Mavangu ma Zintumwa 26:1-32
26 Angeripa+ ovovese Paulu vo: “Oveno nswa kimana wakivovela.” I bosi, Paulu olambwidi koko, ovovele vo:
2 “E Ntinu Angeripa, o unu ngina ye kiese kia kuyivovela ova ndose aku muna mambu mawonso yafundilu kwa Ayuda,+
3 musungula wau otomene zaya e fu ye mawonso mana Ayuda befilanenanga e mpaka. Dianu idodokele vo kala ye luzindalalu muna kungwa.
4 “Kieleka, tuka kileke kiame, e mpila zingu kiame vana vena nkangu ame* ye muna Yerusaleme, kitomene zayakana kwa Ayuda awonso,+
5 ana banzeye tuka kolo, avo bazolele sia kimbangi, bazeye wo vo Mfarisi yakala,+ yatoma landanga malongi ma nsambila eto.+
6 Kansi owau, ifundiswanga mu kuma kia vuvu kiame muna nsilu una Nzambi kasila mase meto;+
7 e ndungan’a nsilu wau, i yau mpe bevingilanga makanda meto 12, wau bekunsadilanga e salu kiavauka, fuku ye mwini. E Ntinu, muna vuvu kiaki i mfundilu kwa Ayuda.+
8 “Ekuma numwenanga vo diampasi mu kwikila vo Nzambi ofulanga mafwa?
9 Mono kibeni yamona vo mfwete vanga mawonso mu telamena e nkumbu a Yesu, wa musi Nazarete.
10 I wau yavanga muna Yerusaleme, aveledi ayingi yasia muna pelezo,+ wau yatambula e wisa kwa nganga zambuta;+ vava diavavanga vo bavondwa, yatambulwilanga wo.
11 Nkumbu miayingi yabawandanga muna masambilu mawonso, yavava kubakomekena babembola lukwikilu lwau; wau vo makasi kikilu yabamwenanga, yalwaka mu tezo kia kubabangika muna mavata mankaka.
12 “Ekolo yayendanga kuna Damaseke ye kani diadi muna wisa ye lutumu lwa nganga zambuta,
13 e Ntinu, muna ola ya 12, yamona muna nzila ntemo utukidi kuna zulu, usundidi kezima kwa ntangwa, untemène ye awana bakangalanga yame.+
14 Vava yeto awonso tubwidi vana ntoto, ngwidi e ndinga impovesele muna Kiyibere, oku vo: ‘E Saulu, e Saulu, ekuma okumbangikilanga? Ngeye mosi okuyimwesanga e mpasi wau owandanga e kinsi muna nzwadi wasongoka.’*
15 Kansi, yayuvula vo: ‘U nani e Mfumu e?’ O Mfumu ovutwidi vo: ‘Mono i Yesu ona obangikanga.
16 Kansi, vumbuka, telama. Mbonekene kwa ngeye kimana yasola se selo ye mbangi ame muna mambu mana omwene ye mana ikusonga mu kuma kiame.+
17 Ikuvuluza vana moko ma nkangu wau ye kwa zula ina ikutuma,+
18 watemona meso mau,+ bakatuka muna tombe+ beza mu ntemo,+ bakatuka muna wisa kia Satana+ beza kwa Nzambi, kimana balolokwa masumu+ yo tambula e vua kumosi ye awana baveleleswa muna lukwikilu lwau muna mono.’
19 “Dianu vo, e Ntinu Angeripa, kiakolamena mona-meso kia zulu ko,
20 kansi entete yayenda kw’awana bakala muna Damaseke,+ i bosi muna Yerusaleme+ ye muna mvivu wawonso wa Yuda ye kuna kwa zula mpe, yabasamunuini vo baviluka o ntima, baviluka kwa Nzambi yo songa mavangu ma luviluku lwa ntima.+
21 Ekiaki i kuma Ayuda bambakila muna tempelo yo vava kumponda.+
22 Kansi, wau yatambula lusadisu lwa Nzambi, yamu lumbu kiaki ikwamanananga sila umbangi kwa asakaladi ye akwa tunda, kivovele mambu mankaka ko, mana kaka basakula Angunza yo Mose vo vangama mevangama+—
23 i sia vo, Kristu omona e mpasi,+ i wantete mpe ofulwa muna mafwa,+ osamuna o ntemo kwa nkangu wau ye kwa esi zula.”+
24 Wau Paulu kavovelenge mambu mama muna kuyitanina, Feseto ovovele muna nding’angolo vo: “E Paulu, olaukidi! Zayi wayingi ulaukisi!”
25 Paulu ovovele vo: “Kilaukidi ko, e Mfumu Feseto, kansi mambu maludi ye lulungalalu ngina vova.
26 Kieleka, ngina ye unkabu wamokena yo ntinu kadi otomene zaya mambu mama mawonso; ngina ye ziku vo ke vena diambu ko muna mambu mama olembele zaya, kadi mambu mama ke mavangamena kukinsweki ko.+
27 E Ntinu Angeripa, nga okwikilanga muna Angunz’e? Nzeye wo vo okwikilanga.”
28 Kansi, Angeripa ovovese Paulu vo: “Muna kolo kiakete nga unkwikidisi mu kituka se Nkristu.”
29 Muna diadi Paulu ovovele vo: “Ndombele kwa Nzambi vo, kana mu kolo kiakete yovo kolo kiayingi, ke ngeye kaka ko, kansi awonso bangwidi o unu bakituka owu ngina, katula kaka tuvambu twatu.”
30 O ntinu otelamene kumosi yo nguvulu yo Beniki ye awana bavuende yau.
31 Kansi ekolo bekatukanga, bayantikidi vovana vo: “Muntu ndioyo kavangidi kwandi diambu ko kafwete vondelwa yovo siwa mu pelezo.”+
32 I bosi, Angeripa ovovese Feseto vo: “Muntu ndioyu wadi yambulwa kele vo kakilombela ko vo kafundiswa kwa Kaisa.”+
Mvovo vana yand'a lukaya
^ Yovo “zula kiame.”
^ Mvovo wa sina: “mpalu.” I nkau wasadilwanga muna singika bulu.
