Luvaiku 8:1-32
8 Yave ovovese Mose vo: “Wenda kwa Faro, umvovesa vo: ‘I wau wuwu kavovele o Yave: “Sindika o nkangu ame kimana benda kunsadila.+
2 Avo okwamanene kubasimbinina, itumba e zunga kiaku kiawonso ye mazundu.+
3 E Nzadi a Nile izala ye mazundu, o mazundu metomboka yo kota muna nzo aku, muna suku diaku, vana mfulu aku, muna nzo a ntaudi zaku, muna nkangu aku, muna mafûlu ma mbolo ye niemenua ya mbumba mia mbolo.*+
4 E mazundu metomboka oku wina, kwa nkangu aku ye kwa ntaudi zaku zawonso.”’”
5 I bosi, Yave ovovese diaka Mose vo: “Vovesa Arone vo: ‘Lambula koko kwaku yo nkau aku muna nzadi, muna nsuku za Nile ye muna mayanga, watombola mazundu mu nsi ya Engipito.’”
6 Arone olambwidi o koko kwandi muna maza ma Engipito, e mazundu mayantikidi tomboka, mafukidi e nsi ya Engipito.
7 Kansi, e nganga za nkisi bavangidi diau dimosi muna yimpa yau ya mpandu, bavaikisi mpe mazundu muna nsi ya Engipito.+
8 Faro obokele Mose yo Arone, ovovele vo: “Nudodokela Yave kakatula mazundu oku ngina ye muna nkangu ame,+ kadi nzolele sindika o nkangu kimana bakelela Yave e kimenga.”
9 I bosi, Mose ovovese Faro vo: “Ivene lau, unzayisa e ntangwa mfwete dodokela Nzambi kimana e mazundu makatuka oku wina, muna ntaudi zaku, muna nkangu aku ye muna nzo zaku. Muna Nzadi a Nile kaka musala e mazundu.”
10 Muna diadi, Faro ovutwidi vo: “Mbazi.” O Mose ovovele vo: “Divangama mun’owu wa mvovo miaku, kimana wazaya wo vo ke vena muntu ko una nze Yave wa Nzambi eto.+
11 Mazundu mekatuka oku wina, muna nzo zaku, muna ntaudi zaku ye muna nkangu aku. Muna Nile kaka musala mazundu.”+
12 Mose yo Arone bakatukidi vana ntadisi a Faro, Mose ododokele Yave mu kuma kia mazundu mana katwasidi Faro.+
13 Yave ovangidi dina Mose kalombele, mazundu mayantikidi fwa muna nzo, muna yanzala ye muna yana.
14 Bakutikidi mo, mafuku ye mafuku, e nsi iyantikidi tá e nsudi.
15 Vava Faro kamwene vo ovevokele, obadisi o ntim’andi,+ kazolele kubawila ko, wauna o Yave kavova.
16 Owau, Yave ovovese Mose vo: “Vovesa Arone vo: ‘Lambul’o nkau aku yo wanda e mbundukutu a ntoto, yakituka se mbu omu nsi yawonso ya Engipito.’”
17 I diau bavangidi. Arone olambwidi o koko yo nkau andi, owende mbundukutu a ntoto, e mbu zizidi muna wantu ye bulu. E mbundukutu yawonso ya ntoto ikitukidi se mbu muna nsi yawonso ya Engipito.+
18 E nganga za nkisi zitezele vanga diau dimosi muna yimpa yau ya mpandu mu twasa e mbu,+ kansi ke balendele wo ko. E mbu zizidi muna wantu ye bulu.
19 Muna kuma kiaki, e nganga za nkisi zivovele kwa Faro vo: “Owau nlembo a Nzambi!”+ Kansi, Faro okwamanene badisa o ntim’andi, kabawididi ko, wauna o Yave kavova.
20 I bosi, Yave ovovese Mose vo: “Sikama muna mene-mene, watelama vana ndose a Faro. Vava kevaika kenda kuna nkoko, umvovesa vo: ‘I wau wuwu kavovele o Yave: “Sindika o nkangu ame kimana benda kunsadila.
21 Kansi, avo kusindika nkangu ame ko, itwika mbwanzi* kwa ngeye, kwa ntaudi zaku, kwa nkangu aku ye muna nzo zaku; e nzo za Engipito zizala ye mbwanzi, zifuka nkutu o ntoto bediatanga.*
22 Muna lumbu kiakina, itanina kieleka e nsi ya Ngosene, kuna kuzingilanga o nkangu ame. Ke kukala mbwanzi ko,+ muna diadi ozayila wo vo mono Yave, ngina omu nsi yayi.+
23 Iswaswanesa o nkangu ame yo nkangu aku. E sinsu kiaki mbazi kivangama.”’”
24 I wau kavangidi o Yave. Buka yanene ya mbwanzi iyantikidi kota muna nzo a Faro, muna nzo za ntaudi zandi ye muna nsi yawonso ya Engipito.+ E mbwanzi zifwasidi e nsi.+
25 I bosi, Faro obokele Mose yo Arone, ovovele vo: “Nuenda, nukelela Nzambi eno e kimenga omu nsi yayi.”
26 Kansi, Mose ovutwidi vo: “Ke diansongi ko mu vanga wo, kadi e kimenga tukelela Yave wa Nzambi eto kiangemi kwa esi Engipito.+ Nga ke bekututuba matadi ko avo tukelele kimenga kina vo kiangemi vana ndose au?
27 Nkangalu wa lumbu tatu tuvanga muna makanga, i kûna tukelela Yave wa Nzambi eto kimenga, wauna katuvovesa.”+
28 Faro ovovele vo: “Ikunusindika nuenda kelela Yave wa Nzambi eno e kimenga muna makanga. Kansi, ke nuendi kwandá ko. Nudodokela Nzambi mu kuma kiame.”+
29 I bosi, Mose ovovele vo: “Owau, ikatuka ova ndose aku, idodokela Yave. O mbazi, e mbwanzi zikatuka muna Faro, muna ntaudi zandi ye muna nkangu andi. Kansi, e Faro, kutuvuni* diaka ko muna lembi sindika nkangu benda kelela Yave e kimenga.”+
30 Mose okatukidi vana ndose a Faro yo dodokela Yave.+
31 Yave ovangidi mun’owu wa mvovo mia Mose, e mbwanzi zikatukidi muna Faro, muna ntaudi zandi ye muna nkangu andi. Ke vasidi kana mbwanzi mosi ko.
32 Kansi, Faro obadisi diaka o ntim’andi, kasindikidi nkangu ko.
Mvovo vana yand'a lukaya
^ Yovo “ye pidi.”
^ Mbwanzi zidenganga.
^ I sia vo, esi Engipito.
^ Yovo “kutusakanena.”
