Zasoneka Luka 8:1-56
-
Akento ana bakangalanga yo Yesu (1-3)
-
Kingana kia nkuni (4-8)
-
Ekuma Yesu kasadila yingana (9, 10)
-
Nsas’a kingana kia nkuni (11-15)
-
Mwinda ke ufukilwanga ko (16-18)
-
Ngudi ye mpangi za Yesu (19-21)
-
Yesu ovuvikidi e tembwa (22-25)
-
Yesu osindikidi nkuya muna ngulu (26-39)
-
Mwan’a Yairo; nkento osimbidi mvuatu a Yesu (40-56)
8 I bosi, wele kangala muna mbanza ye muna mavata, wele alonginge yo samuna e nsangu zambote za Kintinu kia Nzambi.+ Yau Kumi ye Zole bakedi yandi,
2 kumosi ye akento akaka ana bawukwa yimbevo yo vaikiswa mianda miambi: Maria ona wayikilwanga vo Mandala, ona wavaikiswa nkuya nsambwadi;
3 yo Yoana+ wa nkaz’a Kuza, wa selo kia Erodi, yo Susana, ye akento ayingi akaka mpe, ana babasadisanga muna mavua mau.+
4 E ndong’ayingi vava ilungalakene, y’awana batukidi muna mbanza zawonso bezidi oku kena, ubatelele kingana, oku vo:+
5 “O nkuni wele kuna e mbongo andi. Ekolo kakunininge, e mbongo yankaka ibwididi vana mbel’a nzila yo diatakeswa, idilu kwa nuni za zulu.+
6 Eyaka ibwididi vana vena matadi, vava imenene, izinini kadi o ntoto wayuma.+
7 Yankaka ibwididi vana vena e nsende, imenene kumosi ye nsende, e nsende zifinangese yo.+
8 Kansi, yankaka ibwididi vana ntoto ambote, imenene, iwutidi mbongo nkama-nkama.”+ Vava kamene vova mambu mama, ovovele mu nding’angolo vo: “Ndiona una ye matu mewanga, yambula kawá.”+
9 Kansi, alongoki andi banyuvuidi e nsas’a kingana kiaki.+
10 Ovovele vo: “Kwa yeno diavewa edi dia bakula e mbumb’avauka ya Kintinu kia Nzambi, kansi kuna kw’akaka muna yingana kaka,+ kimana kana una vo betala, balembi mona, kana una vo bewá, balembi bakula.+
11 Ozevo, i yau yiyi e nsas’a kingana: E mbongo i diambu dia Nzambi.+
12 E mbongo ibwididi vana mbel’a nzila, i awana bawidi, i bosi Nkadi ampemba wizidi yo katula e diambu muna ntima miau kimana balembi kwikila yo vuluzwa.+
13 E mbongo ibwididi vana vena matadi, i awana bena vo, vava bawidi e diambu, batambwidi dio kuna kiese, kansi ke imenene mianzi ko. Bakwikidi mu fikolo, kansi muna ntangw’a lutonto, babembwele lukwikilu.+
14 Ina ibwidi vana vena e nsende, i awana bawidi, kansi wau bafilakeso kwa ntelamw’a moyo, kimvuama+ yo mawete ma zingu kiaki,+ bafinangeso emvimba yo lembi zikuka.+
15 Ina ibwidi vana ntoto ambote, i awana bena vo, vava bawidi e diambu yo ntim’ambote,+ betatidilanga dio yo yima mbongo muna luzindalalu.+
16 “Ke vena muntu ko okwika mwinda, kafukila wo kinzu ngatu sia wo kuna nsi a mfulu, kansi vana fulu kiazanguka kaka, kimana awana bekota mo bamona o ntemo.+
17 Kadi ke vena diambu ko diaswekama dilembi zayakana, ngatu lekwa kiatoma swekama, kialembi moneka yo senzekwa.+
18 Dianu vo, nutoma tala e ngwa nuwa, kadi konso ona una ye lekwa, yayingi kevewa,+ kansi ndiona kena ye lekwa ko, kana nkutu kina keyindulanga vo una kiau, katulwa kikunkatulwa.”+
19 O ngudi andi ye mpangi zandi+ bezidi kwa yandi, kansi ke balendele lwaka vana kena ko mu kuma kia ndonga.+
20 Bamvovese vo: “O ngudi aku ye mpangi zaku kuna mbazi batelamene, bazolele kumona.”
21 Ubavutwidi vo: “O ngudi ame ye mpangi zame i yau awaya bewanga e diambu dia Nzambi yo sadila dio.”+
22 Lumbu kimosi, oyandi ye alongoki andi bakotele muna nzaza, ubavovese vo: “Tusauka kuna simu diankaka dia yanga.” Bele.+
23 Ekolo basaukidinge, obakamene kwa tulu. Tembwa kiangolo kizidi vana yanga, e nzaza iyantikidi zala ye maza, bamwene vo sumbula bena.+
24 Muna kuma kiaki, bezidi kunsikamesa, bavovele vo: “E Nlongi, e Nlongi, se tufwa!” Vava katelamene, otumbidi e tembwa ye mavuku, malembamene, vakedi e pi-i.+
25 I bosi, ubavovese vo: “Akweyi kwina o lukwikilu lweno?” Bamwene o wonga, basivikidi, bavovazianene vo: “Ondioyu ozevo nani? Kadi ovovese tembwa yo maza, manlemvokele.”+
26 Bele kuna zunga kia Angerasa+ kina mantalani ye Ngalili.
27 Vava Yesu katombokele vana kumu, wizidi kikwa kwa yakala dimosi, musi mbanza, wakala ye nkuya. Se vioka kolo kiayingi ke vuatanga nlele ko, ke kalanga mpe mu nzo ko, kuna ziami* kaka.+
28 Vava kamwene Yesu, okazidi, obwidi vana kena, ovovele muna nding’angolo, oku vo: “Nkia diambu ngina diau yo ngeye, e Yesu wa Mwan’a Nzambi a Mpungu-nene? Dodokolo diaku, kumbangika ko.”+
29 (Kadi Yesu wavovesa mwand’a usafu wavaika muna muntu. Nkumbu miayingi wambakanga,+ wakangwanga muna luvambu ye muna kû yo langidilwa, kansi odanunanga kangwa, yo natwa kwa nkuya muna makanga.)
30 O Yesu unyuvuidi vo: “Nkumbu aku nani?” Oyandi vo: “I mvengo,”* kadi nkuya miayingi miakota mu yandi.
31 E nkuya mindodokele vo kabasindiki mu mbilu ko.+
32 Vana mongo vakedi kambi diayingi dia ngulu diadianga,+ bandodokele vo kabayambula bakota muna ngulu. Ubayambwidi.+
33 I bosi, e nkuya mivaikidi muna muntu, mikotele muna ngulu, e kambi diyitubidi muna yanga, dinuini nkaki.
34 Awana badikidinge ngulu, vava bamwene edi divangamene, batinini, basamwini dio muna mbanza ye muna mavata.
35 O nkangu wizidi tala edi divangamene. Bezidi kwa Yesu, bamwene o muntu wavaikwa e nkuya, ovuete, o zayi wandi uvutukidi, ofongele vana ndambu a malu ma Yesu, bamwene o wonga.
36 Awana bamwene dio, babasamunuini e mpila kasasukidi o nkwa nkuya.
37 I bosi, ndong’ayingi itukidi muna zunga kia Ngeresa bandodokele kakatuka vana bena, kadi babakamene kwa wonga wayingi. I bosi, okotele muna nzaza, wele.
38 Kansi ndiona wavaikwa e nkuya, undodokele kenda yandi, Yesu unsindikidi, oku vo:+
39 “Vutuka kuna nzo aku, samuna dina Nzambi kavangidi kwa ngeye.” Dianu vo, wele yo samuna muna mbanza yawonso dina Yesu kavangidi kwa yandi.
40 O Yesu vava kavutukidi, e ndonga itomene kuntambula, kadi yau awonso yandi bavingidinge.+
41 Vezidi muntu mosi, e nkumbu andi Yairo; mbut’a sambilu kakala. Ofukamene vana malu ma Yesu, undodokele vo kenda kuna nzo andi,+
42 kadi o mwan’andi mosi kaka ankento, wa tezo kia mvu 12 se kefwa.
Ekolo Yesu kekwendanga, e ndonga imfinangese.
43 Vakedi nkento mosi wavaikwanga o menga+ se mvu 12, ke vakala muntu ko walenda kunsasula.+
44 Ofinamene kuna nima yo simba o nswiku a mvuatu andi,+ vana vau e mpaik’a menga ikakamene.
45 O Yesu ovovele vo: “Nani unsimbidi?” Yau awonso bavakwidi wo nkalu, o Petelo ovovele vo: “E Nlongi, ndonga izungidi yo kufinangesa.”+
46 O Yesu ovovele vo: “Muntu unsimbidi, kadi nzeye wo vo ngolo+ zimpaikidi.”
47 O nkento wau kamwene vo kalendele swekama ko, wizidi azakama yo fukama vana kena, ovovele vana ndose a wantu awonso e kuma kansimbidi ye una kasasukidi vana vau.
48 Ovovese nkento vo: “E mwana, o lukwikilu lwaku lusaswidi. Wendela kuna luvuvamu.”+
49 Ekolo kevovanga, vezidi muntu otukidi kuna nzo a mbut’a sambilu, ovovele vo: “O mwan’aku ankento ofwidi; kutokanesa diaka Nlongi ko.”+
50 O Yesu wau kawidi wo, umvutwidi vo: “Kumoni wonga ko, kwikila kaka, ovuluka kwandi.”+
51 Vava kalweke kuna nzo, kayambwidi muntu kakota yandi ko, nanga Petelo kaka, yo Yoane, yo Yakobo, yo se dia mwana, yo ngudi.
52 Kansi, wantu awonso badilanga yo yayana ye ntantu. Muna kuma kiaki, Yesu ovovele vo: “Nuyambula o dila,+ kadi kafwidi ko, leka kaka kalele.”+
53 Vava bawidi wo, bayantikidi kunseva kuna luvezo lwawonso, kadi bazeye wo vo ofwidi kikilu.
54 Osimbidi koko kwandi, umbokele: “E mwana, telama!”+
55 E fulumwinu*+ kiandi kivutukidi, vana vau otelamene,+ ubavovese vo bamvana ma kadia.
56 O se diandi yo ngudi andi basivikidi kikilu, kansi ubakanikini vo ke basamuna kwa muntu ko edi divangamene.+
Mvovo vana yand'a lukaya
^ Yovo “ziami ya luyindulu.”
^ Tala mvovo vana yand’a lukaya muna Matai 26:53.
^ Mvovo wa sina: “O mwand’andi.” Tala Nsas’a Mvovo.
