Ezera 9:1-15
9 O mambu mama vava mavangama, akuluntu bamfinamene, oku vo: “O nkangu a Isaele ye anganga ye Anelevi, ke bayivaula muna nkangu mia nsi ko ye mavangu mau mangemi,+ mavangu ma Anekenani, Anekete, Anepereze, Aneyebuse, Aneyamone, Anemoabe, Angipito+ ye Aneyamore.+
2 Oyau yo wan’au amakala babongele wan’au amakento se akazi au.+ Owau, e mbongo avauka+ isangalakene ye nkangu mia nsi.+ Akuluntu ye alandi a nguvulu i basundidi vanga e sumu diadi.”
3 Vava yawá e diambu diadi, vana vau ntiazwini mvuatu ame ye yunga kiame, mvuzidi nsuki za ntu ame ye nzevo, mvuende yo kendalala.
4 I bosi, awonso ana bavuminanga* mambu ma Nzambi a Isaele banzungidi muna kuma kia sumu dia nkangu watuka kuna kinkole, ekolo yavuanda yo kendalala yamuna ntangwa ya tambika lukau lwa mbwaza lwa masika.+
5 Muna ntangw’a lukau lwa mbwaza lwa masika,+ ntelamene muna lukendalalu lwame ye yunga kiame kiatiazuka, mfukamene, ndambwidi moko kwa Yave wa Nzambi ame.
6 Mpovele vo: “E Nzambi ame, nsoni ye wonga ngina wau wa zangula e ndose ame oku wina, e Nzambi ame, kadi o bi weto usakidi, utuviokele o ntu, o usumuki weto ulweke yakuna zulu.+
7 Tuka muna lumbu ya mase meto yamu unu, vilwa wayingi tuvangidi;+ muna kuma kia bi weto, oyeto ye ntinu mieto ye nganga zeto, twayekolwa vana moko ma ntinu mia nsi, muna nsosolo,+ twanatwa kuna kinkole,+ twasanzua+ yo fusulwiswa e nsoni, nze unu kiaki.+
8 Owau, e Yave wa Nzambi eto utusongele e dienga mu fikolo wau kayambwidi vo nsadiswa yavuluzwa, utuvene fulu kiasikila* muna nzo andi avauka,+ utukiesesa o meso, e Nzambi eto yo kutuvana filuvutwilu fia moyo muna ubundu weto.
9 Kana una vo tu abundu,+ o Nzambi eto katubembwele ko muna ubundu weto; kansi utusongele walakazi vana vena e ntinu mia Parasa,+ muna kutukasakesa kimana twatungulula nzo a Nzambi eto+ yafwasakana, katuvana yaka kia matadi* muna Yuda ye Yerusaleme.
10 “Owau, adieyi tulenda vova muna mambu mama, e Nzambi eto? Kadi twayambula nkanikinu miaku
11 mina watuvanina muna ntaudi zaku angunza, oku vo: ‘E nsi ina nuvua i nsi yasafuka muna kuma kia usafu wa nkangu mia nsi, mu kuma kia mavangu mau mangemi, bafunzula yo tuka nsuka yaku nsuka.+
12 Dianu vo, ke nuvani wan’eno amakento kwa wan’au amakala ko ngatu yambula vo wan’eno amakala babonga wan’au amakento;+ Ke nuvavi luvuvamu lwau ko yo luvuatumuku lwau,+ kimana nuakumama, nuadia wete wa nsi, nuasisa yo se fwa dia wan’eno yakwele mvu.’
13 Wau tubwididi mama mawonso mu kuma kia mavangu meto mambi yo ulolo wa masumu meto—ongeye, e Nzambi eto, kutuvene e tumbu kifwene o bi weto ko,+ oyambwidi vo yeto twina vava twavuluka+ —
14 nga tukulula diaka nkanikinu miaku yo sompaziana ye nkangu mivanganga mambu mama mangemi?+ Nga kukutufungila makasi ko yavana okutufukisa e mvimba yo lembi sisa nsâdiswa ngatu vukisa muntu?
15 E Yave wa Nzambi a Isaele, ngeye wansongi,+ kadi twavuluka se nsâdiswa yamu unu kiaki. Twina ova ndose aku muna usumuki weto, kadi ke tulendi telama vana ndose aku ko muna kuma kiaki.”+
Mvovo vana yand'a lukaya
^ Mvovo wa sina: “bazakamene.”
^ Mvovo wa sina: “mpalu a saba.”
^ Yovo “yaka kia lutaninu.”
