Levitiku 10:1-20
10 Kuna kwalanda, Nadabi yo Abiu,+ wan’a Arone, babongele konso muntu e yokelwa kiandi kia ndumbu,+ basidi mo tiya, basidi vo e ndumbu. I bosi, bayantikidi tambika e ndumbu vana ndose a Yave muna tiya twalembi vaninua o nswa,+ tuna ke bakanikinua ko bavanga.
2 Muna kuma kiaki, vavaikidi tiya vana ndose a Yave tubayokele,+ bafwidi vana ndose a Yave.+
3 I bosi, Mose ovovese Arone vo: “I wau wuwu kavovele o Yave: ‘Awana bena yame lukufi bafwete sungamenanga vo omono yavauka,+ ikembelelwa vana vena nkangu awonso.’” Arone okedi kaka e pi-i.
4 Mose obokele Misaele yo Elisafane, o wan’a Uziele,+ wa ngudi a nkazi a Arone, ubavovese vo: “Nuiz’oku, nukatula mpangi zeno ova ntwal’a fulu kiavauka yo kubanata kuna mbazi a ndo.”
5 Bezidi, banete mavimbu kuna mbazi a ndo ekolo makala muna mvuela zau, wauna Mose kabavovese.
6 I bosi, Mose ovovese Arone yo wan’andi akaka, Elaza yo Itama vo: “Ke nuyambula kubika nsuki za ntu mieno ko ngatu tiazuna e mvuatu mieno,+ nualembi fwa, o Nzambi kalembi fungila nkangu awonso makasi. E mpangi zeno za nzo yawonso ya Isaele bedila awana bavondelo kwa Yave muna tiya.
7 Ke nufwete katuka vana mwelo a saba kia wananina ko, nualembi fwa, kadi o mazi mankusa* ma Yave mena ova ntandu a ntu mieno.”+ Bavangidi mun’owu wa mvovo mia Mose.
8 I bosi, Yave ovovese Arone vo:
9 “Vava nukwiza omu saba kia wananina, ongeye yo wan’aku ke nunue vinyu ko ngatu malavu mankaka mankolwa,+ nualembi fwa. Owau nkanikinu a mvu ke mvu muna mbandu zeno zawonso.
10 Kimana nuaswaswanesa eki kiavauka y’eki kialembi vauka, eki kiafunzuka y’eki kiavelela,+
11 muna longa Aneyisaele nsiku miawonso mina Yave kabazayisa muna Mose.”+
12 I bosi, Mose ovovese Arone yo wan’andi Elaza yo Itama ana basala, oku vo: “Muna tukau twayoka vana tiya tuveno kwa Yave, nubonga ina isuvidi muna lukau lwa mbwaza, nuvangila yo mbolo zakondwa mfuna yo dila zo vana ndambu a ziku,+ kadi ekiaki lekwa kisundidi o vauka.+
13 Nufwete zo dila vana fulu kiavauka,+ kadi ekiaki i kunku kiaku ye kunku kia wan’aku kitukidi muna tukau twayoka vana tiya kuna kwa Yave, kadi i una yakanikinua.
14 Ongeye yo wan’aku amakala yo wan’aku amakento,+ nudila mpe tulu kia bulu kia lukau lwa zunganisa ye tó kia kulu kia kunku kiavauka+ vana fulu kiavelela. Kadi e lekwa yayi iveno se kunku kiaku ye kunku kia wan’aku amakala, eki kibongelo muna yimenga ya ungudi ya Aneyisaele.
15 Betwasa e tó kia kulu kia kunku kiavauka ye tulu kia bulu kia lukau lwa zunganisa, betwasa mpe tukau twa mazi twayoka vana tiya, kimana o lukau lwa zunganisa lwazunganeswa kuna ntwala y’oku nima vana ndose a Yave; e tó kia kulu ye tulu kikala se kunku kiaku kia mvu ke mvu ye kia wan’aku ana una yau,+ wauna o Yave kakanikina.”
16 Mose ovavidi e nkombo a koko a lukau lwa sumu+ muna fulu yawonso, omwene vo yawonso imene yokwa. Muna kuma kiaki, ofungidi wan’a Arone ana basala makasi, o Elaza yo Itama, ubavovese vo:
17 “Ekuma nulembele dila e bulu kia lukau lwa sumu vana fulu kiavauka,+ wau vo lekwa kisundidi o vauka? Nga ke iveno kwa yeno ko mu katula e sumu dia nkangu yo lomba luyambulwilu lwa masumu mau vana ndose a Yave?
18 Tala! O menga ma bulu kia lukau ke maneto muna kati kwa fulu kiavauka ko.+ Oyeno nuadi yo dila vana fulu kiavauka, wauna yakanikinua.”
19 Arone ovutwidi Mose vo: “Tala! O unu nkangu usunzwidi lukau lwau lwa sumu yo lukau lwau lwa ngioka vana ndose a Yave,+ kansi kilendele dia mbizi a tukau twatu ko. Ngeye kibeni ozeye mambu mambwididi. Kele vo yadia lukau lwa sumu o unu, nga diadi yangidika Yave?”
20 Vava Mose kawidi wo, obakwidi.
Mvovo vana yand'a lukaya
^ I sia vo, mazi masadilwanga muna tumbika muntu.
