Zasoneka Luka 15:1-32
15 Avakulwisi a mpaku ye asumuki awonso banzietele kimana banwá.+
2 Afarisi ye asoneki bayidimini, oku vo: “O muntu ndioyu otambulanga asumuki yo dia yau.”
3 Ubatelele kingana eki, oku vo:
4 “Nkia muntu vovo nuina, una ye 100 mameme, avo ovidisi dimosi, kalembi sisa 99 vana nzanza, kenda vavi dina divididi yavana kesolola dio?+
5 Vava kasolwele dio, osidi dio vana vembo ye kiese kiawonso.
6 Vava kalweke kuna nzo, obokele akundi andi, y’esi belo kiandi, ubavovese vo: ‘Nunkembesa, kadi e meme diame diavila, nsolwele dio.’+
7 Inuzayisi wo vo, kiese kiayingi mpe kikala kuna zulu mu kuma kia nsumuki mosi ovilukidi o ntima,+ ke mu 99 lwa wantu ansongi ko ana ke bena yo mfunu a luviluku lwa ntima ko.
8 “Yovo nkia nkento una ye drakima kumi,* avo ovidisi drakima mosi,* kalembi kwika mwinda yo komba e nzo andi, katoma vava yavana kesolola yo?
9 Vava kasolwele yo, obokele akundi andi,* y’esi belo kiandi, oku vo: ‘Nunkembesa, kadi e drakima* ina yavidisi, nsolwele yo.’
10 Inuzayisi wo vo, kiese kia mpila yayi kikala vana vena e mbasi za Nzambi mu kuma kia nsumuki mosi ovilukidi o ntima.”+
11 Ovovele diaka vo: “Muntu mosi wakala yo wana wole amakala.
12 Oyu wanleke ovovese se diandi vo: ‘E Tata, umpana e kunku kiame kina mfwete tambula muna mavua maku.’ Ubakayanisi mavua mandi.
13 Ke vavioka lumbu yayingi ko, oyu wanleke okutikidi lekwa yandi yawonso, wele kuna nsi yandá, i kûna kafwasidi mavua mandi muna zingu kia umpumbulu.*
14 Vava kamene fwasa yawonso, mukotele mvengele ampasi muna nsi yayina, osukamene.
15 Wele tatamena musi nsi yayina, ona wantuma muna mpatu andi, kenda vungula e ngulu.+
16 Wazola nkutu dia madia ma ngulu, kadi ke vakala muntu ko wankayilanga.
17 “Vava kayibenze, ovovele vo: ‘Asadi a se diame bena ye ulolo wa madia, ekolo mono ifwanga e nzala!
18 Yambula yatelama, ngienda kwa se diame, yamvovesa vo: “E Tata, nsumukini Nzambi kuna zulu, y’oku ndose aku.
19 Kifweno yikilwa diaka mwan’aku ko. Unkitula mosi muna asadi aku.”’
20 Otelamene, wele kwa se diandi. Ekolo kakedi kuna kwandá, o se diandi umwene, umfwididi e nkenda, wele ntinu, umbimbakene,* umfibidi.
21 O mwana umvovese vo: ‘E Tata, nsumukini Nzambi kuna zulu, y’oku ndose aku.+ Kifweno yikilwa diaka mwan’aku ko.’
22 Kansi o se ovovese ntaudi zandi vo: ‘Nuenda nswalu! Nutwasa mvuatu una usundidi, numvuika wo, nunsia e mpeto muna nlembo, ye nsampatu muna malu mandi.
23 Nutwasa mpe mwan’a ngombe amazi, nuamvonda, twadia yo kemba,
24 kadi o mwan’ame wafwa kakedi, owau wina diaka o moyo;+ wavila kakedi, owau osolokele.’ Bayantikidi kemba.
25 “O mwan’andi ambuta kuna mpatu kakedi, vava kavutukidi, ekolo kafinamenenge vana nzo, owidi nkunga ye makinu.
26 Obokele mosi muna asadi, oyuvuidi kana nkia diambu divangamanga.
27 Umvovese vo: ‘O nleke aku wizidi, o se diaku ovondele mwan’a ngombe amazi, kadi untambwidi yo vimpi wambote.’*
28 Ofungidi o makasi, kazolele kota mu nzo ko. I bosi, o se diandi ovaikidi, oyantikidi kundodokela.
29 Ovutwidi kwa se diandi vo: ‘Tala e mbidi a mvu ikusadilanga, kiakolamene nkutu nkanikinu aku ko, kansi mono kuvani kana nkutu mwan’a nkombo kimana twayangalala kumosi.
30 Kansi, wau kezidi kaka o mwan’aku ndioyo, ona wafwasa* mavua maku ye minta-zumba, umvondèle o mwan’a ngombe amazi.’
31 Umvovese vo: ‘E mwana, ongeye okalanga yame ntangwa zawonso, o vua kwame kwawonso i kwaku.
32 Dianu vo diambote twakemba kweto, twamon’e kiese, kadi o nleke aku wafwa kakedi, owau wina diaka o moyo; wavila kakedi, owau osolokele.’”
Mvovo vana yand'a lukaya
^ Yovo “akw’andi akento.”
^ Yovo “uzowa.”
^ Mvovo wa sina: “obimbakene nsingu andi.”
^ Yovo “wamoyo.”
^ Mvovo wa sina: “wadia.”
