Levitiku 1:1-17
-
Lukau lwa ngioka (1-17)
1 I bosi, Yave obokele Mose tuka muna saba kia wananina+ yo kumvovesa vo:
2 “Vovesa Aneyisaele* vo: ‘Avo muntu vovo nuina osunzula lukau kwa Yave muna twelezi yandi, kafwete twasa ngombe yovo meme yovo nkombo se lukau.+
3 “‘Avo ngombe ketambika se lukau lwa ngioka, kafwete twasa koko dialunga.+ Kafwete dio sunzulwila muna luzolo lwa yandi kibeni+ vana ndose a Yave, vana mwelo a saba kia wananina.
4 Kafwete tenseka koko kwandi vana ntu a bulu kia kimenga kia ngioka, o Nzambi otambula lukau lwandi yo loloka masumu mandi.
5 “‘I bosi, o mwan’a ngombe a koko ovondelwa vana ndose a Yave, o wan’a Arone, anganga,+ besunzula o menga yo zaza mo muna ndambu zawonso za ziku,+ edi dina vana mwelo a saba kia wananina.
6 E bulu kia lukau lwa ngioka kifwete katulwa o nkanda yo zengononua mu tini-tini.+
7 O wan’a Arone, anganga, besia o tiya vana ziku+ yo yala e nkuni vana tiya.
8 O wan’a Arone, anganga, bekutika e tini ya lukau+ kumosi yo ntu yo mazi,* vana nkuni zina vana tiya tuna vana ziku.
9 E ndia miandi yo malu mandi mafwete sukulwa muna maza. O nganga ofutumuna yawonso vana ziku se lukau lwa ngioka. Lukau lwayoka vana tiya, lekwa kia nsunga* kuna kwa Yave.+
10 “‘Avo mwan’a mameme yovo nkombo ketambika se lukau lwa ngioka,+ kafwete twasa koko dialunga.+
11 E bulu kifwete vondelwa vana ndambu a ziku kuna node, vana ndose a Yave. O wan’a Arone, anganga, bezaza o menga mandi muna ndambu zawonso za ziku.+
12 Ozenga e bulu mu tini-tini, o nganga okutika e tini kumosi yo ntu andi yo mazi* mandi, vana nkuni zina vana tiya tuna vana ziku.
13 Osukula e ndia yo malu muna maza. O nganga osunzula lekwa yawonso ya bulu yo futumuna yo vana ziku. Olwalu i lukau lwa ngioka, lukau lwayoka vana tiya, lekwa kia nsunga* kuna kwa Yave.
14 “‘Kansi, avo nuni ketambika se lukau lwa ngioka kwa Yave, kafwete sunzula mbwela yovo nsweswe mia mayembe se lukau.+
15 O nganga osunzula e nuni vana ndambu a ziku yo zenga vana laka diandi muna zala, ofutumuna yo vana ziku. Kansi kafwete yambula vo menga mandi makukula muna yaka ya ziku.
16 Kafwete katula e kimfi kiandi ye nsala zandi yo tuba zo vana ndambu a ziku, kuna este, vana vena o ntoto ampolo.*+
17 Kafwete kumpasula muna mave mandi, kansi kafwete mo kayanesa mu ndambu zole ko. I bosi, o nganga okumfutumuna vana ziku, vana nkuni zina vana tiya. Olwalu i lukau lwa ngioka, lukau lwayoka vana tiya, lekwa kia nsunga* kuna kwa Yave.
Mvovo vana yand'a lukaya
^ Mvovo wa sina: “wan’a Isaele.”
^ Yovo “mazi mena vana ntandu a nguba.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Yovo “mazi mena vana ntandu a nguba.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Yovo “ntoto ampolo a mazi,” i sia vo, ntoto ampolo wasangana yo mazi ma yimenga.
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”