Luvaiku 38:1-31
38 Ovangidi ziku dia lukau lwa ngioka muna mabaya ma akasia. E ziku dikedi ye ndambu yá zafwanana, yinkoso* tanu muna lambuka, yinkoso tanu muna yalumuka ye yinkoso tatu muna zanguka.+
2 I bosi, ovangidi e mpoka yá mu kuma kia konko yá ya ziku. E mpoka ye ziku ikedi se lekwa kimosi. I bosi, e ziku olengele dio e nsongo.+
3 Ovangidi e sadilwa yawonso ya ziku, yinzu ya katulwila ntoto ampolo, pawu, pidi yanene, nsoma ye lekwa ya natina tiya. E sadilwa yawonso ya ziku ovangidi yo muna nsongo.
4 Ovangidi mpe yangilwa mu kuma kia ziku, yangilwa kia nsongo, kikedi kuna nsi a mvinda wazieta e ziku, vana kati-kati kwa ziku.
5 Ovangidi nlunga nyá muna konko yá, lukufi ye yangilwa kia nsongo, mûna muviokela e mbindi.
6 I bosi, ovangidi mbindi zole muna mabaya ma akasia, olengele zo nsongo.
7 Okotese e mbindi muna nlunga, muna mpati za ziku kimana zanatinuanga e ziku. Ovangidi e ziku nga nkela yakondwa fukwa ye sina.
8 Ovangidi longa diampwena dia nsongo+ ye vuandisilwa kiandi kia nsongo; ovangidi yo mu pelo* ya akento ana bakubikwa mu sadila vana mwelo a saba kia wananina.
9 I bosi, ovangidi yanzala.+ Kuna ndambu a sude a yanzala, osidi ko rido ya nsinga miasietwa mia lino yambote, yinkoso 100.+
10 Kukedi ye malunzi 20 ye telamesenua 20 ya nsongo. E vakikilwa muna malunzi ye yikakeselwa* yau ikedi ya palata.
11 Kuna ndambu a node mpe kukedi ye rido ya yinkoso 100. O malunzi mandi 20 ye telamesenua yandi 20 ya nsongo. E vakikilwa muna malunzi ye yikakeselwa* yandi ikedi ya palata.
12 Kansi kuna ndambu a weste kukedi rido mu kuma kia yinkoso 50. Kukedi ye malunzi kumi ye telamesenua kumi, e vakikilwa muna malunzi ye yikakeselwa* yandi ikedi ya palata.
13 O yalumuka kwa yanzala kuna ndambu a este, kuna kuvaikilanga e ntangwa, yinkoso 50.
14 Kuna koko kwalunene kwa mwelo a yanzala, kukedi rido ya yinkoso 15, malunzi tatu ye telamesenua tatu.
15 Kuna koko kwalumonso kwa mwelo a yanzala, kukedi rido ya yinkoso 15, malunzi tatu ye telamesenua tatu.
16 E rido yawonso muna kinzieta kia yanzala ikedi ya nsinga miasietwa mia lino yambote.
17 E telamesenua ya malunzi ikedi ya nsongo, e vakikilwa muna malunzi ye yikakeselwa* yandi ya palata, e ntandu za malunzi zalengwa e palata. Muna malunzi mawonso ma yanzala mukedi ye yikakeselwa ya palata.+
18 E rido a mwelo a yanzala yavangilwa muna nsinga mia bule, nsinga mia mika mia se kia nduwa, nsinga mia mbwaki akongola * ye nsinga miasietwa mia lino yambote. E rido ikedi ye yinkoso 20 muna lambuka, yinkoso 5 muna lá, o lá kwandi kwafwanana ye rido a yanzala.+
19 O malunzi mandi mau yá ye telamesenua yandi yau yá mu nsongo yavangilwa. E vakikilwa yandi ya palata, e ntandu za malunzi ye yikakeselwa* yandi yalengwa e palata.
20 E mpalu* zawonso za saba ye zina zazieta e yanzala za nsongo zakala.+
21 Olwalu i lutangu lwa lekwa yasadilwa muna tunga e saba, i sia vo, e saba kia Kimbangi.+ O lutangu lwalu lwavangilwa muna lutumu lwa Mose, e kiyekwa kiaki kiavewa kwa Anelevi,+ o Itama+ wa mwan’a Arone wa nganga yandi wakala se mfidi.
22 O Besalele+ wa kanda dia Yuda, wa mwan’a Uri, wa ntekolo a Kure, ovangidi mawonso Yave kakanikina kwa Mose.
23 Wakala kumosi yo Oliabe+ wa kanda dia Dani, wa mwan’a Akisamake, nkwa umbangu wa salu yamoko ya mpila zawonso, ntungi a fwaniswa muna mvuatu, ntungi a nlele muna nsinga miasietwa mia bule, nsinga mia mika mia se kia nduwa, nsinga mia mbwaki akongola* ye lino yambote.
24 O lutangu lwa wolo yawonso yasadilwa muna salu kiawonso kia fulu kiavauka lwafwanana yo lutangu lwa wolo ya lukau lwa zunganisa:+ talanta* 29 ye sekele* 730, mun’owu wa sekele ya fulu kiavauka.*
25 E palata yatwaswa kwa wantu basonekesa nkumbu zau, ikedi talanta 100 ye 1.775 dia sekele, mun’owu wa sekele ya fulu kiavauka.*
26 Konso mwan’ayakala, tuka mvu 20 yovo vioka ona wasonekwa e nkumbu, otwese e ndambu a sekele mun’owu wa sekele ya fulu kiavauka.*+ O lutangu lwa yau awonso lukedi 603.550.+
27 Muna vanga e telamesenua ya fulu kiavauka ye telamesenua ya rido,* talanta 100 zasadilwa; e telamesenua 100 i talanta 100, i sia vo, talanta mosi muna konso telamesenua.+
28 Muna 1.775 dia sekele, ovangidi vakikilwa mu kuma kia malunzi, olengel’e ntandu za malunzi yo yikanesa mo.
29 O lukau lwa nsongo* lukedi talanta 70 ye sekele 2.400.
30 Muna nsongo yayi wavanga telamesenua ya mwelo a saba kia wananina, ziku dia nsongo, yangilwa kia nsongo kia ziku, sadilwa yawonso ya ziku,
31 telamesenua ya kinzieta kia yanzala, telamesenua ya mwelo a yanzala, mpalu zawonso za saba ye mpalu zawonso+ za kinzieta kia yanzala.
Mvovo vana yand'a lukaya
^ I sia vo, pelo ya sengwa yatoma lengolwa.
^ Yovo “nlunga; vakikilwa,” muna yikakesela lekwa.
^ Yovo “nlunga; vakikilwa,” muna yikakesela lekwa.
^ Yovo “nlunga; vakikilwa,” muna yikakesela lekwa.
^ Yovo “nlunga; vakikilwa,” muna yikakesela lekwa.
^ Yovo “mbwaki-mbwaki.”
^ Yovo “nlunga; vakikilwa,” muna yikakesela lekwa.
^ I sia vo, nsonso.
^ Yovo “mbwaki-mbwaki.”
^ Yovo “mun’owu wa sekele yavauka.”
^ Yovo “mun’owu wa sekele yavauka.”
^ Yovo “mun’owu wa sekele yavauka.”
^ I sia vo, rido yavambulanga e Fulu Kisundidi o Vauka.
^ Yovo “lukau lwa zunganisa.”
