Kuna kwa Esi Filipi 2:1-30
2 Ozevo, avo nuna yo lukasakeso muna Kristu, avo nuna yo lufiaulwisu lwa zola, avo nutokanenanga wete dia muntu yo nkwandi, avo nuina yo walakazi ye nkenda,
2 ozevo nulunganisa e kiese kiame muna kalanga yo nyindu mosi, nzola mosi, akwa ntima mosi ye kani dimosi.+
3 Ke nuvangila konso diambu muna ntantani ko+ ngatu kuna lusanu,+ kansi kuna lulembamu kaka nubadikila ankaka vo banusundidi,+
4 ke nuvavingi kaka wete wa yeno kibeni ko,+ kansi wete dia akaka mpe.+
5 Nukalanga yo nyindu una wakala muna Kristu Yesu,+
6 kanele vo wakala muna mpw’a Nzambi,+ kasidi yindula ko vo kakutumuna e kimfumu, i sia vo, kafwanana yo Nzambi.+
7 Kansi, wayambula yawonso kakala yau,* wabaka e mpw’a ntaudi+ yo kituka se muntu.*+
8 Edi disundidi, vava kakituka se muntu,* wakikulula yo songa nlemvo yamuna lufwa,+ elo, lufwa vana nti ampasi.*+
9 Muna kuma kiaki, Nzambi wantundidika yo kumvana fulu kisundidi,+ muna zola kwawonso wamvana e nkumbu isundidi e nkumbu zawonso,+
10 kimana muna nkumbu a Yesu mwafukamena makungunu mawonso—awana bena kuna zulu ye awana bena ova ntoto ye awana bena muna nsi a ntoto+—
11 tubini twawonso twatambulwila vo Yesu Kristu i Mfumu+ muna nkembo a Nzambi, wa Se.
12 Dianu vo, azolw’ame, wauna nulemvokelanga ntangwa zawonso, ke vana ngina kaka ko, kansi musungula vo owau kina vo ko, nusiamanana sala kuna vumi ye zakamu muna diambu dia luvuluzu lweno.
13 Kadi Nzambi muna luzolo lwandi, okunusiamisanga yo kunuvana luzolo yo nkuma wa sala.
14 Nuvangilanga mawonso lembi yidima+ ngatu filana e mpaka,+
15 kimana nuakondwa lusembo ye kuma, nuakala wan’a Nzambi+ bakondwa tona vana kati kwa mbandu yayi yambi yo tekomoka,+ vana nukeziminanga nze mini mu nza.+
16 Nutoma simbinina e diambu diamoyo,+ kimana yakala ye kuma kia kuyisanina muna lumbu kia Kristu, kadi nzeye wo vo kialundumuka nkatu ko ngatu funtuka nkatu.
17 Kana nkutu vo ngitilu nze lukau lwa ndua+ vana kimenga+ ye salu kiavauka nusadidi muna lukwikilu, mono ngiangalele, ngiangalele kumosi yo yeno awonso.
18 Diau dimosi, oyeno mpe numona kiese yo yangalela yame.
19 Owau ngina ye vuvu muna Mfumu Yesu vo ke kolo ko se yanutumina Timoteo,+ kimana yakumikwa vava itambula e nsangu zeno.
20 Kadi kina yo muntu ankaka ko una ye luzolo nze yandi, ona otoma kunulunga-lunga.
21 Kadi ankaka, yau awonso mambu ma yau kibeni kaka bevavanga, ke mana ma Yesu Kristu ko.
22 Nuzeye e ziku kina kasonga, nze mwana+ osadilanga se diandi, wasala yame muna lunungunuku lwa nsangu zambote.
23 Dianu vo, yandi nzolele tuma, vava izaya mana mekumbwila.
24 Kansi, ngina ye vuvu muna Mfumu vo, ke kolo ko mono kibeni se ngiza.+
25 Kansi owau, mbwene vo diamfunu yanutumina Epaferodito wa mpangi ame, nkwame a salu ye nkwame a kesa, ona nuatuma kimana kansadila,+
26 kadi olakukilanga o moyo a monana yo yeno awonso yo kendalala kikilu e kuma kadi nuawa wo vo yela kayela.
27 Yela kikilu kayela, wadi fwa nkutu; kansi Nzambi wamfwila e nkenda, ke yandi kaka ko, yo mono mpe kimana yalembi mona diaka e ntantu vana ntandu a ntantu.
28 Dianu vo, intumini mu nzaki, kimana vava numonana yandi, nuakala diaka ye kiese, kimana mono mpe yakulula e ntantu.
29 Nuntambula muna Mfumu ye kiese kiawonso wauna nuakulukilwa, nuzitisanga wantu a mpila yayi,+
30 e kuma kadi muna diambu dia salu kia Kristu* fioti fiasala nga wafwa, wasia moyo andi mu vonza muna kunsadila wau vo yeno ke nuakala vo ko.+
Mvovo vana yand'a lukaya
^ Mvovo wa sina: “kituka se fwaniswa kia muntu.”
^ Yovo “wakisisa e nkatu.”
^ Mvovo wa sina: “vava kakala muna fwaniswa kia muntu.”
^ Tala Nsas’a Mvovo.
^ Nanga, “salu kia Mfumu.”
