Zasoneka Maku 2:1-28
2 Kansi, ke vavioka lumbu yayingi ko, okotele diaka muna Kafanau, e nsangu zimwangane vo muna nzo kena.+
2 E ndonga ilungalakene muna nzo yavana ke mukedi diaka fulu ko kana nkutu vana mwelo, i bosi oyantikidi kubasamunuina e diambu.+
3 Bantwasidi nkwa kimbevo kia vola, oneto kwa wantu yá.+
4 Kansi wau ke balendele kunlwakisa kwa Yesu ko mu kuma kia ndonga, bafukwidi o nludi a nzo vana kena o Yesu, bavuidi wo bangula, bakulumwini e kipoyo kina kilele mbevo a vola.
5 O Yesu vava kamwene lukwikilu lwau,+ ovovese mbevo a vola vo: “E mwana, masumu maku malolokelo.”+
6 Asoneki ankaka bakedi vana, bavovele muna ntima miau vo:+
7 “Ekuma muntu ndioyo kavovele mpila yayi? Otiangwini Nzambi. Nani olenda loloka masumu, avo ke mosi kaka ko, i sia vo Nzambi e?”+
8 Kansi, vana vau o Yesu wau kabakwidi vo i wau beyindulanga, ubavovese vo: “Ekuma nuyindulwilanga mambu mama muna ntima mieno?+
9 Adieyi diasazu mu vova kwa mbevo a vola: ‘O masumu maku malolokelo’ yovo, ‘Telama, bonga kipoyo kiaku yo diata’?
10 Kansi kimana nuazaya wo vo Mwan’a muntu+ ovuidi wisa kia loloka masumu ova nza—”+ ovovese mbevo a vola vo:
11 “Ivovese vo, Telama, bonga kipoyo kiaku, wenda kuna nzo aku.”
12 Otelamene, vana vau obongele kipoyo kiandi, odiete vana bena yau awonso. Awonso basivikidi, bakembelele Nzambi, oku vo: “Ke twamwene diambu dia mpila yayi ko.”+
13 Wele diaka vana ndambu a mbu, e ndonga yawonso inlende, ubalongele.
14 Una keviokanga, omwene Levi wa mwan’a Alefayo ovuende vana vevakulwilwanga e mpaku, umvovese vo: “Undanda.” Vana vau, otelamene, unlende.+
15 I bosi, wele dia muna nzo andi, avakulwisi a mpaku ayingi ye asumuki bezidi vuanda vamosi yo Yesu ye alongoki andi, kadi ndonga muna yau banlende.+
16 Kansi, asoneki a Afarisi wau bamwene vo vamosi kedilanga ye asumuki ye avakulwisi a mpaku, bavovese alongoki andi vo: “Kinga vamosi kedilanga ye avakulwisi a mpaku ye asumuki?”
17 Vava kawidi wo, Yesu ubavovese vo: “Awana bena yo vimpi ke bevuanga ngang’a mawuku mfunu ko, kansi ambevo bekumvuanga o mfunu. Kizidi bokela ansongi ko, kansi asumuki.”+
18 Alongoki a Yoane ye Afarisi fionkonona bafionkononanga.* Muna kuma kiaki, bezidi kunyuvula: “Ekuma alongoki a Yoane ye alongoki a Afarisi befionkonuenanga, kansi alongoki aku ke befionkononanga ko?”+
19 O Yesu ubavutwidi vo: “Akundi a toko diansompi+ ke bena ye kuma kia fionkonona* ko ekolo bena kumosi yo toko diansompi, nga ke wau ko e? Ekolo bena yo toko diansompi ke balendi fionkonona ko.
20 Kansi e lumbu ikwiza ina e toko diansompi kekatulwa vana bena,+ muna lumbu yayina befionkonona.*
21 Ke vena muntu ko olondanga e tenda kia nlele ampa muna mvuatu wankulu, avo ovangidi wo, o nlele ampa unana o mvuatu wankulu yo sakisa e vundu.+
22 Diau dimosi mpe, ke vena muntu ko osianga e vinyu ampa muna madila mankulu ma nkand’a bulu. Avo ovangidi wo, e vinyu ibukisa madila, e vinyu ifwasuka kumosi ye madila. Kansi, e vinyu ampa muna madila mampa ma nkand’a bulu isiwanga.”
23 Vava kaviokelenge muna mpatu za masa muna Lumbu kia Vundu, alongoki andi bayantikidi dokona e ntu mia masa.+
24 Muna diadi, Afarisi bamvovese vo: “Ekuma bevangilanga e diambu dina vo ke diansongi ko omu Lumbu kia Vundu?”
25 Ubavutwidi vo: “Nga ke nuatanga dio ko dina Davidi kavanga vava kakondwa madia yo fwa e nzala kumosi ye awana bakala yandi e?+
26 Nga ke nuatanga wo ko muna lusansu lwa Abiata+ wa mbut’anganga, una Davidi kakotela muna nzo a Nzambi yo dia e mbolo za lutambiku, zina ke zavaninua nswa kwa muntu ko mu dia zo, nanga vo anganga kaka,+ wavana mpe zankaka kw’awana bakala yandi?”
27 I bosi, ubavovese vo: “E Lumbu kia Vundu kiavangilwa mu kuma kia wantu,+ kansi o wantu ke bavangilwa mu kuma kia Lumbu kia Vundu ko.
28 I dianu vo, Mwan’a muntu i Mfumu a Lumbu kia Vundu.”+
