Malaki 2:1-17
2 “Owau, oyeno anganga, o nkanikinu wau kwa yeno uveno.+
2 Avo ke nuwá ko ngatu sia dio mu ntima, nuakembela nkumbu ame,” u kavovele o Yave a vu, “ikunutwasila sibu+ yo kitula nsambu zeno se sibu.+ Elo, yakitwidi kala e nsambu se sibu, kadi ke nusidi dio mu ntima ko.”
3 “Nutala, fwasa ifwasa* e mbongo ikuninu muna kuma kieno,+ ikusa mbole vana mpolo zeno, mbole za nkinzi mieno, nunatwa kuna ina.*
4 Nuzaya wo vo yanuvana nkanikinu wau, kimana e kangu diame yo Levi diasikila,”+ u kavovele Yave a vu.
5 “E kangu yakanga yandi, kangu diamoyo yo luvuvamu, dina yamvana kimana kakala yo vumi.* Elo, wampuminanga, wakala yo vumi muna nkumbu ame.
6 O nsiku* a ludi wakala muna nua andi,+ ke mwasoloka vilwa ko muna lubini lwandi. Wakangala yame muna luvuvamu ye unsongi,+ wafila wantu ayingi mu yambula e mbi.
7 Kadi, lubini lwa nganga lufwete lunda o zayi, o wantu bafwete vavila e nsiku* muna nu’andi,+ kadi yandi i ntumw’a Yave a vu.
8 “Kansi, yeno nuvengomokene muna nzila. Nutesese ayingi masakuba muna nsiku.*+ Nukulwidi e kangu dia Levi,”+ u kavovele o Yave a vu.
9 “Ozevo, iyambula vo nuavezwa yo kululwa vana ndose a nkangu wawonso, wau nulembele lemvokela e nzila zame, kansi nusianga mpambula muna sadila nsiku.”+
10 “Yeto awonso ka se dimosi ko watuwut’e?+ Ke Nzambi mosi ko watuvang’e? Ekuma tuyekolwelanga muntu ye nkwandi andi,+ yo kulula e kangu dia mase meto?
11 Yuda nyekodi, diambu diangemi divangamene muna Isaele ye Yerusaleme; kadi Yuda kazitisi Yave ko ona ozolanga mambu mavauka,*+ osompele mwan’ankento osambilanga nzambi a nzenza.+
12 Yave ovonda konso ndiona ovanga e diambu diadi muna saba ya Yakobo, kiakala nani,* kana nkutu ndiona otambika lukau kwa Yave a vu.”+
13 “Vena ye diambu diankaka nuvanganga, edi dizadisanga e ziku dia Yave ye mansanga, ye dilu ye bumu, i kuma vo ke sianga diaka sungididi muna lukau lweno ko ngatu tambula konso lekwa vana moko meno.+
14 Oyeno nuvovele vo: ‘Mu nkia kuma?’ Kadi o Yave i mbangi vovo una yo nkaz’a kileke kiaku, ona wabembola, kana una vo i nkwaku, wa nkaz’a kangu diaku.*+
15 Kansi vena yo muntu mosi walembi dio vanga, kadi wakala ye ndambu a mwand’avelel’a Nzambi. Adieyi kavavanga? Mbongo a Nzambi kavavanga. Muna diadi, nutoma keba mu kuma kia mwand’eno, ke nubembola akazi a kileke kieno ko.
16 Kadi o vonda longo i diau imenganga,”+ u kavovele o Yave wa Nzambi a Isaele ye “ndiona okuyivananga mu mavangu ma nsoki,”* u kavovele o Yave a vu. “Nuyikeba mu kuma kia mwanda eno, ke nukondwa kwikizi ko.+
17 “Nuyoyese Yave muna mvovo mieno.+ Kansi oyeno nuvovele vo: ‘Aweyi tunyoyesele?’ Wau nuvovele vo, ‘Konso ona ovanga mbi, diambote kwandi vana meso ma Yave, okunyangalela,’+ yovo wau nuvovele vo, ‘Akweyi kena Nzambi ona ovanganga unsongi?’”
Mvovo vana yand'a lukaya
^ Mvovo wa sina: “tumba itumba.”
^ I sia vo, kuna kwasiwanga e mbole a yimenga.
^ Yovo “zitu.”
^ Yovo “longi.”
^ Yovo “longi.”
^ Nanga, “muna longi dieno.”
^ Nanga, “nzo avauka.”
^ Mvovo wa sina: “ona osikamene ye ndiona ovutula.”
^ Yovo “nkento ndiona wasompa.”
^ Mvovo wa sina: “ndiona ofukidi mvuatu andi a nsoki.”
