Zasoneka Matai 26:1-75
-
Anganga bavuandidi Yesu e mfulu kimana bamvonda (1-5)
-
Yesu okusilu mazi mansunga (6-13)
-
Nduta yansuka yo yekolwa (14-25)
-
Nlekelo a Mfumu usikidisu (26-30)
-
Osakwidi vo Petelo okumvakulwila nkalu (31-35)
-
Yesu osambidi muna mpatu a Ngetesemane (36-46)
-
Yesu obakamene (47-56)
-
Ofundisu kuna Mbazi a Nkanu (57-68)
-
Petelo ovakulwidi Yesu o nkalu (69-75)
26 O Yesu vava kamene vova mambu mama mawonso, ovovese alongoki andi vo:
2 “Nuzeye wo vo lumbu yole kaka isidi, e Nduta iyantika,+ o Mwan’a muntu oyekolwa yo vondelwa vana nti.”+
3 Ozevo, mbuta za nganga ye akuluntu a nkangu balungalakene vana yanzala kia ngang’ambuta wakala ye nkumbu a Kayafa,+
4 bavuende mfulu+ kimana kuna ndekwa bakanga Yesu yo kumvonda.
5 Kansi, bavovele vo: “Ke muna kolo kia nkinzi ko, kimana valembi bwa mavuanga vana vena nkangu.”
6 Ekolo Yesu kakala kuna Betania muna nzo a Simone wa nkwa wazi,+
7 nkento mosi wizidi vana kakala ye mbwata* ya mazi mansunga mantalu, oyantikidi mo yitila vana ntu a Yesu ekolo kavuende vana meza.
8 Alongoki vava bamwene wo, bakendalele kikilu, bavovele vo: “Ekuma kefwasilanga o mazi mu mpila yayi?
9 Kadi malenda tekwa mu nzimbu zayingi yo vana zo kw’asukami.”
10 Yesu wau kazeye wo, ubavovese vo: “Ekuma nutokanesenanga o nkento? Diambote kavangidi kwa mono.
11 Kadi asukami nukala yau ntangwa zawonso,+ kansi omono ke nukala yame ntangwa zawonso ko.+
12 Vava kakusidi o mazi mama mansunga muna nitu ame, ovangidi wo muna kubika luziku lwame.+
13 Kieleka, inuvovese vo, konso kuna kusamunuinua e nsangu zazi zambote mu nza yawonso, e diambu kavangidi o nkento ndioyo disamunua mpe muna luyindulu lwandi.”+
14 I bosi, mosi vana vena yau Kumi ye Zole, nkumbu andi Yuda, wa musi Kereote,+ wele kwa nganga zambuta,+
15 ovovele vo: “Nki nukumpana avo inyekwele kwa yeno?”+ Bakanini kumvana sekele 30 za palata.+
16 Tuka muna kolo kiakina, wavavanga ntangw’ambote muna kunyekola.
17 Muna lumbu kiantete kia Mbolo Zakondwa Mfuna,+ alongoki bezidi kwa Yesu, banyuvuidi vo: “Akweyi ozolele vo twakubikila e lambu dia Nduta kimana wadia?”+
18 Ovovele vo: “Nuenda muna mbanza, kwa Nengandi, numvovesa vo, ‘O Nlongi ovovele vo: “E ntangw’ame yasikidiswa ifinamene; mu nzo aku idila e Nduta ye alongoki ame.”’”
19 Alongoki bavangidi una Yesu kabakanikini, bakubikidi e Nduta.
20 Muna nkokela,+ ovuende vana meza ye alongoki 12.+
21 Ekolo bedianga, ovovele vo: “Kieleka inuvovese vo, mosi vava nuina okungiekola.”+
22 Bakendalele kikilu muna diambu diadi, bayantikidi kunyuvula, konso muntu muna yau unyuvuidi vo: “E Mfumu, nga i mono e?”
23 Ovutwidi vo: “Ndiona osidi yame o koko muna longa, i yandi okungiekola.+
24 Kieleka, Mwan’a muntu se kekwenda kwandi, nze una wasonama mu kuma kiandi, kansi tâtu+ kwa ndiona oyekola o Mwan’a muntu!+ Diambote diadi kala, kele vo muntu ndioyo kawutuki ko.”+
25 Yuda ona okunyekola, oyuvuidi vo: “E Rabi,* nga i mono e?” Yesu umvutwidi vo: “Ngeye kibeni ovovele wo.”
26 Ekolo badianga, Yesu obongele e mbolo, vava kamene samba, obukunuini yo,+ ovene yo kwa alongoki, ovovele vo: “Nubonga nuadia. Eyayi nitu ame isunzulanga.”+
27 Obongele e mbungwa, ovutwidi matondo, ubavene yo, ovovele vo: “Nunua yo yeno awonso,+
28 kadi isunzulanga ‘menga mame+ ma kangu’+ mana mebunguka mu kuma kia wantu ayingi+ muna luloloko lwa masumu.+
29 Kansi inuvovese vo: Kinua diaka vinyu ko yamuna lumbu kina inua vinyu yampa yo yeno, muna Kintinu kia Se diame.”+
30 I bosi, vava bamene yimbila e nkunga, bele kuna Mongo a Olive.+
31 Yesu ubavovese vo: “Yeno awonso sakuba nuta mu kuma kia mana mekumbwila mu fuku wau, kadi diasonama vo: ‘Iwanda mvungudi, e kambi dia mameme dimwangana.’+
32 Kansi vava ifulwa, ikunuvita kuna Ngalili.”+
33 Petelo umvutwidi vo: “Kana nkutu awonso batel’e sakuba muna diambu diaku, omono kita nkutu sakuba ko!”+
34 Yesu umvutwidi vo: “Kieleka ivovese vo, mu fuku wau, vitila e nsusu yakokola, okumpanina o nkalu nkumbu tatu.”+
35 Petelo umvovese vo: “Kana nkutu divava vo yafwa yaku, kilendi kuvanina nkalu ko.”+ Alongoki awonso bavovele diau dimosi.
36 I bosi, Yesu wele yau vana fulu kina ye nkumbu vo Ngetesemane,+ ovovese alongoki vo: “Nuvuanda ovava ekolo ikwenda okuna, yasamba.”+
37 Onete Petelo ye wana wole a Zebedayo, omwene ntantu yo yangama o ntima.+
38 Ubavovese vo: “Moyo ame ukendalele kikilu yamu tezo kia fwa. Nukala vava, nuayingila yame.”+
39 Ovavukidi fiakete, obukikidi lose lwandi, osambidi, oku vo:+ “E Tata, avo dilendakana, yambula e mbungwa yayi+ yampioka. Kansi, ke una nzolele ko, una ozolele kaka.”+
40 Ovutukidi kwa alongoki, ubawene baleka kwau, vovese Petelo vo: “Nga ke nulendi yingila yame kana ola mosi ko e?+
41 Nuyingila+ yo kwamanana samba+ kimana nualembi bwa muna ntonta.+ Dialudi, o mwanda uzolele, kansi e nitu yatovoka.”+
42 Wele muna nkumbu yazole, osambidi vo: “E Tata, avo eyayi ke ilendi kumpioka ko lembi yo nua, yambula o luzolo lwaku lwavangama.”+
43 Wizidi diaka, ubawene baleka, kadi meso mau mazita ye tulu.
44 Ubasisidi, wele samba muna nkumbu a ntatu, ovovele diambu diau dimosi.
45 I bosi, ovutukidi kw’alongoki, ubavovese vo: “E ntangwa yayi nulele kweno yo vunda! E ntangwa keyekolwa o Mwan’a muntu vana moko ma asumuki ifinamene.
46 Nutelama, twenda. Ndiona okungiekola ofinamene.”
47 Ekolo kavovelenge, o Yuda, mosi vana vena yau Kumi ye Zole, wizidi ye ndong’ayingi, bena ye nsosolo ye bota, batuminu kwa mbuta za nganga ye akuluntu a nkangu.+
48 Ndiona wanyekola, wabavana e sinsu, oku vo: “Ndiona ifiba, i yandi ndiona; nunkanga.”
49 Wele kwa Yesu, ovovele vo: “Kiambote e Rabi!”* i bosi, umfibidi.
50 Kansi, Yesu umvovese vo: “E nkwame, nkia kuma winina ovava?”+ Bezidi, bakangidi Yesu, bele yandi.
51 Kansi, mosi mun’awana bakedi yo Yesu olambwidi o koko, ovolele nsosolo andi, ozengele kutu kwa ntaudi a ngang’ambuta.+
52 Yesu umvovese vo: “Vutula o nsosolo aku vana fulu kiandi,+ kadi awonso bebonga e nsosolo muna nsosolo befwila.+
53 Nga obenze vo kilendi dodokela Se diame ko mu ntangwa yayi kantwikila vioka mvengo* 12 mia mbasi e?+
54 Ozevo, aweyi ulunganena e Sono ivovanga vo mambu mafwete vangamena mu mpila yayi?”
55 Muna ntangwa yayina Yesu ovovese ndonga vo: “Nga nuizidi ye nsosolo ye bota mu kunkanga nze mwivi? E lumbu yawonso yakelenge muna tempelo yo longa,+ kansi yeno kenunkangi.+
56 Mawonso mama mavangamene kimana mana masoneka* angunza malungana.”+ I bosi, alongoki awonso bansisidi, batinini kwau.+
57 Awana bakangidi Yesu bànete kwa Kayafa+ wa ngang’ambuta, kuna kukutakene asoneki ye akuluntu.+
58 Kansi, Petelo unlende kuna vala yakuna yanzala kia ngang’ambuta. Vava kakotele, ovuende kumosi ye selo kimana kamona e mfoko a diambu.+
59 E mbuta za nganga ye Mbazi a Nkanu* yawonso bavavidi kimbangi kia luvunu mu kuma kia Yesu kimana bamvonda.+
60 Kansi ke basolwele kio ko, kana una vo mbangi zayingi za luvunu zayiza.+ I bosi, vezidi mbangi zole
61 bavovele vo: “O muntu ndioyo wavova vo: ‘Omono ndenda bangula tempelo a Nzambi yo tungulula yo mu lumbu tatu.’”+
62 Muna diadi, ngang’ambuta otelamene, umvovese vo: “Nga kuvutula diambu ko e? Adieyi ovovele mu kuma kia diambu bekumfundilanga o wantu awaya?”+
63 Kansi Yesu odingalele kwandi.+ Muna kuma kiaki, ngang’ambuta umvovese vo: “Idisisi e ndofi muna nkumbu a Nzambi amoyo, utuvovesa kana vo ngeye i Kristu wa Mwan’a Nzambi!”+
64 Yesu umvovese vo: “Ngeye kibeni ovovele wo. Kansi inuvovese vo: Tuka owau, numona Mwan’a muntu+ ovuende kuna koko kwalunene kwa nkuma+ yo kwiza muna matuti ma zulu.”+
65 O ngang’ambuta otiazwini e mvuatu miandi yo vova vo: “Otiangwini Nzambi! Nkia kimbangi diaka tuvuidi o mfunu? Yeno kibeni nuwidi o lutiangu lwandi.
66 Adieyi nubenze?” Bavutwidi vo: “Lufwa lumfwanukini.”+
67 I bosi bantaulwidi o mete vana lose,+ banwende nkome.+ Ankaka banwende mbata vana lose,+
68 banyuvuidi vo: “E Kristu, utusakulwila, nani uwende?”
69 Petelo vava kavuende vana mbazi, vana yanzala, ntaudi ankento wizidi kwa yandi, ovovele vo: “Ngeye mpe wakala yo Yesu wa Ngalili!”+
70 Kansi, ovakwidi wo nkalu vana bena yau awonso, oku vo: “Kizeye dio ko dina ovovele.”
71 Una kavaikidi vana vitu, ntaudi ankaka ankento umwene, ovovese ana bakedi vana, oku vo: “Ndioyo mpe kakala yo Yesu wa Nazarete.”+
72 Ovakwidi wo diaka nkalu yo dia e ndofi vo: “Kizeye kwame muntu ndioyo ko!”
73 Ke vavioka kolo ko, awana batelamene muna ndambu bezidi kwa Petelo, bamvovese vo: “Kieleka, ongeye mpe u mosi muna yau, kadi e mpov’aku ifundidi.”
74 I bosi, oyantikidi kuyisiba yo dia e ndofi, oku vo: “Kizeye kwame muntu ndioyo ko!” Vana vau e nsusu ikokwele.
75 Petelo osungamene e mvovo mia Yesu vo: “Vitila e nsusu yakokola, okumpanina nkalu nkumbu tatu.”+ Ovaikidi kuna mbazi, obokomokene ye dilu.
Mvovo vana yand'a lukaya
^ Mvovo wa sina: “mbwat’a alabasta.” Tala Nsas’a Mvovo. “Alabasta.”
^ Yovo “Nlongi.”
^ Yovo “Nlongi.”
^ O mvengo i buka kia makesa ma Roma kuna nz’ankulu, ovava o mvovo mvengo usadilu mu songa lutangu lukondelo e tezo.
^ Yovo “sono ya.”
^ Mvovo wa sina: “Sanedina.” Tala Nsas’a Mvovo.
