Estere 5:1-14
5 Muna lumbu kiatatu,+ Estere ovuete mvuatu andi a kintinu, otelamene vana yanzala kiakati kia nzo a ntinu kiatalana ye lûmbu lwa ntinu ekolo ntinu kavuanda vana kunda kia kimfumu muna nzo a kintinu mantalani ye mwelo a nzo.
2 Vava ntinu kamwene vo Estere wa Ntinu ankento otelamene vana yanzala, unsongele dienga, o ntinu otambikidi mvuala ya wolo kwa Estere+ ina yakala vana koko kwandi. Estere ofinamene, osimbidi nsuk’a mvuala.
3 O ntinu unyuvuidi vo: “Estere wa Ntinu ankento, nkia diambu una diau? Nki ozolele lomba? Kana nkutu ndambu a kintinu kiame ikuvana kio!”
4 Estere ovutwidi vo: “Avo diyangidikidi ntinu, yambula ntinu yo Amani+ beza o unu ku lambu dina inkubikìdi.”
5 Ntinu ovovese ntaudi zandi, oku vo: “Nuzayisa Amani keza nswalu, wauna uvovele Estere.” Ozevo, ntinu yo Amani bele kuna lambu dina diakubika Estere.
6 Ekolo banuanga e vinyu, ntinu oyuvuidi Estere vo: “Ayeyi i ndomb’aku? Ivewa kwa ngeye! Adieyi ozolele? Kana nkutu ndambu a kintinu kiame ikuvana kio!”+
7 Estere ovutwidi vo: “E ndomb’ame eyi,
8 avo mbweneno e dienga vana meso ma ntinu, avo oyangalele kumpana ndomb’ame yo vanga dina nzolele, yambula ntinu yo Amani beza kuna lambu dina ikubakubikila mbazi muna mene; mbazi ivana e mvutu kwa ntinu.”
9 E lumbu kiakina Amani wavaika muna kiese ye luyangalalu lwa ntima. Kansi Amani vava kamwene vo Modekai vana vitu dia ntinu katelama ko ngatu kunzakamena, ofungidi kikilu Modekai makasi.+
10 Kansi, Amani wakanga o ntima yo kwenda kuna nzo andi. Wabokelesa akundi andi yo nkaz’andi Zerese.+
11 Amani wakisana muna nkembo a kimvuama kiandi ye ulolo wa wan’andi+ ye mpila ntinu kantundidikila ye kunzangula lutila akuluntu ye ntaudi za ntinu.+
12 Amani ovovele diaka vo: “Vana ntandu a mama mawonso, Estere wa Ntinu ankento mono kaka kabokele ngienda yo ntinu muna lambu kakubikìdi.+ Umbokele diaka yakala yandi o mbazi kumosi yo ntinu.+
13 Kansi mawonso mama ke mekungiangidikanga ko ekolo yakinu mona Modekai wa Nyuda wavuanda vana vitu dia ntinu.”
14 Ozevo, Zerese nkaz’andi ye akundi andi awonso bamvovese vo: “Tuma wantu bakubika nti wa yinkonso 50* muna lá. Mbazi muna mene vovesa ntinu vo Modekai kazembekwa vana nti.+ I bosi okwenda dia yo yangalala yo ntinu kuna lambu.” E ngindu zazi ziyangidikidi Amani, ovangisi nti.
