Ezera 8:1-36
8 Awaya i ntu mia nzo za mase mau ye tuvila twa awana batuka yame kuna Babele, mu kolo kia luyalu lwa Antakesate wa Ntinu:+
2 muna wan’a Finekase,+ Ngeresome; muna wan’a Itama,+ Daniele; muna wan’a Davidi, Katusi;
3 muna wan’a Sekaneya, muna wan’a Parose, Zakariya kumosi ye 150 ma wan’amakala basonekwa;
4 muna wan’a Pakati-moabe,+ Eleyoenai wa mwan’a Zerakeya kumosi ye 200 za wan’amakala;
5 muna wan’a Zatu,+ Sekaneya wa mwan’a Yakaziele kumosi ye 300 za wan’amakala;
6 muna wan’a Adini,+ Ebede wa mwan’a Yonatane kumosi ye 50 ma wan’amakala;
7 muna wan’a Elame,+ Yesaya wa mwan’a Ataleya, 70 lwa wan’amakala;
8 muna wan’a Sefateya,+ Zebadeya wa mwan’a Mikaele, kumosi yo 80 lwa wan’amakala;
9 muna wan’a Yoabe, Obadiya wa mwan’a Yekiele kumosi ye 218 dia wan’amakala;
10 muna wan’a Bani, Selomite wa mwan’a Yosifeya kumosi ye 160 ma wan’amakala;
11 muna wan’a Bebai,+ Zakariya wa mwan’a Bebai kumosi ye 28 dia wan’amakala;
12 muna wan’a Azengade,+ Yokanane wa mwan’a Akatani kumosi ye 110 dia wan’amakala;
13 muna wan’a Adonikami,+ awaya i basukinina ovutuka, ezazi i nkumbu zau: Elefelete, Yiele yo Semaya kumosi ye 60 ma wan’amakala;
14 muna wan’a Bingevai,+ Utai yo Zabudi kumosi yo 70 lwa wan’amakala.
15 Yabakutakesa kuna nkoko una ukwendanga kuna Ava,+ lumbu tatu twavanga ko. Kansi, vava ntomene tala nkangu ye nganga, kisolwele vo kana Nlevi mosi ko.
16 Muna kuma kiaki, mbokelese Elieze, Ariele, Semaya, Elenatane, Yaribi, Elenatane, Natani, Zakariya yo Mesulame, ana bakala se ntu yo Yoyarebe yo Elenatane, yau i alongi.
17 Ibatumini kwa Ido wa mfumu a fulu kiyikilwanga vo Kasifa. Ibavovese vo bavova kwa Ido ye mpangi zandi selo ya tempelo,* kuna Kasifa, batutwasila selo ya nzo a Nzambi eto.
18 Wau vo o koko kwambote kwa Nzambi eto kwakala yeto batutwasìdi muntu ona wakala vo nlungaladi muna wan’a Makele+ wa ntekelo a Levi, wa mwan’a Isaele, i sia vo, Serebeya+ yo wan’andi ye mpangi zandi, 18 dia wan’amakala;
19 yo Kasabiya yo Yesaya muna wan’a Merare+ ye mpangi zandi yo wan’au, 20 ma wan’amakala.
20 Vakala 220 ma selo ya tempelo,* ana Davidi ye akuluntu bavana muna sadisa Anelevi muna salu kiau, yau awonso bayikilwa muna nkumbu zau.
21 Yaboka e nkoki a mfionkonona* vana nzadi a Ava, twayikulula vana vena Nzambi eto, twavava luludiku mu kuma kia nkangalu tuvanga ye wan’eto ye mavua meto.
22 Nsoni yamona za lomba makesa ye akwa mvalu kwa ntinu batutanina mu kuma kia mbeni muna nzila, kadi twateka vova kwa ntinu vo: “O koko kwambote kwa Nzambi eto, kwina yawonso bekuntombanga,+ kansì tu o nkum’andi ye makasi mandi mena muna awonso bekunyambulanga.”+
23 Tufionkonuene* yo lomba kwa Nzambi eto muna diambu diadi, oyandi owidi ndodokela zeto.+
24 Nsolele 12 dia mbuta za nganga, Serebeya yo Kasabiya+ kumosi ye kumi dia mpangi zau.
25 Ibatezele palata ye wolo ye salanganu, o lukau lwa nzo a Nzambi eto luna katambika o ntinu ye mbanda-mbanda zandi ye akuluntu andi yo Aneyisaele awonso bawanuka vo.+
26 Ntezele vana koko kwau 650 ma talanta* za palata, 100 salanganu ya palata yafwanga talanta zole, 100 talanta za wolo,
27 ye 20 ma pidi ya wolo yafwanga 1.000 dia dareki* ye salanganu 2 ya nsongo yakenzua, yambwaki ikezimanga ya ntalu nga wolo.
28 Ibavovese vo: “Oyeno nuavaulwa mu kuma kia Yave,+ e salanganu mpe yavaulwa, e palata ye wolo i lukau lwamvevo kuna kwa Yave wa Nzambi a mase meno.
29 Nutoma yo lunga-lunga yavana nuteza yo vana vena e mbuta za nganga ye Anelevi ye akuluntu a nzo za mase ma Isaele kuna Yerusaleme,+ muna masuku* ma nzo a Yave.”
30 Anganga ye Anelevi batambwidi palata ye wolo ye salanganu ina yatezwa kimana banata yo kuna Yerusaleme muna nzo a Nzambi eto.
31 Kina kia 12 kia ngonde antete,+ twakatuka kuna nzadi a Ava+ yo kwenda kuna Yerusaleme, o koko kwa Nzambi eto kwakala yeto, watuvuluza vana moko ma mbeni ye awana batukondanga muna nzila.
32 Twalwaka muna Yerusaleme,+ twanangina mo lumbu tatu.
33 E lumbu kiayá twateza palata ye wolo ye salanganu muna nzo a Nzambi eto,+ twayekeka yo vana koko kwa Meremote,+ wa mwan’a Uriya wa nganga, wakala kumosi yo Elaza wa mwan’a Finekase, bakala kumosi yo Yozabade+ wa mwan’a Yesua yo Noadeya wa mwan’a Binui,+ Anelevi.
34 Yawonso yatangwa yo tezwa, e zitu dia lekwa yawonso disonekeno.
35 Awana batuka kuna kinkole, basunzwidi tukau twa ngioka kuna kwa Nzambi a Isaele, wan’a ngombe 12+ mu kuma kia Isaele yawonso, 96 lwa vaka ya mameme,+ 77 lwa wan’a mameme a makoko ye vaka 12 ya nkombo+ se lukau lwa sumu; yawonso yayi i lukau lwa ngioka kwa Yave.+
36 I bosi, tutambikidi nsiku mia ntinu+ kwa akumbi* a ntinu ye kwa nguvulu za mvivu kuna Simu dia Nzadi,*+ bayikamene nkangu ye nzo a Nzambi aludi.+
Mvovo vana yand'a lukaya
^ Yovo “Anetine.” Mvovo wa sina: “ana batambikwa.”
^ Yovo “Anetine.” Mvovo wa sina: “ana batambikwa.”
^ Yovo “a mina nsoki.”
^ Yovo “Tuminini nsoki.”
^ Yovo “maseka ma dila.”
^ Ina ye nsasa vo: “atanini a ntinu,” ovava isadilu mu yika nguvulu za mvivu mia Luyalu lwa Parasa.
^ E mvivu a simu dia Nzadi i zunga ya weste a Uferate.
