Estere 8:1-17
8 Muna lumbu kiakina, Akasurose wa Ntinu wavana nzo ya Amani+ wa mbeni a Ayuda+ kwa Estere wa Ntinu ankento; Modekai wakisunzula kwa ntinu, kadi Estere wanzayisa vo yitu kiandi.+
2 I bosi, ntinu wakatula mpeto+ andi ina kabonga kwa Amani yo vana yo kwa Modekai. Estere wavana kiyekwa kia nzo ya Amani kwa Modekai.+
3 Estere wayenda mokena diaka yo ntinu. Obwidi vana malu mandi, odididi yo kundodokela vo kavengomona e mbi ya Amani wa Ngangi ye kani diandi diafukisa Ayuda.+
4 Ntinu otambikidi mvual’andi ya wolo kwa Estere,+ ozevo Estere ovumbukidi yo telama vana vena ntinu.
5 Ovovele vo: “Avo diyangidikidi ntinu, avo mbweneno dienga vana meso maku, avo diambote kwa ntinu, avo ntinu ungiangalele, yambula vasonekwa nsiku uvilula nkanda mia Amani+ wa mwan’a Kamedata wa Ngangi,+ mina kasoneka ye kani diambi dia fukisa Ayuda mu mvivu miawonso mia ntinu.
6 Kadi aweyi ndenda tadila mpasi zibwila nkangu ame? Aweyi ndenda zizidila lufwasu lulwakila yitu yame?”
7 Akasurose wa Ntinu ovovese Estere wa Ntinu ankento yo Modekai wa Nyuda vo: “Tala, mpene nzo ya Amani kwa Estere,+ inzembekele mpe vana nti+ mu kuma kia kani diandi dia fukisa* Ayuda.
8 Owau, nusoneka nkanda muna nkumbu a ntinu muna wete dia Ayuda yo sia wo dimbu kia mpeto a ntinu, kadi nsiku usonekeno muna nkumbu a ntinu yo siwa e dimbu muna mpeto a ntinu, ke ulendi vunzunua ko.”+
9 Ozevo, asoneki a ntinu babokeleswa muna ntangwa yayina, muna lumbu kia 23 kia ngonde ya ntatu, i sia vo, ngonde a Sivani,* basoneka mawonso Modekai kakanikina kwa Ayuda, kwa nkumbi za ntinu,+ nguvulu ye akuluntu a mvivu+ tuka India yakuna Etiopia, mvivu 127 muna konso mvivu mun’owu wa mpil’au yasonekena, kuna kwa konso nkangu muna nding’au ye kuna kwa Ayuda mun’owu wa mpil’au yasonekena ye nding’au.
10 Modekai wasoneka nkanda muna nkumbu a Akasurose wa Ntinu yo sia mio dimbu kia mpeto a ntinu+ yo vana mio kwa anati a nsangu ana bayendelanga mu mvalu muna salu kia ntinu.
11 Muna nkanda miami, ntinu wavana nswa kwa Ayuda muna mbanza zawonso kimana bakutakana muna tanina mioyo miau, bafwasa yo vonda yo fukisa konso nkangu yovo mvivu ukubanuanisa, kiakala akento ye yingiana-ngiana yo kutumuna mavua mau.+
12 Diavangama muna lumbu kimosi muna mvivu miawonso mia Akasurose wa Ntinu, kina kia 13 kia ngonde ya 12, i sia vo, muna ngonde ya Adare.*+
13 E mvovo mia nkanda wau miakala se nsiku muna mvivu miawonso. Miasamunua kwa nkangu miawonso, kimana Ayuda bakubama muna lumbu kiakina balanda kunda kwa mbeni zau.+
14 Anati a nsangu bayenda muna lutumu lwa ntinu, bayenda mu nswalu muna mvalu mia salu kia ntinu. O nsiku wau mpe wazayiswa muna lûmbu lwa Susani.*+
15 Modekai wavaika vana vena ntinu ye mvuatu miandi mia kintinu mia se kia bule ye mpembe ye kolowa anene ya wolo ye nzaka wavangilwa muna mika mia se kia nduwa.+ E mbanz’a Susani* ikazidi ye kiese.
16 Kuna kwa Ayuda kukedi luvevoko* ye kiese, luyangalalu yo zitu.
17 Muna mvivu miawonso ye mbanza zawonso zalwaka nsiku ye nzengo za ntinu, Ayuda bakala ye kiese yo yangalala, badia e lambu yo kembela. Ndonga vana vena nkangu mia nsi bayikitula se Ayuda,+ kadi bamona wonga wa Ayuda.
Mvovo vana yand'a lukaya
^ Mvovo wa sina: “wau kalambwidi koko kwandi muna.”
^ Yovo “Susa.”
^ Yovo “Susa.”
^ Mvovo wa sina: “ntemo.”
