Estere 4:1-17
4 Modekai+ vava kazaya mawonso mavangamene,+ Otiazuna mvuatu miandi yo vuata ngoto ye kuyikusa ntoto ampolo, wele muna mbanza yo kaza kazu kiangolo ye ntantu.
2 Wayenda telama kaka vana vitu dia ntinu, kadi muntu wavuata ngoto kalendi kotela muna vitu dia ntinu ko.
3 Muna mvivu miawonso+ mwalwaka nkanikinu ye nsiku a ntinu, vakedi kifwidi vana vena Ayuda, mfionkonona,*+ dilu ye lukendalalu. Ayingi balavalele vana ngoto ye vana ntoto ampolo.+
4 E ndumba za Estere ye nzimba zandi vava bayiza wo kunzayisa, ntinu ankento wakendalala kikilu. Otwikidi mvuatu kwa Modekai kavuata yo katula e ngoto, kansi katambulwila mio ko.
5 Muna diadi, Estere obokele Kataki, mosi muna nzimba za ntinu, ona kavana mbebe ya kunsadila, untumini kenda kwa Modekai mu zaya kana nkia diambu dibwidi.
6 Kataki wayenda kwa Modekai vana ntanda* wa mbanza una mantalani ye vitu dia ntinu.
7 Modekai unzayisi mawonso mambwididi ye ntalu yasikididi ya nzimbu+ zina Amani kavanina nsilu vo osia zo muna lundilu dia ntinu muna fwasa Ayuda.+
8 Wamvana mpe nkand’a nsiku una wasiwa muna Susani*+ wa kubafwasakesa. Umvovese vo kasonga wo kwa Estere yo kunsasila wo, wanzayisa+ kenda kwa ntinu, kimana kandodokela, kavova muna wete dia nkangu andi.
9 Kataki wavutuka yo samuna kwa Estere mana Modekai kavovele.
10 Estere otumini Kataki kenda vova kwa Modekai vo:+
11 “E ntaudi zawonso za ntinu ye nkangu mia mvivu miandi bazeye wo vo, konso yakala yovo nkento olembi bokelwa yo kwenda kwa ntinu muna yanzala kiakati,+ vena ye nsiku mosi kaka muna yandi: Vondwa kevondwa; ozinga kaka kele vo ntinu untambikidi e mvuala ya wolo.+ Kansi, se lumbu 30 kibokelwanga ko kwa ntinu.”
12 Modekai vava kawá mvovo mia Estere,
13 ovutwidi Estere vo: “Kuyindula ko vo ongeye wau una muna nzo a ntinu ovuluka lutila Ayuda awonso.
14 Kadi avo odingalele kwaku, ozevo luvevoko yo luvuluzu lwa Ayuda muna fulu kiankaka lutuka,+ kansi ngeye ye nzo a se diaku vila nuvila. Nani ozeye kana vo ke mu kuma kiaki ko walwakila vana kunda kia kintinu akento?”+
15 Estere ovutwidi kwa Modekai vo:
16 “Nda kutakesa Ayuda awonso bena mu Susani,* nufionkonona*+ mu kuma kiame. Ke nudie ko ngatu nua mu lumbu tatu,+ fuku yo mwini. Mono ye ndumba zame mpe tufionkonona.* I bosi ikwenda kota kuna kwa ntinu, kana una vo disimwanga muna nsiku, avo fwa ifwa, yambula yafwa.”
17 Ozevo, Modekai wele, ovangidi mawonso Estere kankanikìna.
Mvovo vana yand'a lukaya
^ Yovo “mina nsoki.”
^ Yanzala kiakutakenanga nkangu mu teka, sumba lekwa yo tela mambu.
^ Yovo “Susa.”
^ Yovo “Susa.”
^ Yovo “numina nsoki.”
^ Yovo “tumina nsoki.”
