Levitiku 8:1-36
-
Arone yo wan’andi batumbikilu se anganga (1-36)
8 Yave okwamanene vovesa Mose vo:
2 “Twasa Arone yo wan’andi kumosi+ ye mvuatu,+ mazi mankusa,*+ mwan’a ngombe a koko a lukau lwa sumu, mameme mole ma makoko, e mbangu a mbolo zakondwa mfuna,+
3 ye kutakesa o nkangu awonso vana mwelo a saba kia wananina.”
4 I bosi, Mose ovangidi una o Yave kankanikina, o nkangu ukutakene vana mwelo a saba kia wananina.
5 Mose ovovese nkangu vo: “I wau wuwu katukanikini o Yave vo twavanga.”
6 Muna kuma kiaki, Mose otwese Arone yo wan’andi, ubasukwidi muna maza.+
7 I bosi, ovuikidi Arone mvuela,+ unkangidi e mponda muna luketo,+ umvuikidi yunga kiakondwa moko,+ umvuikidi kidukula+ vana ntandu yo kanga kio e mponda+ ya kidukula, otomene yo zitika.
8 Umvuikidi e babu kia tulu+ yo sia Urimi ye Tumimi+ muna babu kia tulu.
9 Osidi e mpu a nlele+ vana ntu andi yo sia lukandala lwankezimi lwa wolo kuna ntwal’a mpu a nlele, i sia vo, e sinsu kiavauka kia kukiyekola,*+ wauna Yave kakanikina Mose.
10 I bosi, Mose obongele mazi mankusa,* okusidi e saba ye lekwa yawonso yakala mo,+ ovawidi yo.
11 Ozazidi e ndambu a mazi vana ziku nkumbu nsambwadi, okusidi e ziku o mazi ye sadilwa yandi yawonso, longa diampwena ye vuandisilwa kiandi kimana kavaula yo.
12 Muna fokola, oyitidi ndambu a mazi mankusa* vana ntu a Arone, unkusidi kimana kamvaula.+
13 I bosi, Mose otwese wan’a Arone, ubavuikidi e mvuela yo kubakanga e mponda, ubasidi* e fukilwa ya ntu,+ wauna o Yave kakanikina Mose.
14 I bosi, otwese ngombe a koko a lukau lwa sumu, o Arone yo wan’andi batensekele moko mau vana ntu a ngombe a koko a lukau lwa sumu.+
15 Mose ovondele ngombe, ovungidi o nlembo andi muna menga+ yo tula mo vana mpoka za ziku muna ndambu zawonso, ovawidi e ziku, kansi o menga mankaka oyitidi mo vana sina dia ziku, kimana kavaula dio yo velelesa dio.
16 I bosi, Mose obongele mazi mawonso makala vana ntandu a ndia, mazi ma kimoyo,* nguba zau zole yo mazi mau, ofutumwini yo vana ziku.+
17 I bosi, yawonso yasuva muna ngombe a koko, i sia vo, nkand’andi, nsuni andi ye doti diandi, oyokele yo vana tiya kuna mbazi a ndo,+ wauna Yave kakanikina Mose.
18 Otwese meme dia koko dia lukau lwa ngioka, o Arone yo wan’andi batensekele moko mau vana ntu a meme diakoko.+
19 Mose ovondele dio yo zaza o menga muna ndambu zawonso za ziku.
20 Ozengel’e meme dia koko tini-tini, Mose ofutumwini o ntu ye tini yawonso yo mazi.*
21 Osukwidi e ndia yo malu muna maza, Mose ofutumwini e meme diawonso dia koko vana ziku. Olwalu lwakala se lukau lwa ngioka, se lekwa kia nsunga.* I lukau lwayoka vana tiya kuna kwa Yave, wauna o Yave kakanikina Mose.
22 I bosi, otwese meme diazole dia koko, e meme dia koko dia tumbikila anganga,+ o Arone yo wan’andi batensekele moko mau vana ntu a meme.+
23 Mose ovondel’e meme, obongel’e ndambu a menga mandi yo sia mo vana nsuk’a kutu kwalunene kwa Arone, vana nlembo anene wa koko kwandi kwalunene ye vana nlembo anene wa kulu kwandi kwalunene.
24 I bosi, Mose otwese wan’a Arone, osidi ndambu a menga vana nsuka za matu mau malunene, vana nlembo miau mianene mia koko kwalunene ye vana nlembo miau mianene mia kulu kwalunene; kansi o menga masuvidi, Mose ozazidi mo muna ndambu zawonso za ziku.+
25 I bosi, obongele mazi, nkil’a mazi, mazi mawonso makedi vana ndia, mazi ma kimoyo,* e nguba zau zole yo mazi mandi ye tó kialunene kia kulu.+
26 Muna mbangu a mbolo zakondwa mfuna yakala vana ntadisi a Yave, obongele mo mbolo mosi yakondwa mfuna ina nga nlunga,+ mbolo mosi ina nga nlunga yakuswa o mazi+ ye mbolo mosi yababama. Osidi yo vana tini ya mazi ye vana tó kialunene kia kulu.
27 I bosi, osidi lekwa yoyo yawonso vana moko ma Arone ye vana moko ma wan’andi, oyantikidi yo zunganisa kuna ntwala y’oku nima se lukau lwa zunganisa vana ndose a Yave.
28 I bosi, Mose obongele yo vana moko mau, ofutumwini yo vana ziku, vana ntandu a lukau lwa ngioka. Olwalu lwakala se lukau lwa tumbikila anganga, se lekwa kia nsunga.* I lukau lwayoka vana tiya kuna kwa Yave.
29 I bosi, Mose obongel’e tulu, ozungisi kio kuna ntwala y’oku nima se lukau lwa zunganisa vana ndose a Yave.+ E tulu kia meme dia koko dia tumbikila kikitukidi se kunku kia Mose, wauna o Yave kakanikina Mose.+
30 Mose obongele ndambu a mazi mankusa*+ ye ndambu a menga makala vana ziku, ozazidi mo kwa Arone ye mvuatu miandi, kwa wan’andi ye mvuatu mia wan’andi ana bakala yandi. Muna mpila yayi, ovawidi Arone ye mvuatu miandi, wan’andi+ ye mvuatu miau.+
31 I bosi, Mose ovovese Arone yo wan’andi vo: “Nulambila+ o nsuni vana mwelo a saba kia wananina, i vana nudila yo kumosi ye mbolo zina muna mbangu a tumbikila anganga, wauna yakanikinua vo: ‘Arone yo wan’andi bedia yo.’+
32 Kina kisuva muna nsuni ye mbolo, oyoka kio vana tiya.+
33 Ke nufwete katuka vana mwelo a saba kia wananina ko mu lumbu nsambwadi, yavana e lumbu ya ntumbikw’eno ifwana, kadi e ntumbikw’eno se anganga* lumbu nsambwadi ivanga.+
34 Mana mavangamene o unu i mau o Yave kakanikina vo mavangwa, mu kuma kia luyambulwilu lwa masumu meno.+
35 Vana mwelo a saba kia wananina nukala fuku yo mwini, mu lumbu nsambwadi,+ nulungisa yiyekwa yeno kwa Yave,+ kimana nualembi fwa; kadi i wau yakanikinua.”
36 Arone yo wan’andi bavangidi mambu mawonso mana o Yave kakanikina muna Mose.
Mvovo vana yand'a lukaya
^ I sia vo, mazi masadilwanga muna tumbika muntu.
^ Yovo “kolowa yavauka.”
^ I sia vo, mazi masadilwanga muna tumbika muntu.
^ I sia vo, mazi masadilwanga muna tumbika muntu.
^ Yovo “ubazingidi.”
^ Yovo “kati.”
^ Yovo “mazi mena vana ntandu a nguba.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Yovo “kati.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ I sia vo, mazi masadilwanga muna tumbika muntu.
^ Mvovo wa sina: “kadi e nzadiswa koko kweno.”
