Levitiku 9:1-24
-
Arone ovene tukau twa ntumbikilu (1-24)
9 Muna lumbu kianana,+ Mose obokele Arone yo wan’andi ye akuluntu a Isaele.
2 Ovovese Arone vo: “Bonga mwan’a ngombe mu kuma kia lukau lwa sumu,+ meme dia koko mu kuma kia lukau lwa ngioka, e bulu yau yole ifwete kala yalunga, sunzula yo vana ndose a Yave.
3 Kansi, vovesa Aneyisaele vo: ‘Nubonga nkombo a koko mu kuma kia lukau lwa sumu, mwan’a ngombe yo mwan’a meme akoko, konso bulu kikala kia mvu mosi ye kialunga, mu kuma kia lukau lwa ngioka,
4 ngombe mosi a koko ye meme dimosi dia koko mu kuma kia yimenga ya ungudi,+ kimana nuakela yo vana ndose a Yave; lukau lwa mbwaza+ lwasangwa o mazi, kadi o unu Yave omoneka kwa yeno.’”+
5 Muna kuma kiaki, batwese vana mwelo a saba kia wananina e lekwa ina Mose kakanikini. I bosi, o nkangu awonso wizidi yo telama vana ndose a Yave.
6 Mose ovovele vo: “I wau wuwu kakanikini o Yave vo nuavanga, kimana o nkembo a Yave wamoneka kwa yeno.”+
7 Mose ovovese Arone vo: “Finama vana ziku, sunzula lukau lwaku lwa sumu+ yo lukau lwaku lwa ngioka yo lomba luyambulwilu lwa masumu mu kuma kiaku+ ye mu kuma kia nzo aku; i bosi, sunzula lukau lwa nkangu+ yo lomba luyambulwilu lwa masumu mu kuma kiau,+ wauna Yave kakanikina.”
8 Vana vau, Arone ofinamene vana ziku, ovondele mwan’a ngombe a lukau mu kuma kia masumu mandi.+
9 I bosi, o wan’a Arone basunzwidi o menga+ kwa Arone, ovubidi o nlembo andi muna menga yo sia mo muna mpoka za ziku. O menga masuvidi oyitidi mo vana sina dia ziku.+
10 Ofutumwini o mazi, e nguba ye mazi ma kimoyo* ma lukau lwa sumu vana ziku, wauna Yave kakanikina Mose.+
11 Vo i nsuni yo nkanda, oyokele wo vana tiya kuna mbazi a ndo.+
12 I bosi, Arone ovondele e bulu kia lukau lwa ngioka, o wan’andi bamvene o menga, ozazidi mo muna ndambu zawonso za ziku.+
13 Bamvene tini ya lukau lwa ngioka kumosi yo ntu, ofutumwini yo vana ziku.
14 Osukwidi mpe ndia ye malu yo futumuna mo vana ziku, vana ntandu a lukau lwa ngioka.
15 I bosi, osunzwidi lukau lwa nkangu, obongele nkombo a lukau mu kuma kia masumu ma nkangu, ovondele yo, otambikidi yo se lukau lwa sumu nze una kavangidi muna bulu kiantete.
16 Osunzwidi lukau lwa ngioka yo tambika lo wauna wasikidiswa.+
17 I bosi, osunzwidi lukau lwa mbwaza,+ ozadisi o koko kwandi ye ndambu a lukau lwalu yo futumuna lo vana ziku, vana ntandu a lukau lwa ngioka lwa mene.+
18 I bosi, Arone ovondele ngombe a koko ye meme dia koko dia kimenga kia ungudi mu kuma kia nkangu. O wan’andi bamvene o menga, ozazidi mo muna ndambu zawonso za ziku.+
19 Vo i tini ya mazi ma ngombe,+ nkil’a mazi wa meme dia koko, mazi mefukanga e lekwa yamu kati, e nguba yo mazi ma kimoyo,*+
20 basidi e tini yayi yawonso ya mazi vana tulu ya bulu, i bosi ofutumwini e tini ya mazi vana ziku.+
21 Kansi e tulu ye tó kialunene kia kulu, o Arone ozunganisi yo kuna ntwala y’oku nima se lukau lwa zunganisa vana ndose a Yave, wauna o Mose kakanikina.+
22 Vava kamene tambika lukau lwa sumu, lukau lwa ngioka ye yimenga ya ungudi, Arone olambwidi moko mandi kwa nkangu, ubasambwidi,+ okulumukini.
23 Kuna mfoko, Mose yo Arone bakotele muna saba kia wananina; i bosi, bavaikidi yo sambula o nkangu.+
Owau, o nkembo a Yave umonekene kwa nkangu awonso,+
24 o tiya tutukidi kwa Yave,+ tuyantikidi yoka lukau lwa ngioka ye tini ya mazi vana ziku. Vava o nkangu awonso umwene wo, bayantikidi kaza yo bokeka e ndose zau vana ntoto.+
