Zasoneka Matai 5:1-48
5 Vava kamwene ndonga, otombokele vana mongo, ofongele, alongoki andi bezidi kwa yandi.
2 I bosi, oyantikidi kubalonga, oku vo:
3 “Kiese kwa awana bazeye vo mambu ma Nzambi bavuidi o mfunu,*+ kadi e Kintinu kia zulu i kiau.
4 “Kiese kwa awana bena ye ntantu, kadi befiaulwiswa.+
5 “Kiese kwa alembami,+ kadi yau bevua e nza.+
6 “Kiese kwa awana bena ye nzala ye vuina+ dia unsongi, kadi beyukuta.+
7 “Kiese kwa akwa nkenda,+ kadi befwilwa e nkenda.
8 “Kiese kwa awana bavelela muna ntima,+ kadi bemona Nzambi.
9 “Kiese kwa avangi a luvuvamu,*+ kadi beyikilwa vo wan’a Nzambi.
10 “Kiese kwa awana bebangikwanga mu kuma kia unsongi,+ kadi e Kintinu kia zulu i kiau.
11 “Nukala ye kiese, avo wantu banuvezele+ yo kunubangika+ yo kunuyikila e mbi yawonso kuna luvunu mu kuma kiame.+
12 Numona kiese yo yangalala,+ kadi o nsendo eno+ wanene kuna zulu, kadi i wau babangikila angunza ana banuvita.+
13 “Yeno i mungw’a+ nza, kansi avo nzenzo a mungwa ufokokele, aweyi diaka uzenzeselwa? Ke una diaka mfunu ko, vetwa uvetwa kuna mbazi+ wadiatakeswa kwa wantu.
14 “Yeno i ntemo a nza.+ E mbanza ina vana mongo ke ilendi swekwa ko.
15 Vava wantu bekwikanga mwinda ke besianga wo ku nsi a mbangu* ko, kansi vana fulu kiazanguka kaka, kimana waminika awonso bena muna nzo.+
16 Diau dimosi mpe, yambula o ntemo eno watemena vana vena o wantu,+ kimana bamona mavangu meno mambote,+ bakembelela Se dieno una kuna zulu.+
17 “Ke nuyindula ko vo Nsiku yovo Angunza ngizidi fwasa. Kizidi fwasa ko, lunganesa ngizidi lunganesa.+
18 Kieleka inuvovese wo vo, e zulu ye nza dilenda vioka, kansi ke fisono fimosi ko yovo fisinsu fia sono muna Nsiku fivioka, yavana mambu mama mawonso melungana.+
19 Dianu vo, konso ona okulula nkanikinu usundidi o keva muna nkanikinu miami yo longa ankaka bavanga diau dimosi, oyikilwa vo kafwana ko muna Kintinu kia zulu. Kansi, konso ona olunda mio yo longa mio, yandi oyikilwa vo wafwana muna Kintinu kia zulu.
20 Kadi inuvovese wo vo, avo unsongi weno ke uviokele owu wa asoneki ye Afarisi ko,+ ke nukota muna Kintinu kia zulu ko.+
21 “Nuwidi dio dina diavovua kw’akulu vo: ‘Kuvondi ko,+ ona ovonda ofundiswa kuna mbazi a nkanu.’+
22 Kansi, omono inuvovese vo konso ona olundila mpangi andi makasi,+ kuna mbazi a nkanu kefundisilwa; ona oyikila mpangi andi muna mvovo mialuvezo, kuna Mbazi a Nkanu Anene kefundisilwa; ona ovova vo: ‘Ongeye u zowa!’ otubwa vana tiya twa Ngeena.*+
23 “Kansi, avo se tambika o lukau lwaku vana ziku,+ vana vau osungamene vo mpangi aku diambu kabakidi,
24 sisa o lukau lwaku vana ndambu a ziku. Wenda teka wizana yo mpangi aku, vava ovutuka, tambika lukau lwaku.+
25 “Singika-singika o mambu yo ntantu ufundidi kuna mbazi a nkanu ekolo una yandi muna nzila, kimana kalembi kuyekola kwa mfundisi, o mfundisi kayekola kwa nyingidi, wasiwa muna pelezo.+
26 Kieleka, ivovese vo, kuvaika mo nkutu ko yavana ofuta e mbiya yansuka.*
27 “Nuwidi dio dina diavovua vo: ‘Kute zumba ko.’+
28 Kansi, omono inuvovese vo konso ona otungununanga nkento+ yamu tezo kia kunlengokela o moyo, zumba katele yandi muna ntima.+
29 Avo disu diaku dialunene ditesese sakuba, dunguna dio yo veta dio.+ Kadi diambote kwa ngeye wavidisa kimosi muna yîkwa yaku ke mu nitu aku yawonso ko yatubwa kuna Ngeena.*+
30 Diau dimosi mpe, avo koko kwaku kwalunene kutesese sakuba, zenga ko yo veta ko.+ Kadi diambote kwa ngeye wavidisa kimosi muna yîkwa yaku ke mu nitu aku yawonso ko yatubwa kuna Ngeena.*+
31 “Diavovua diaka vo: ‘Konso yakala ovonda longo yo nkaz’andi, yambula kamvana nkanda wa vondela longo.’+
32 Kansi, omono inuvovese vo konso yakala ovonda o longo yo nkaz’andi avo ke mu kuma kia mavangu ma zumba* ko, unsidi mu vonza kia tá zumba; konso ona osompa nkento wavonda longo, zumba katele.+
33 “Nuwidi dio diaka dina diavovua kw’akulu vo: ‘Kudie ndofi a luvunu ko,+ ofwete lungisa e ndofi aku kuna kwa Yave.’+
34 Kansi, omono inuvovese vo: Ke nudie nkutu ndofi ko,+ kana ya zulu, kadi i kunda kia Nzambi;
35 ngatu ya ntoto, kadi i nsikinu’a tambi yandi;+ yovo ya Yerusaleme, kadi i mbanz’a Ntinu anene.+
36 Kudila ntu aku ndofi ko, kadi kulendi kitula kana lusuki lumosi ko se lwa mpembe yovo lwa ndombe.
37 Yambula e mpov’eno ‘Elo’ yakala elo, e ‘Ve’ dieno, ve,+ kadi konso dina dikulamene, kwa ndiona wambi ditukidi.+
38 “Nuwidi dio dina diavovua vo: ‘Disu mu disu ye dinu mu dinu.’+
39 Kansi, omono inuvovese vo: Kutelamena muntu ambi ko, konso ona okuwanda e mbata vana bundi dialunene, umvana diaka e bundi diankaka.+
40 Avo muntu ozolele kunata kuna mbazi a nkanu yo bonga e kinkutu kiaku, unyambula mpe kabonga e yunga kiaku;+
41 avo nkwa wisa ozolele vo wenda yandi kilometa* mosi, wenda yandi kilometa zole.
42 Vana kwa ndiona ulombele, kukangi moko ko kwa ndiona ozolele vo wansompeka.*+
43 “Nuwidi dio dina diavovua vo: ‘Ofwete zola o nkwaku+ yo menga o mbeni aku.’
44 Kansi, omono inuvovese vo: Nukwamanana zola e mbeni zeno+ yo samba mu kuma kia awana bekunubangikanga,+
45 kimana nuasonga vo nu wan’a Se dieno wina kuna zulu,+ kadi ovaikisanga e ntangw’andi vana vena wantu ambi yo wantu ambote yo nokesa e mvula vana vena wantu ansongi ye awana balembi songa.+
46 Kadi avo nuzolele kaka ana bekunuzolanga, nkia nsendo nuna wau?+ Nga ke diau dimosi ko bevanganga avakulwisi a mpaku e?
47 Avo nukayisi kaka mpangi zeno, nga diambu diampwena nuvangidi e? Ke diau dimosi mpe ko bevanganga esi zula yankaka?
48 Muna kuma kiaki, nukala nualunga nze una Se dieno kuna zulu kenena walunga.+
Mvovo vana yand'a lukaya
^ Mvovo wa sina: “Kiese kwa asukami muna mwanda.”
^ Yovo “akwa luvuvamu.”
^ Yovo “kitunga.”
^ Fuku diayokelwang’e titi kuna mbazi a mbanz’a Yerusaleme. Tala Nsas’a Mvovo.
^ Tala Nsas’a Mvovo.
^ Tala Nsas’a Mvovo.
^ Muna Kingerekia, por·nei′a. Tala Nsas’a Mvovo, “Mavangu ma Zumba.”
^ Mvovo wa sina: “mile.” Tala Nsas’a Mvovo.
^ I sia vo, sompeka lembi lomba nluta.
