Mavangu ma Zintumwa 1:1-26
1 E Teofilo, muna nsangu zantete, yasoneka mawonso Yesu kavanga yo longa+
2 yamuna lumbu kina kanatwa kuna zulu,+ vava kamana vana luludiku muna mwand’avelela kwa ntumwa zina kasola.+
3 Vava kavuidi mona e mpasi, wamoneka kwa yau muna sinsu yayingi muna songa e ziku vo una o moyo.+ Bamona mu lumbu 40, wabavovesa mambu ma Kintinu kia Nzambi.+
4 Vava kakutakana yau, ubakanikini vo: “Ke nuvaiki mu Yerusaleme ko,+ kansi nuvingila kaka dina o Se kasila o nsilu,+ dina nuawá kwa mono;
5 kadi Yoane wavubila muna maza, kansi ke vevioka lumbu yayingi ko oyeno nuvubilwa muna mwand’avelela.”+
6 Vava bakutakana, banyuvuidi vo: “E Mfumu, nga mu ntangwa yayi ovutula kintinu kwa Isaele?”+
7 Ubavutwidi vo: “E diambu dia zaya e ntangwa ye nsungi ina o Se kasia muna wisa kiandi, ke dinutadidi ko.+
8 Kansi oyeno, nutambula nkuma vava o mwand’avelela ukwiza omu yeno,+ nukala mbangi+ zame muna Yerusaleme,+ muna Yuda yawonso ye Samaria+ yakuna nsuk’a nza.”+
9 Vava kavovele mambu mama, oneto kuna zulu ekolo batalanga, e tuti dimfukidi, ke bamona diaka ko.+
10 Wau batadidingi kuna zulu ekolo katombokanga, vana vau wantu wole bamonekene vana bena, bavuata mvuatu miampembe,+
11 bavovele vo: “Esi Ngalili, ekuma nutelamene yo tala kuna zulu? Yesu ndioyo onetwe kuna zulu, wauna numwenene katombokele kuna zulu i una mpe kekwizila.”
12 I bosi, bakatukidi vana Mongo a Olive, bavutukidi kuna Yerusaleme,+ kadi ke yakala kwanda ko, tezo kia kilometa mosi kaka.*
13 Vava balweke, batombokele kuna seka dia ntandu, bakala kûna. Ana bakala mo i Petelo, Yoane, Yakobo, Andere, Filipo, Toma, Batolomai, Matai, Yakobo wa mwan’a Alefayo, Simone wa nkwa vema yo Yuda wa mwan’a Yakobo.+
14 Yau awonso bazindalala muna sambu ye kani dimosi, bakala mpe ye akento akaka+ yo Maria wa ngudi a Yesu ye mpangi zandi.+
15 Muna lumbu yayina, Petelo otelamene vana vakala ampangi (lutangu lwa wantu bakala mo tezo kia 120), ovovele vo:
16 “Ampangi, diavavanga vo e sono kialungana, kina kiasakulwa kwa Davidi muna mwand’avelela mu kuma kia Yuda,+ ona wakituka mfidi a awana babaka Yesu.+
17 Kadi mu buka kieto kakala,+ wasalanga mpe muna uselo wau.
18 (Muntu ndioyo, wasumba e mpatu muna mfutu a vilwa,+ wabwa yo vitisa o ntu vana ntoto, e vumu kiandi kiabûka, e ndia miandi miawonso mivaika.+
19 Ediadi diazayakana kwa nkangu wawonso wa Yerusaleme, dianu e mpatu yayina yayikilwa muna nding’au vo Akeledama, i sia vo, “Mpatu a Menga.”)
20 Kadi diasonama muna nkand’a Nkunga vo: ‘Yambula e fulu kiandi kia zingila kiasala e nkatu, kialembi zingila diaka muntu,’+ ‘Yambula e kinkengi kiandi kiabongwa kwa muntu ankaka.’+
21 Ozevo, diamfunu vo muna wantu ana bakangalanga yeto ekolo kiawonso Mfumu Yesu kasalanga e salu kiandi* vava tuna,
22 (tuka muna luvubu lwandi kwa Yoane+ yamuna lumbu kanatwa kuna zulu,)+ mosi muna wantu awaya kafwete kituka se mbangi a lufuluku lwandi kumosi yo yeto.”+
23 Dianu vo, basunzula awole, Matia yo Yosefe ona wayikilwanga vo Basaba, wayikilwanga mpe vo Yuseto.
24 I bosi, basambidi oku vo: “E Yave,* ngeye ozeye ntima mia wantu awonso,+ songa ndiona osolele muna wantu awaya yau awole,
25 kavinga vana fulu kia uselo wau ye kintumwa kina Yuda kabembola yo kwenda kuna fulu kiandi.”+
26 I bosi, babatelela nkas’a mienze,+ e nkas’a mienze ibwididi Matia, otangilu kumosi ye antumwa 11.
Mvovo vana yand'a lukaya
^ Mvovo wa sina: “nkangalu wa lumbu kia vundu.” I tini badiatanga Ayuda muna lumbu kia vundu.
^ Mvovo wa sina: “kakotanga yo vaika.”
