Zasoneka Luka 14:1-35
14 Lumbu kimosi vava kayenda muna nzo a mfumu mosi wa Afarisi muna Lumbu kia Vundu, kenda dia, bankondelele.
2 Vana kena vakedi muntu una ye kimbevo kia sulu.*
3 Yesu oyuvuidi alongi a Nsiku ye Afarisi vo: “Nga diansongi mu wuka muna Lumbu kia Vundu yovo ve?”+
4 Babutamene kwau. Umbongele, unwukidi yo kunsindika.
5 I bosi ubavovese vo: “Nani vovo nuina, olembi tombola mwan’andi yovo ngombe andi vana vau avo ikobokele mu sima+ muna Lumbu kia Vundu?”+
6 Ke balendele kumvana mvutu ko muna diambu diadi.
7 I bosi, vava kamwene awana babokeleso basolele e kunda yantete,+ ubatelele kingana. Ubazayisa vo:
8 “Avo obokeleso kwa muntu kuna nkinzi a longo, kuvuandi vana kunda kiantete ko.+ Dilenda kala vo muntu usundidi o zitu kabokelese.
9 I bosi, ndiona ubokelese okwiza yandi yo kuvovesa vo, ‘Sisila o muntu ndioyu e fulu.’ I bosi kuna nsoni zawonso okwenda vuanda vana fulu kiansuka.
10 Kansi avo obokeleso, wenda vuanda vana fulu kiansuka, kimana ona ubokelese, avo wizidi, kavova vo: ‘E nkundi, tomboka vana ntandu.’ Ozevo, ozitiswa kw’awonso bevuanda yaku vana meza.+
11 Kadi konso ona okuyitundidikanga, okululwa, konso ona okuyikululanga, otundidikwa.”+
12 Ovovele mpe kwa ndiona wambokelesa vo: “Avo olambisi e lambu yovo nlekelo, kubokelesa akundi aku ko, yovo mpangi zaku, yovo yitu yaku, ngatu mvuama za zunga kiaku. Kadi oyau mpe balenda kubokelesa, dikala se nsendo kwa ngeye.
13 Kansi avo olambisi e lambu, bokelesa asukami, avanguki, mbevo za malu ye mpofo;+
14 ozevo okala ye kiese, kadi oyau ke bena y’eki bàsenda ko. Kadi ongeye osendwa kuna lufuluku+ lwa ansongi.”
15 O mosi vana ven’awana bavuende yandi vana meza, vava kawidi wo, umvovese vo: “Kiese kwa ndiona odila* muna Kintinu kia Nzambi.”
16 Yesu umvovese vo: “Muntu mosi walambisa e lambu diampwena,+ obokelese wantu ayingi.
17 Muna ntangw’a nlekelo, otumini ntaudi andi kenda zayisa ana babokeleswa vo: ‘Nuiza, kadi yawonso ikubamene.’
18 Kansi yau awonso bavavidi vakuba.+ Ona wantete umvovese vo: ‘Mpatu nsumbidi, mfwete yo kwenda yo tala; undoloka, kilenda kwiza ko.’
19 Wankaka ovovele vo: ‘Ngombe kumi* nsumbidi, se ikwenda zo fimpa; undoloka, kilenda kwiza ko.’+
20 O wankaka ovovele vo: ‘Wau kwandi nkazalele, dianu vo kilenda kwiza ko.’
21 I bosi, o ntaudi wizidi samuna o mambu mama kwa mfumu andi. O mfumu a nzo ofungidi makasi, ovovese ntaudi andi vo: ‘Wenda nswalu muna nzila zampwena ye zakete za mbanza, wabokela asukami, avanguki, mpofo ye mbevo za malu.’
22 I bosi ntaudi ovovele vo: ‘E mfumu, mpangidi dina otumini, kansi e fulu yakinu.’
23 O mfumu ovovese ntaudi vo: ‘Wenda muna mpambu za nzila ye muna belo, dodokela wantu beza kota kimana e nzo ame yazala.+
24 Kadi inusamunuini vo, ke vena muntu ko vana vena awana babokelwa, oyeleka nlekelo ame.’”+
25 Ndong’ayingi yayendanga yandi, ovilukidi, ubavovese vo:
26 “Avo muntu ozolele kwiza oku ngina, kalembi menga* se diandi, ngudi, nkaz’andi, wan’andi, mpangi ye nsanga zandi, musungula moyo andi,+ kalendi kala nlongoki ame ko.+
27 Konso ona olembi nata o nti andi ampasi* yo kwiz’andandi, kalendi kala nlongoki ame ko.+
28 Kansi nani vovo nuina, avo ozolele tunga nzo yandá, kalembi teka vuanda, kabadika e ntalu mu zaya kana vo una ye nzimbu zafwana mu manisa yo?
29 Dilenda kala vo okuba e nkubilwa, kansi ke lenda yo manisa ko, ozevo awonso bemona yo, beyantika kunseva,
30 oku vo: ‘O muntu ndioyo oyantikidi o tunga, kansi kalendele manisa ko.’
31 Yovo nkia ntinu una ye 10.000 ma makesa, avo se kekwenda nuanisa ntinu akaka wina ye 20.000 ma makesa, kalembi teka vuanda, mu badika kana vo olenda kunsunda?
32 Avo omwene vo ke lenda ko, otuma wantu benda kanga e kangu dia luvuvamu ekolo ntinu ndioyo kena kwandá.
33 Diau dimosi, konso ona olembi yambula mavua mandi mawonso, kalendi kala nlongoki ame ko.+
34 “O mungwa wambote. Kansi, avo mungwa ukatukidi o nzenzo andi, mu nki uzenzeselwa?+
35 Ke ufwene diaka sadilwa ko, kana nkutu muna ntoto, ngatu sadilwa se mbole. O wantu veta bevetanga wo. Ndiona una ye matu mewanga, yambula kawá.”+
Mvovo vana yand'a lukaya
^ Kimbevo kivimbisanga e nitu mu kuma kia maza mayingi.
^ Mvovo wa sina: “odia mbolo.”
^ Mvovo wa sina: “vangu tanu ya ngombe.”
^ Yovo “kulula o zola muna.”
^ Tala Nsas’a Mvovo.
