Levitiku 3:1-17
3 “‘Avo muntu ozolele tambika kimenga kia ungudi,*+ avo ngombe kesunzula, kiakala yakoko yovo yankento, kafwete sunzula bulu kialunga vana ndose a Yave.
2 Kafwete tenseka o koko kwandi vana ntu a bulu kia lukau lwandi, e bulu kivondelwa vana mwelo a saba kia wananina; o wan’a Arone, anganga, bezaza o menga muna ndambu zawonso za ziku.
3 Osunzula e ndambu a kimenga kia ungudi se lukau luyokwa vana tiya kuna kwa Yave:+ o mazi+ mefukanga e ndia ye mazi mawonso mena muna ndambu a ndia,
4 ye nguba zau zole yo mazi mena vana ntandu a nguba, vana ndambu a luketo. Okatula mpe mazi ma kimoyo* kumosi ye nguba.+
5 O wan’a Arone befutumuna yo vana ziku, vana ntandu a lukau lwa ngioka luna vana nkuni zina vana tiya;+ i lukau lwayoka vana tiya, lekwa kia nsunga* kuna kwa Yave.+
6 “‘Avo meme yovo nkombo ketambika se kimenga kia ungudi kwa Yave, osunzula bulu kialunga kiakoko yovo kiankento.+
7 Avo mwan’a meme a koko kesunzula se lukau, ozevo okunsunzula vana ndose a Yave.
8 Otenseka koko kwandi vana ntu a bulu kia lukau lwandi, e bulu kivondelwa vana mwelo a saba kia wananina. O wan’a Arone bezaza o menga mandi muna ndambu zawonso za ziku.
9 Osunzula mazi ma bulu kia kimenga kia ungudi se lukau vana tiya kuna kwa Yave.+ Okatula nkil’a mazi wawonso yo mazi mena vana ndambu a lubasa lwa nima, o mazi mefukanga e ndia, mazi mawonso mena muna ndambu a ndia,
10 ye nguba zau zole yo mazi mena vana ntandu a nguba, vana ndambu a luketo. Okatula mpe mazi ma kimoyo* kumosi ye nguba.+
11 O nganga ofutumuna yo vana ziku nga madia,* lukau lwayoka vana tiya kuna kwa Yave.+
12 “‘Avo nkombo ketambika se lukau, ozevo osunzula yo vana ndose a Yave.
13 Otenseka koko kwandi vana ntu a bulu yo vondela kio vana mwelo a saba kia wananina, o wan’a Arone bafwete zaza o menga mandi muna ndambu zawonso za ziku.
14 Eyayi i tini kesunzula se lukau lwandi kwa Yave vana tiya: mazi mefukanga e ndia, mazi mawonso mena muna ndambu a ndia,+
15 ye nguba zau zole yo mazi mena vana ntandu a nguba, vana ndambu a luketo. Okatula mpe mazi ma kimoyo* kumosi ye nguba.
16 O nganga ofutumuna yo vana ziku nga madia,* lukau lwayoka vana tiya, lekwa kia nsunga.* O mazi mawonso ma Yave.+
17 “‘Owau nkanikinu wa mvu ke mvu muna mbandu zeno zawonso, muna fulu yawonso nuzingila: Ke nufwete dia konso mazi ko yovo konso menga+ ko.’”
Mvovo vana yand'a lukaya
^ Yovo “kimenga kia tukau twa luvuvamu.”
^ Yovo “kati.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Yovo “kati.”
^ Mvovo wa sina: “mbolo,” i sia vo, se kunku kia kimenga kia ungudi kina vo kia Nzambi.
^ Yovo “kati.”
^ Mvovo wa sina: “mbolo,” i sia vo, se kunku kia kimenga kia ungudi kina vo kia Nzambi.
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
