Mavangu ma Zintumwa 14:1-28
14 Muna Ikonio, bakotele kumosi muna sambilu dia Ayuda, wau vo batomene vova, ndong’ayingi ya Ayuda ye Mingerekia bakitukidi minkwikizi.
2 Kansi Ayuda ana ke bakwikila ko bakomekene esi zula kimana batelamena ampangi.+
3 Dianu vo, banangini ko kolo kiayingi, bavovele kuna unkabu muna nkum’a Yave,* ona osidi e diambu dia nsambu zandi o umbangi, wau kayambwidi e sinsu yo masivi mavangamena muna moko mau.+
4 Kansi, ndonga muna mbanza ivambanene; ankaka kuna sambu dia Ayuda, ankaka kuna sambu dia antumwa.
5 Vava esi zula ye Ayuda kumosi ye mfumu zau bazolele kubatianguna yo kubatubila matadi,+
6 bazayisu wo, batinini muna mbanz’a Lukaonia, Luseta, Delebe ye mavata makala lukufi.+
7 Bele samuninge nsangu zambote mwamuna.
8 Muna Luseta mwakala muntu, mbevo a malu. Koka kakala tuka kawutukila. Kasidi diata ko. Wafonga
9 yo wunikina Paulu ekolo kavovanga. Vava Paulu kantadidi yo mona vo wakala yo lukwikilu vo olenda wukwa,+
10 ovovele muna nding’angolo vo: “Telama.” Otelamene, oyantikidi diata.+
11 O nkangu vava bamwene dina Paulu kavangidi, bavovele muna Kilukaonia vo: “E nzambi zikulumukini kwa yeto nze wantu!”+
12 Bayikidi Banaba vo Zeuse, Paulu vo Ereme, kadi yandi wavitanga o ntu muna vova.
13 E tempelo ya Zeuse kuna fula dia mbanza yakala. O Ngang’a Zeuse otwese ngombe ye saki ya mvuma vana vitu dia mbanza, ozolele kela yimenga kumosi yo nkangu.
14 Kansi antumwa Banaba yo Paulu vava bawidi wo, batiazwini mvuatu miau, bakotele vana kati kwa nkangu, bavovele muna nding’angolo:
15 “Ekuma nuvangilanga mambu mama? Oyeto mpe tu wantu, tumonanga e mpasi zina lumonanga.+ Tunusamunuini nsangu zambote kimana lwayambula mambu mama makondwa o mfunu yo kwiza kwa Nzambi amoyo, ona wavanga e zulu ye ntoto, kalunga ye lekwa yawonso ina mo.+
16 Muna mbandu zavioka wayambula vo e zula yawonso yadiatila muna nzila zau,+
17 kanele vo kayambwidi kuyisila kimbangi ko+ wau kevanganga owete muna kunuvana e mvula zitukanga kuna zulu ye nsungi ziyimanga e mbongo,+ kunuyukutisa yo madia yo zadisa ntima mieno ye kiese.”+
18 Kana una vo bavovele mambu mama, diampasi diakala mu sima e ndonga balembi kubakelela yimenga.
19 Vezidi Ayuda batuka kuna Antiokia ye Ikonio, balebele ndonga,+ batubidi Paulu matadi, bankokele kuna mbazi a mbanza, edi babenze vo ofwidi.+
20 Kansi, vava alongoki banzungidi, otelamene yo kota muna mbanza. Muna lumbu kialanda, wele kuna Delebe yo Banaba.+
21 Vava bamana samuna e nsangu zambote muna mbanza yayina yo kitula wantu ayingi se alongoki, bavutukidi kuna Luseta, Ikonio ye Antiokia.
22 I kûna bakumikini alongoki yo kubakasakesa+ basikila muna lukwikilu, oku vo: “Mpasi zayingi tumona mu kota muna Kintinu kia Nzambi.”+
23 Batumbikidi akuluntu muna konso nkutakani,+ basambidi yo fionkonona,*+ babasunzwidi kwa Yave* ona bakwikidi.
24 I bosi, baviokele muna Pisidia yo lwaka muna Pamfulia,+
25 vava basamwini e diambu dia Nzambi muna Penga, bakulumukini kuna Atalia.
26 I kûna bakotele muna nzaza, bele kuna Antiokia, kuna batambulwila e nsambu za Nzambi muna salu kina balunganisa.+
27 Vava balweke, balungalakese e nkutakani, babazayisi mambu mayingi mana Nzambi kavangidi muna yau yo ziulwila esi zula e nzila kimana bakwikila.+
28 Banangini ko kolo kiayingi ye alongoki.
