Kuna kwa Esi Filipi 1:1-30
1 Paulu yo Timoteo, ntaudi za Kristu Yesu, kuna kwa avauki awonso muna Kristu Yesu ana bena omo Filipi,+ kumosi ye akengi ye selo ya salu:+
2 Yambula nuakala ye nsambu yo luvuvamu lutuka kwa Nzambi wa Se dieto yo Mfumu Yesu Kristu.
3 Ntangwa zawonso ivutulanga matondo kwa Nzambi ame vava ikunusungamenanga
4 muna ndodokela zame zawonso mu kuma kia yeno awonso. Ntangwa zawonso idodokelanga ye kiese,+
5 mu kuma kia lukau lweno muna* nsangu zambote tuka muna lumbu kiantete yamu wau.
6 Kadi ngina ye ziku muna diambu diadi, ndiona wayantika e salu kiambote muna yeno ofokola kio+ yamuna lumbu kia Kristu Yesu.+
7 Diansongi kwa mono yayindula diambu diadi mu kuma kia yeno awonso, kadi luna mu ntim’ame, luna yame entwadi muna nsambu za Nzambi, kiakala muna tuvambu twame,+ muna tanina yo sikidisa e nsangu zambote kuna kw’akwa wisa.+
8 Kadi Nzambi i mbangi ame muna mpila ikunulakukilanga moyo yeno awonso yo zola kwawonso wauna Kristu Yesu kekunuzolelanga.
9 Edi ilombanga muna sambu vo e nzol’eno yakwamanana wokela kikilu+ muna zayi wasikila+ yo umbakuzi wawonso;+
10 nuazaya mambu masundidi o mfunu,+ kimana nuakondwa vilwa yo lembi tesesa akaka masakuba,+ yamuna lumbu kia Kristu,
11 nuazala ye mbongo a unsongi, ina muna Yesu Kristu,+ muna nkembo ye lusanisinu lwa Nzambi.
12 Ampangi, nzolele nuazaya wo vo, mambu mambwididi metwasanga lunungunuku muna nsangu zambote,
13 o tuvambu tunkangidi+ muna diambu dia Kristu, tutomene zayakana+ vana vena Ayingidi awonso a lûmbu lwa ntinu ye kwa ankaka.
14 Owau muna kuma kia tuvambu twame, ayingi muna mpangi muna Mfumu bakasakene yo songa unkabu wa vova diambu dia Nzambi kondwa wonga.
15 Dialudi vo, ankaka besamunanga Kristu ye kimpala ye ntantani, kansi ankaka ye luzolo lwambote.
16 Awaya besamunanga Kristu muna zola, kadi bazeye wo vo yavewa kiyekwa kia tanina e nsangu zambote;+
17 kansi ana bavitidi bevangilanga wo muna ntantani, ke mu ntim’asikila ko, bazolele kuntwasila mpasi ekolo ngina mu boloko.
18 Nkia nluta ditwasa? Muna mpila zawonso, kiakala muna luvunu yovo muna ludi, Kristu osamunuanga, i diau ntomene mwena kiese. Elo, i diau mpe ikwamanana mwena kiese,
19 kadi nzeye wo vo muna ndodokela zeno mukwizila luvuluzu lwame+ yo lusadisu lwa mwand’a Yesu Kristu.+
20 Ngina ye ziku ye vuvu vo, kimweswa nsoni muna konso diambu ko. Kansi mu kuma kia unkabu wame wavova, owau itundidika Kristu nze una yateka vanga, ikuntundidika mu nitu ame, kiakala mu moyo, kana mu lufwa.+
21 Kadi kwa mono, okala moyo i Kristu,+ o fwa i nluta.+
22 Avo nkwamanane zinga muna nitu, i mbongo a salu kiame; kansi owu mfwete sola kizayisa wo ko.
23 Ngiangamene o ntima muna mambu mama mau mole, kadi nzolele vo ngienda kimana yakala yo Kristu,+ ediadi i disundidi o wete.+
24 Kansi, disundidi o mfunu yakala kaka mu nitu muna diambu dieno.
25 Dianu vo, wau ngina ye ziku muna diambu diadi, nzeye wo vo ikala kaka yo yeno awonso kimana nuanungunuka yo mona kiese muna lukwikilu lweno,
26 kimana e kiese kieno muna Kristu Yesu kiawokela mu mono wau ikala yeno diaka.
27 Yambula e kadilu kieno kiakala e ngwizani ye nsangu zambote mu kuma kia Kristu,+ diakala vava ikwiza kunutala yovo vava ikala kwankaka, yawá e nsangu zeno yo zaya vo nusikilanga muna nyindu mosi yo ntima mosi+ wau nusalanga entwadi muna tatidila lukwikilu lwa nsangu zambote,
28 ke nuyambula ko vo atantu eno banuvumisa muna konso diambu. Ekiaki i sinsu kia lufwasu lwau,+ kansi kia luvuluzu kuna kwa yeno;+ e sinsu kiaki kwa Nzambi kitukidi.
29 Kadi mu kuma kia Kristu nuvaninu e lau, ke mu kwikila kaka muna yandi ko, kansi wau numwene mpe mpasi mu kuma kiandi.+
30 Kadi nunuananga e vita ina nuamona omu mono,+ owau nuwidi wo vo yakinu yo nuana.
Mvovo vana yand'a lukaya
^ Yovo “wau nukuyivananga muna samuna.”
