Levitiku 26:1-46
26 “‘Ke nuyivangila fwafwala ya nzambi ko,+ ke nutelamesa teke kiavalwa ko+ yovo lunzi diavauka, ke nufwete tula fwaniswa kia tadi diavalwa ko+ muna nsi eno kimana nuavumbamena dio;+ kadi mono i Yave wa Nzambi eno.
2 Nufwete lunda e lumbu yame ya vundu yo zitisa* e nzo ame avauka. Mono i Yave.
3 “‘Avo nukwamanana kangalela muna mîna miame yo lunda e nkanikinu miame yo lemvokela mio,+
4 ikununokesena mvula muna ntangw’andi,+ o ntoto uyima e mbongo andi,+ e nti mia mpatu miwuta e bundu yandi.
5 E nsungi ya bunda e mbongo ilwaka yamuna ntangw’a kutika e uva, e nkutika uva ilwaka yamuna nsungi a kuna e mbongo; nudia madia meno yo yukuta, nuzingila mu luvuvamu muna nsi eno.+
6 Isikidisa luvuvamu muna nsi,+ nuleka lembi mweswa wonga kwa muntu;+ iyinga e bulu yansisi muna nsi, o nsosolo a vita ke uviokela muna nsi eno ko.
7 Nulakama kieleka e mbeni zeno, zibwa ova ndose eno muna nsosolo.
8 Wantu tanu muna yeno belakama mbeni 100, wantu 100 muna yeno belakama mbeni 10.000, e mbeni zeno zibwa vana ndose eno muna nsosolo.+
9 “‘Ikunusonga e dienga,* ikunuvana wana yo wokesa e mbongo eno,+ ilunda e kangu diame yo yeno.+
10 Ekolo nudianga e mbongo ankulu a mvu uviokele, nuvava vaikisa eyi yankulu mu sisa e fulu mu kuma kia mbongo ampa.
11 Isia e saba kiame vana kati kweno,+ omono kikunubembola ko.
12 Ikangalela vana kati kweno yo kala se Nzambi eno,+ oyeno nukala se nkangu ame.+
13 Mono i Yave wa Nzambi eno, ona wanuvaikisa muna nsi ya Engipito nualembi kala diaka abundu au, ntolwele mbindi za vangu kieno yo kunudiatisila ye ntu miazanguka.*
14 “‘Kansi, avo ke nukungwila ko ngatu lunda e nkanikinu miami miawonso,+
15 avo nubembola e mîna miame,+ avo numenga* e nzengo zame za mfundisa muna lembi lunda e nkanikinu miame miawonso yo kulula e kangu diame,+
16 omono, edi ikunuvanga: ikunutwasila lubangamu muna kunutumba, nkovol’a lufulu ye ngianduka yangolo, ina ifwasa meso meno malembi toma mona diaka yo yoyesa e mioyo mieno. Mpasi zankatu numona za kuna e mbongo, kadi mbeni zeno bedia yo.+
17 Ikunufila e nima, nusundwa kwa mbeni zeno;+ numweswa e mpasi kw’awana bekunumenganga,+ nutina lembi kulaneswa kwa muntu.+
18 “‘Kansi, avo ke nungwididi kaka ko, ikunutumba diaka nkumbu nsambwadi mu kuma kia masumu meno.
19 Isukisa lulendo lweno lwasaka, ikanga e zulu dieno dialembi noka e mvula*+ ye ntoto eno walembi yima e mbongo.*
20 Ngolo zankatu nufwasa wau vo ntoto eno ke uyima mbongo andi ko,+ e nti mia nsi ke miyima bundu ko.
21 “‘Kansi, avo nukwamanene kuntelamena yo lembi kungwila, ikunutumba diaka nkumbu nsambwadi mun’owu wa masumu meno.
22 Ituma bulu ya mfuta vovo nuina,+ ifukisa o wan’eno+ ye bulu yeno ya vata, akete kaka muna yeno besala, e nzila zeno zikituka se mfuta.+
23 “‘Kuna nima mambu mama, avo ke nulemvokele longi diame ko,+ nukwamanene kaka kuntelamena,
24 omono mpe ikunutelamena, mono kibeni ikunuwanda nkumbu nsambwadi mu kuma kia masumu meno.
25 Iyambula vo e mbeni zeno banunuanisa muna nsosolo muna kunutumba wau nukulwidi e kangu diame.+ Avo nutinina muna mbanza zeno, itwika e vuku vana kati kweno,+ nuyekolwa vana moko ma mbeni zeno.+
26 Vava ifwasa e lundilu dia* mbolo* eno,+ akento kumi beyokela e mbolo zeno mu fûlu dimosi yo kunuvanina e mbolo muna tezo;+ oyeno nudia kansi ke nuyukuta ko.+
27 “‘Kansi, avo ke nukungwila ko yo kwamanana kuntelamena,
28 iwokesa e kitantu kiame muna yeno,+ mono kibeni ikunutumba nkumbu nsambwadi mu kuma kia masumu meno.
29 Nudia e nitu za wan’eno amakala, nudia mpe nitu za wan’eno amakento.+
30 Ifwasa e fulu nusambidilanga e nzambi zeno zaluvunu*+ yo wula maziku meno ma ndumbu yo tenseka mavimbu meno vana ntandu a mavimbu ma teke yeno yangemi,*+ omono nkele ikunumona yo kunubembola.+
31 Iyambula vo e mbanza zeno zafwaswa,+ isisa e nzo zeno zavauka e nkatu, kiwá nsunga* za yimenga yeno ko.
32 Mono kibeni isisa e nsi e nkatu,+ e mbeni zeno ana bezingilanga mo betala e mbanza yo sivika.+
33 Ikunumwanganesa mu zula yayingi,+ ivaikisa o nsosolo oku nim’eno;+ e nsi eno isala e nkatu,+ e mbanza zeno zikituka se mazumbu.
34 “‘Muna ntangwa yayina, o ntoto ufuta e lumbu yandi ya vundu muna lumbu yawonso usala e nkatu, ekolo nukala kuna nsi a mbeni zeno. Muna ntangwa yayina, e nsi ivunda,* wau vo ifuta e lumbu yandi ya vundu.+
35 E nsi ivunda muna lumbu yandi yawonso isala e nkatu, kadi e nsi ke yavunda ko muna lumbu yeno ya vundu vava nuazingilanga mo.
36 “‘Vo i awana besala o moyo,+ izadisa e ntima miau yo kondwa kwa vuvu muna nsi za mbeni zau; e zú dia lukaya luvevomokanga dikubatinisa, betina wauna o muntu ketininanga o nsosolo a vita, bebwa lembi kulaneswa kwa muntu.+
37 Beta sakuba yo bwa vana ntandu a muntu yo nkwandi nze yau nutinanga nsosolo a vita, kana nkutu vo ke bakulaneso kwa muntu ko. Ke nulenda telamena mbeni zeno ko.+
38 Nufwila vana vena zula yayingi,+ e nsi a mbeni zeno ikunudia.
39 Awana besala vovo nuina bebembolwa kimana bawolela muna nsi za mbeni zeno+ mu kuma kia bi wau. Elo, bewola mu kuma kia bi wa mase mau.+
40 I bosi, befunguna bi wau,+ bi wa mase mau yo kondwa kwa kwikizi kwa mase mau, betambulwila vo ke basonga kwikizi ko wau balembi kangalela muna nzila zame.+
41 Muna kuma kiaki, mono mpe kikangala yau diaka ko,+ ikubanata kuna nsi a mbeni zau.+
“‘Nanga e ntima miau miabala* milembama,+ ozevo oyau befuta o bi wau.
42 Isungamena e kangu diame yo Yakobo+ ye kangu diame yo Isaki,+ isungamena e kangu diame yo Abarayama,+ isungamena mpe e nsi.
43 Ekolo e nsi yabembolwa, e nsi yafutanga e lumbu yandi ya vundu,+ yasala e nkatu, ke bakala mo ko; bafutanga o bi wau, kadi babembola e nzengo zame za mfundisa, bamenga e mîna miame.+
44 Kansi muna mawonso mama, ekolo bekala muna nsi a mbeni zau, kikubabembola emvimba ko ngatu kubamenga+ yamu tezo kia kubafukisa emvimba, kadi ediadi dikulula e kangu diame+ yo yau, kadi mono i Yave wa Nzambi au.
45 Muna wete diau, isungamena e kangu yakanga ye akulu au,+ ana yavaikisa muna nsi ya Engipito vana meso ma zula yayingi,+ kimana yakala se Nzambi au. Mono i Yave.’”
46 Emiami i nkanikinu, i nzengo za mfundisa ye nsiku mina Yave kavana kwa Aneyisaele kuna Mongo a Sinai muna Mose.+
Mvovo vana yand'a lukaya
^ Mvovo wa sina: “vumina.”
^ Mvovo wa sina: “Iviluka kwa yeno.”
^ Mvovo wa sina: “kunudiatisila nuasingama.”
^ Yovo “avo mioyo mieno mimenga.”
^ Mvovo wa sina: “ikitula e zulu dieno nga nsongo.”
^ Mvovo wa sina: “ikitula o ntoto eno nga sengwa.”
^ Yovo “madia.”
^ Mvovo wa sina: “ifwasa nkau a.” Nanga i nkau wayengelekwanga e mbolo zakala nga nlunga.
^ Mvovo wa sina: “mabata meno.”
^ O mvovo wa Kiyibere nanga ngwizani wina yo mvovo “doti,” usadilwanga se mvovo a luvezo.
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Yovo “e nsi ilunda e lumbu kia vundu.”
^ Mvovo wa sina: “mialembi zengwa.”
