Mavangu ma Zintumwa 19:1-41
19 Ekolo Apolo kakala muna Korinto,+ Paulu oviokele muna kati kwa zunga ya Asia yo kulumuka kuna Efeso.+ Okwakuna, owanane ye alongoki akaka,
2 ubayuvuidi vo: “Nga mwand’avelela nuatambula vava nuakituka minkwikizi e?”+ Bamvutwidi vo: “Ke twawidi wo nkutu ko vo vena yo mwand’avelela.”
3 Ovovele vo: “Ozevo, mu nki nuavubilwa?” Bavutwidi vo: “Muna mvub’a Yoane.”+
4 Paulu ovovele vo: “E mvub’a Yoane i sinsu kia luviluku lwa ntima,+ wavovesanga o wantu vo bakwikila muna ndiona okwiza nlandi,+ i sia vo, muna Yesu.”
5 Vava bawidi wo, bavubilu muna nkumbu a Mfumu Yesu.
6 Vava Paulu kabatensekele o moko, batambwidi mwand’avelela,+ bayantikidi vovela muna ndinga za kinzenza yo sakula.+
7 Yau awonso, tezo kia akala 12 bakala.
8 Muna ngonde tatu, wayendanga muna sambilu,+ wavovelanga kuna unkabu yo longa yo kwikidisa wantu mambu ma Kintinu kia Nzambi.+
9 Kansi, akaka wau babadisa e ntima yo lembi kwikila yo tianguna Nzila+ vana meso ma ndonga, Paulu wakatuka vana bakala,+ wavambula alongoki; lumbu yawonso walonganga muna seka dia sikola ya Turano.
10 Wavanga wo mu mvu miole, awonso bakala muna mvivu a Asia bawidi e diambu dia Mfumu, Ayuda ye Mingerekia.
11 O Nzambi wakwamanana vangila mavangu ma nkuma muna moko ma Paulu,+
12 kana nkutu mvuatu miandi ye nlele miandi mia salu vava mianatwanga kwa mbevo,+ e mbevo zasasukanga, e mianda miambi mpe miavaikanga.+
13 Kansi Ayuda akaka ana bayenda kangadingi mu vaikisa e nkuya, bateza mpe sadila e nkumbu a Mfumu Yesu kw’awana bakala ye mianda miambi; bavovanga vo: “Inukanikini muna nkumbu a Yesu ona Paulu kelonganga.”+
14 O wana nsambwadi a Sekeva wa mbut’anganga wa Nyuda, yau bavanganga wo.
15 Kansi, o mwand’ambi wabavutula vo: “Yesu inzeye,+ o Paulu mpe inzeye;+ kansi oyeno nu aki nani e?”
16 Muna kuma kiaki, o muntu ona wakala ye mwand’ambi ubayilamene, ubasundidi e ngolo, batinini muna nzo yayina ye nkonga ye mputa zau.
17 Diambu diadi diazayakana kw’awonso, Ayuda ye Mingerekia ana bazingilanga muna Efeso; awonso bamona wonga, e nkumbu a Mfumu Yesu yakembelelwanga.
18 Ayingi mun’awana bakituka minkwikizi bezidi funguna yo samuna mavangu mau.
19 Ndonga mun’awana basadilanga e mpandu batwese nkanda miau, bayokele mio vana meso ma wantu awonso.+ Batangidi e ntalu miafwa, 50.000 ma sekele za palata.
20 E diambu dia Yave* diakwamanana wokela yo sikila.+
21 Mambu mama vava mavangama, Paulu okanini muna ntim’andi vo vava keviokela muna Makedonia+ ye Akaya, kuna Yerusaleme mpe kekwenda.+ Ovovele vo: “Vava ikwenda ko, mfwete kwenda mpe kuna Roma.”+
22 Dianu vo, otumini kuna Makedonia nwole mun’awana bansadisanga, Timoteo+ ye Eraseto,+ kansi yandi kibeni osidi mu fikolo muna mvivu wa Asia.
23 Muna kolo kiaki mpe, mubundumukini mvuanga yangolo+ mu kuma kia Nzila.+
24 Kadi muntu mosi, nkumbu andi Demeterio, wa mvangi a lekwa ya palata, ona wavanganga tempelo zakete za palata za Atemi, nluta miayingi katwasilanga akwa umbangu.+
25 Okutakese akwandi ye ankaka basalanga e salu kiaki, ovovele vo: “Akundi, nutomene wo zaya vo kimvuama kieto mu salu kiaki kitukanga.
26 Numwene yo wá wo vo, ke muna Efeso kaka ko,+ kansi muna zunga yawonso ifinamene mvivu wa Asia, e mpila Paulu kekwikidisilanga ndonga yo kubasoba e ngindu, wau kevovanga vo e nzambi zavangilwa muna moko ke nzambi zakieleka ko.+
27 E vonza ke kina kaka muna salu kieto ko kadi kivezwa, kansi kina mpe muna tempelo ya Atemi wa nzambi ankento anene, kadi ibadikilwa se yakondwa o mfunu, e tunda dia ndiona osambilwanga muna mvivu wawonso wa Asia ye nza yawonso, dividiswa.”
28 Vava bawidi wo, bafungidi kikilu makasi, bavovele muna nding’angolo vo: “Wanene Atemi a Efeso!”
29 E mbanza izele ye mavuanga, bele kumosi kuna yanzala kia yimpa, babakidi Ngayo yo Aresetako,+ esi Makedonia ana bakangalanga yo Paulu.
30 Muna diadi, Paulu wazola kota vana vakala nkangu, kansi alongoki ke banyambula ko.
31 Kana nkutu akaka muna akubiki a nkinzi ye nsaka, ana bakala yandi kikundi, bantwikidi e nsangu yo kundodokela kalembi kuyisia mu vonza kia kota vana yanzala kia yimpa.
32 Ozevo, mavuanga makota vana vena o nkangu: Awaya bakazìdi diambu diankaka, awana diambu diankaka; kadi ayingi muna yau ke bazaya ko e kuma bakutakanena.
33 Dianu vo, bavaikisi Alesandero vana vakala nkangu, Ayuda banungwini kuna ntwala, Alesandero olambwidi koko, ozolele kuyitanina vana vena nkangu.
34 Kansi vava babakwidi vo Nyuda, awonso bakazidi kumosi mu tezo kia ola zole, oku vo: “Wanene Atemi a Efeso!”
35 I bosi, o mfumu a mbanza vava kalembekele o nkangu, ovovele vo: “Esi Efeso, nkia muntu vava twina olembele zaya vo e mbanz’a Efeso yau ilundanga tempelo ya Atemi wanene ye teke kiasotoka kuna zulu?
36 Wau vo e mambu mama ke malendi fidiswa mpaka ko, nuvuvama, ke nuvangi diambu dia uzowa ko.
37 Kadi wantu awaya nutwese ovava, ke bayiyidi tempelo ko ngatu tianguna nzambi eto ankento.
38 Dianu vo, Demeterio+ ye akwa umbangu avo muntu babakidi diambu, e mbazi a nkanu ina, e nguvulu mpe zina; yambula bafundana.
39 Kansi, avo diambu diankaka nuvavanga, difwete bakilwa e nzengo muna lukutakanu lwa nkangu luna lwavaninua nswa kwa ayadi.
40 Kadi mu vonza kikilu twina kia fundwa mu kuma kia nkindu ibwidi o unu, wau vo ke vena ye kuma ko tulenda songa muna mvuanga yayi.”
41 Vava kavovele mambu mama, osindikidi e ndonga.
