumba wakisunzulanga kwa ntinu, konso kina kalombanga mu nata vava kavaikanga muna nzo y’akento mu kwenda kuna nzo a ntinu, kiavewanga kwa yandi.
14 O ndumba wakotanga muna nzo a ntinu muna nkokela, oku mene-mene wavutukanga muna nzo ina yanzole y’akento, muna wisa kia Sasengaze wa nzimb’a ntinu,+ wa nyingidi a makangu. O ndumba kakotanga diaka kuna kwa ntinu ko nanga vo ntinu unyangalele yo lomba vo kabokelwa muna nkumbu.+
15 E lumbu kiandi kia kuyisunzula kuna kwa ntinu vava kialwaka, Estere wa mwan’a Abikaile wa mpangi a se dia Modekai ona wantambula se mwan’andi ankento,+ kalomba lekwa ko nanga ina yayikwa kaka kwa Engai wa nzimb’a ntinu, wa nyingidi a akento. (Muna kolo kiaki kiawonso, Estere wayangalelwanga kw’awonso bamonanga.)
16 Estere wanatwa kwa Akasurose wa Ntinu muna nzo andi a kintinu muna ngonde ina yakumi, i sia vo, ngonde a Tebete,* muna mvu una wa nsambwadi+ wa luyalu lwandi.
17 O ntinu olutidi zola Estere ke mu akento awonso ko, Estere osundidi yangalelwa kwa ntinu yo songwa ngemba* ke mu ndumba zawonso za mienze ko. Dianu vo, unsidi kolw’a* ntinu vana ntu andi, unkitwidi se ntinu ankento+ vana fulu kia Vasiti.+
18 O ntinu olambisi e lambu dianene, e lambu dia Estere, mu kuma kia akuluntu andi awonso ye ntaudi zandi. Obokele nkoki a luloloko lwa nkangu mia mvivu, ovene tukau mun’owu wa mavua ma ntinu.
19 E mienze*+ vava batwaswa mu nkumbu wanzole, Modekai ovuende vana vitu dia ntinu.
20 Estere kavova diambu ko mu kuma kia nkangu andi ye yitu yandi,+ nze una Modekai kankanikina; Estere wakwamanana lemvokela Modekai nze una kanlemvokelanga vava kansansanga.+
21 Muna lumbu yayina, ekolo Modekai kavuandanga vana vitu dia ntinu, Bingetana yo Terese mbanda-mbanda zole za ntinu, ayingidi a mavitu bafungidi makasi, bavavidi vonda* Akasurose wa Ntinu.
22 Kansi, e diambu diadi diazayakana kwa Modekai, vana vau wazayisa dio kwa Estere wa Ntinu ankento. Estere ovovele dio kwa ntinu muna nkumbu a Modekai.*
23 Vava e diambu diafimpululwa, diamoneka vo dialudi, yau awole bazembelekwa muna nti; mawonso mama masonekwa muna nkand’a tusansu vana vena ntinu.+
Mvovo vana yand'a lukaya
^ Yovo “Susa.”
^ Yovo “balengolwa e nitu.”
^ Yovo “Susa.”
^ Muna 2 Ntinu 24:8, oyikilwanga vo Yoyakine.
^ Ina ye nsasa vo: “Mirte.”
^ Yovo “Susa.”
^ Yovo “lûmbu lwa.”
^ Yovo “walakazi.”
^ Yovo “banda kia”
^ Yovo “walakazi.”
^ Yovo “ndumba.”
^ Mvovo wa sina: “sia o moko kwa.”
^ Yovo “muna wete dia Modekai.”
