Mavangu ma Zintumwa 20:1-38
20 Vava nkindu yafokoka, Paulu otumisi alongoki, una kabakasakese yo kubakanina, osimbidi e nzila, wele kuna Makedonia.
2 Una kaviokele muna zunga ya mbanza yayi yo vovesa mambu mayingi ma lukasakeso kwa awana bena mo, olweke kuna Ngerekia.
3 Okedi ko ngonde tatu, kansi mu kuma kia mfulu bamvuandidi Ayuda muna kumvonda+ vava kazola baka e nzaza kenda kuna Suria, okanini muna ntim’andi vo kavutukila muna nzil’a Makedonia.
4 Wakala entwadi yo Sopate wa mwan’a Puro wa musi Beroya, Aresetako+ yo Sekundo, akwa Tesalonika, Ngayo wa musi Delebe, Timoteo,+ Tikiko+ yo Terofimo+ akwa mvivu wa Asia.
5 Wantu awaya bavita kuna ntwala yo kutuvingila kuna Teroa;
6 kansi vava vavioka e lumbu ya Mbolo Zakondwa Mfuna,+ kuna Filipi twakota muna nzaza, muna lumbu tanu twalwaka muna Teroa kuna bakala, tukedi ko lumbu nsambwadi.
7 Muna lumbu kiantete kia lumingu, vava twakutakana kimana twadia, Paulu oyantikidi mokena yau, kadi muna lumbu kilanda kekwenda; olambwidi e longi diandi yamuna dingi-dingi.
8 Minda miayingi miakala muna suku dia ntandu dina twakutakenena.
9 Toko dimosi diavuanda vana zianela, nkumbu andi Yutoko, olele tulu twangolo ekolo Paulu kavovelenge. Kuna nsi a tulu, osotokele tuka vana banga kiatatu yo wanuka wafwa.
10 Kansi, Paulu okulumukini, unyenzamene, umbimbakene,+ ovovele vo: “Nuyambula yayana, kadi una o moyo.”+
11 I bosi, Paulu otombokele, obukwini mbolo yo dia. Okwamanene mokena mu kolo kiayingi yavana kuma kwakiá, i bosi wele kwandi.
12 Banete e toko wamoyo, bafiaulwisu kikilu.
13 Vo i yeto twele aviti mu baka e nzaza, twele kuna Aso, i kuna twakana wananena yo Paulu, wauna kateka kutukanikina, kadi kiamalu kazola kwendela.
14 Dianu vo, vava kawanana yeto kuna Aso, okotele muna nzaza eto, twele kuna Mitulene.
15 Muna lumbu kialanda, vava twakatuka ko tulweke vana sanga kia Kio, kansi muna lumbu kialanda, tuvundidi vana sanga kia Samo ye muna lumbu kialanda tulueke kuna Miletu.
16 Paulu vana ndambu a Efeso kazola viokela+ kimana kalembi lutisa ntangwa yayingi muna mvivu a Asia, kadi wazola vo kalwaka mu nzaki kuna Yerusaleme+ muna lumbu kia Nkinzi a Pentikosti.
17 Kansi, tuka kuna Miletu otumini nsangu kuna Efeso, obokelese akuluntu a nkutakani.
18 Vava bayiza kwa yandi, ubavovese vo: “Yeno kibeni nutomene zaya una yakadila yeno tuka muna lumbu kiantete yalwaka mwamu mvivu a Asia,+
19 yasadilanga Mfumu kuna lulembamu lwawonso,*+ muna mansanga ye mpasi zina zandwakila mu kuma kia makani mambi ma Ayuda,
20 kuna diaka e sambu, kiayambula kunusamunuina konso diambu diamfunu* ko yo kunulongela muna fulu ya ndonga+ ye muna nzo ye nzo.+
21 Kansi, yatoma sila umbangi kwa Ayuda ye Mingerekia bavilukwa e ntima,+ bavutuka kwa Nzambi yo lukwikilu muna Mfumu eto Yesu.+
22 Owau, o mwanda umfididi ngienda kuna Yerusaleme, kana una vo kizeye ko mana mekumbwila kwakuna,
23 kansi, edi nzeye kaka vo muna konso mbanza, o mwand’avelela ukunsilanga umbangi vo pelezo ye mpasi zikumvingilanga.+
24 Dianu vo, kibadikilanga moyo ame ko vo usundidi o mfunu kwa mono, kansi yamanisa kaka e nkul’ame+ ye salu kina yatambula kwa Mfumu Yesu, yasila e nsangu zambote za nsambu za Nzambi umbangi una ufwene.
25 “Owau nzeye wo vo yeno awonso yasamunuina e nsangu za Kintinu ke numona diaka ndose ame ko.
26 Muna kuma kiaki, oyeno nu mbangi zame o unu, mpelele muna menga ma wantu awonso,+
27 kadi kiakala yo lukatikisu ko lwa kunusamunuina lukanu lwawonso lwa Nzambi.+
28 Nutoma kuyilunga-lunga+ ye kambi diawonso dina nuasilwa ukengi kwa mwand’avelela,+ kimana nuavungula e nkutakani a Nzambi,+ ina kasumbila muna menga ma Mwan’andi.+
29 Nzeye wo vo vava ikwenda mevua mansita mekota vana kati kweno+ yo bangika e kambi,
30 vovo nuina yeno kibeni mpe vevaika wantu bevova mambu mabendomoka muna tunta alongoki benda balandi.+
31 “Dianu vo, nuyingila, nusungamena vo muna mvu ntatu,+ fuku yo mwini, kisidi yambula kunuwondelela ko kuna kinsanga.
32 Yambula o Nzambi ye diambu dia nkenda zandi dianutanina yo kunuvana e vua vana vena aveledi awonso.+
33 Kialokokela palata ko, wolo ngatu mvuatu angani.+
34 Yeno kibeni nutomene wo zaya vo isalanga muna lungisa e nsatu zame+ ye za awana bekalanga yame.
35 Muna mambu mawonso yakunusonga vo muna salanga ye fululu kia mpila yayi+ i nufwete sadisila awana batovokele yo sungamena mvovo mia Mfumu Yesu vava kavova yandi kibeni vo: ‘E diambu disundidi e kiese i vana,+ ke mu tambula ko.’”
36 Vava kamana vova mambu mama, ofukamene kumosi yo yau, osambidi.
37 Yau awonso babokomokene ye dilu, babimbakene Paulu* ye kumfiba,
38 kadi ntantu zayingi bamwene muna mvovo mina kabavovese vo wau kekwenda ke bemona diaka ndose andi ko.+ I bosi, bele kumfila muna nzaza.
Mvovo vana yand'a lukaya
^ Yovo “muna lusakalalu lwa ntima.”
^ Yovo “muna wete dieno.”
^ Mvovo wa sina: “babimbakene Paulu muna nsingu.”
