Estere 7:1-10
7 O ntinu yo Amani+ bele kuna lambu kakubika Estere wa Ntinu ankento.
2 Muna lumbu kiazole kia lambu vava banuanga vinyu, ntinu oyuvuidi diaka Estere vo: “Nki ozolele lomba Estere wa Ntinu ankento? Ikuvana kio. Adieyi ozolele lomba? Kana nkutu ndambu a kintinu kiame ikuvana kio!”+
3 Estere wa Ntinu ankento ovutwidi vo: “E ntinu, avo mbweno dienga vana meso maku, avo diyangidikidi ntinu, ndombele vo wavuluza moyo ame ye wa nkangu ame.+
4 Kadi mono yo nkangu ame twatekwa,+ kimana twafwaswa, twavondwa yo fukiswa. Kele vo twatekwa mu kala ntaudi zamakala ye ntaudi zamakento, nga yadi kal’e pi-i. Kansi e diambu diadi ke diansongi ko, kadi mfwilu mpe ditwasa kwa ntinu.”+
5 Akasurose wa ntinu ovovese Estere wa Ntinu ankento vo: “Nani ndioyo, akweyi kena ndiona una yo unkabu wa vanga e diambu diadi?”
6 Estere ovutwidi vo: “O muntu ndioyo wa ntantu ye mbeni i Amani wa kimpumbulu.”
Amani omwene wonga mu kuma kia ntinu yo ntinu ankento.
7 Ntinu otelamene yo makasi vana lambu, wele kuna mpatu a lûmbu, kansi Amani otelamene kadodokela Estere wa Ntinu ankento mu kuma kia moyo andi, kadi obakwidi wo vo ntinu ozolele kuntumba.
8 Ntinu okatukidi kuna mpatu a lûmbu, ovutukidi muna nzo a lambu, omwene Amani uyitubidi vana kunda kiakala Estere. Ntinu ovovele vo: “Tala, ozolele mpe leka ntinu ankento mu kingolo mu nzo ame?” Vava ntinu kamene vova, bafukidi mpolo a Amani.
9 Karebona+ mosi muna mbanda-mbanda za lûmbu lwa ntinu, ovovele vo: “Amani okubikidi mpe nti kimana kazembeka Modekai+ ona wazayisa e nsangu zina zavuluza o ntinu.+ O nti una kuna nzo a Amani, wa yinkoso 50* muna lá.” Muna kuma kiaki, ntinu ovovele vo: “Nunzembeka mo.”
10 Dianu vo, bazembekele Amani muna nti kakubikila Modekai, i bosi makasi ma ntinu makulukidi.