Mavangu ma Zintumwa 18:1-28
18 Vava kiavioka mambu mama, Paulu okatukidi kuna Atenai, olweke muna Korinto.
2 Owene mo Nyuda mosi, nkumbu andi Akila,+ musi Ponto, ke kolo ko katuka kuna Italia yo nkento andi Peresekila, e kuma kadi Kelodio wakanikina vo Ayuda awonso bakatuka muna Roma. Wele kwa yau
3 wau vo salu kimosi basalanga, wakala muna nzo au yo sala yau kumosi,+ kadi nzo za ngoto batunganga.
4 Muna lumbu yawonso ya vundu walongelanga*+ muna sambilu+ yo kwikidisa Ayuda ye Mingerekia.
5 I bosi, vava Sila+ yo Timoteo+ bakulumuka tuka kuna Makedonia, Paulu oyantikidi kuyivana emvimba muna samuna diambu yo sila umbangi kwa Ayuda muna kubakwikidisa vo, Yesu i Kristu.+
6 Kansi, vava bakwamanana kunsia kitantu yo kuntianguna, okubwidi mvuatu miandi,+ oku vo: “Yambula menga meno makala muna ntu mieno.+ Mpelele kwame.+ Tuka owau, kwa esi zula ikwenda.”+
7 Okatukidi mo,* wele muna nzo a muntu mosi wavuminanga Nzambi, nkumbu andi Titiose Yuseto, e nzo andi vana ndambu a sambilu yakala.
8 Kansi, Keresepo+ wa mbut’a sambilu, okwikidi muna Mfumu, kumosi mpe ye esi nzo andi awonso. Esi Korinto ayingi ana bawidi e nsangu zambote bakwikidi yo vubwa.
9 Muna fuku, o Mfumu ovovese Paulu muna mona-meso vo: “Kumoni wonga ko, kwamanana vova, kudingalala ko,
10 kadi ngina yaku,+ ke vena muntu ko okubaka yo kuvanga e mpasi; kadi wantu ayingi ngina yau mu mbanza yayi.”
11 Muna kuma kiaki, okedi mo mvu mosi ye ngonde sambanu, walonganga e diambu dia Nzambi vana bena.
12 Ekolo Ngalio kakala nguvulu a Akaya, Ayuda batelamene Paulu, banète vana kunda kia lufundisu,
13 bavovele vo: “Muntu ndioyu nkangu kevukumunanga kimana basambila Nzambi mu mpila ke ina ngwizani ko yo nsiku.”
14 Kansi, vava Paulu kazola vova, Ngalio ovovese Ayuda vo: “Kala vo mbi kikilu kavangidi yovo nkanu ampwena kavolele, nga wá yadi kunuwá kuna luzindalalu.
15 Kansi wau vo mu kuma kia mvovo, nkumbu yo nsiku eno+ nufilanenanga e mpaka, yeno kibeni nusingika diambu diadi. Kizolele kala mfundisi a mambu mama ko.”
16 Muna kuma kiaki, ubayingidi vana kunda kia lufundisu.
17 Yau awonso babakidi Sosetene+ wa mbut’a sambilu, bayantikidi kunwandila vana kunda kia lufundisu. Kansi o Ngalio kazola kuyisia nkutu muna mambu mama ko.
18 O Paulu vava kakedi ko lumbu yayingi, okanini ampangi, okotele muna nzaza, wele kuna Suria kumosi yo Peresekila yo Akila. Muna Kenkerea, ozengele nsuki zandi,+ kadi ndofi kadia.
19 Vava balweke muna Efeso, ubasisidi kuna; kansi yandi okotele muna sambilu omokene ye Ayuda.+
20 Kana una vo bandodokele kakala yau mu kolo kiayingi, kazolele ko,
21 ubakanìni yo vova vo: “Se yavutuka diaka kwa yeno, avo Yave* ozolele wo.” Tuka kuna Efeso okotele muna nzaza,
22 okulumukini kuna Kaisaria. Otombokele,* kimana kamonana ye nkutakani, i bosi okulumukini kuna Antiokia.+
23 Vava kakedi ko mu fikolo, okatukidi, oviokele muna fulu yayingi ya zunga kia Ngalatia ye Ferungia,+ okumikini alongoki awonso.+
24 Nyuda mosi olweke muna Efeso, nkumbu andi Apolo,+ musi Alesanderia; mpovi ambote kakala ye watoma zaya e Sono.
25 Walongwa muna nzil’a Yave,* nkwa vema muna lusadisu lua mwanda, wavovanga yo longa una ufwene o mambu matadidi Yesu, kansi mvub’a Yoane kaka kazaya.
26 Oyantikidi vova muna sambilu kuna unkabu, vava Peresekila yo Akila+ banwidi, bambokele, batomene kunsasila e nzil’a Nzambi.
27 Wau vo kuna Akaya kazola kwenda, ampangi basonekène alongoki, babakasakese batoma kuntambula. Vava kalwaka ko, watoma sadisa awana bakituka minkwikizi muna nsambu za Nzambi;
28 kadi kuna unkabu wawonso, wasonga e ziku vana meso ma ndonga vo Ayuda vilwa bakala wau yo kubasonga muna Sono vo Yesu i Kristu.+
Mvovo vana yand'a lukaya
^ Yovo “wamokenanga yau.”
^ I sia vo, muna sambilu.
^ Nanga kuna Yerusaleme.
