Ezera 3:1-13
3 Vava e ngonde yansambwadi yafwana,+ Aneyisaele* bakala muna mbanza zau, bakutakene ye kani dimosi muna Yerusaleme.
2 Yesua+ wa mwan’a Yosadake ye akwandi anganga yo Zerubabele+ wa mwan’a Saletiele+ ye mpangi zandi batelamene, batungidi e ziku dia Nzambi a Isaele kimana bakelela vo yimenga yangioka nze una wasonama muna Nsiku a Mose+ wa muntu a Nzambi aludi.
3 Kanele vo bakala ye wonga wa nkangu mia nsi zabazunga,+ batungidi e ziku vana fulu kina diateka kala, bayantikidi vo kelela yimenga yangioka kwa Yave, yimenga ya mene-mene ye ya masika.+
4 Bavangidi Nkinzi a Sudi* nze una wasonama,+ lumbu ke lumbu bakelelenge yimenga yangioka muna lutangu lwasikidiswa muna konso lumbu.+
5 I bosi, batambikidi tukau twangioka tuna twatambikwanga ntangwa zawonso,+ tukau twa nzangama za ngonde,+ tukau twa nsungi zawonso za nkinzi miavauka+ mia Yave ye tukau twawonso batwasanga akwa ntim’a mvevo kwa Yave.+
6 Tuka muna lumbu kiantete kia ngonde yansambwadi,+ bayantikidi kela yimenga yangioka kwa Yave, kana una vo e nkubilw’a tempelo a Yave ke yakubwa ntete ko.
7 Bavene nzimbu kwa awudi a matadi+ ye akwa umbangu,+ bavene madia, ndua ye mazi kwa esi Sidone y’esi Turo kimana batwasa mabaya ma nsedele tuka kuna Lebanone yakuna Yafo,+ mun’owu wa nswa batambula kwa Kurese wa Ntinu a Parasa.+
8 Muna mvu una wazole wa ndwak’au muna nzo a Nzambi aludi kuna Yerusaleme, muna ngonde ina yazole, Zerubabele wa mwan’a Saletiele, Yesua wa mwan’a Yosadake ye ankaka muna mpangi zau, anganga ye Anelevi ye awonso balwaka muna Yerusaleme ana batuka kuna kinkole+ bayantika e salu; batumbikidi kinkengi kia salu kia nzo a Yave kwa Anelevi tuka ana bakala ye mvu 20 yovo vioka.
9 Ozevo, Yesua yo wan’andi ye mpangi zandi, Kademiele yo wan’andi, wan’a Yuda, bakedi entwadi muna twadisa e salu kia nzo a Nzambi aludi kumosi yo wan’a Kenadade,+ wan’au ye mpangi zau, Anelevi.
10 Atungi vava bakuba e nkubilw’a tempelo a Yave,+ anganga ye mvuatu miau mia kinganga, mpungi zau,+ Anelevi, wan’a Asafi ye yimbalu yau, batelama bakembelele Yave mun’owu wa luludiku lwa Davidi wa Ntinu a Isaele.+
11 Bayantika yimbila yo tambuziana e ndinga,+ bakembelele Yave yo kumvutula matondo, “kadi oyandi wambote; o walakazi* wandi kwa Isaele wakwele mvu.”+ I bosi, nkangu awonso bakembelele Yave muna nding’angolo kadi nkubilw’a nzo a Yave ikubilu.
12 Nganga zayingi, Anelevi, ntu mia nzo za mase, ambuta ana bamona e nzo ina yankulu, vava bamwene nkubilw’a nzo yayi,+ bakazidi ye dilu, kansi ayingi bakazidi ye kiese kiawonso.+
13 Muna diadi, wantu ka balenda swaswanesa ko e zú dia kiese ye dilu, kadi nkangu wakazanga muna nding’angolo, e zú diau diawakana kwandá.
Mvovo vana yand'a lukaya
^ Mvovo wa sina: “wan’a Isaele.”
^ Yovo “Saba ya Zingila mu Kolo Kiakete.”
^ Mvovo wa Kiyibere una ye nsasa vo: “zola ye walakazi ulembi suka.” Tala Nsas’a Mvovo. “Zola kulembi suka.”
