Nekemiya 5:1-19
5 Ozevo, vakedi kazu kiayingi vana vena akala ye akazi au mu kuma kia mpangi zau Ayuda.+
2 Akaka bavovanga vo: “Oyeto yo wan’eto amakala ye amakento, ndonga twina. Masa tuvuidi o mfunu, twadia kimana twakala moyo.”
3 Akaka bavovanga vo: “Tusimbisi mavia meto ye mpatu za vinyu ye nzo muna tambula masa muna kuma kia mvengele.”
4 Akaka bavovanga vo: “Oyeto nzimbu twasompa muna futa vaku kwa ntinu,+ i kuma twasimbisila mavia meto ye mpatu za vinyu.
5 Ozevo, yeto tu esi kanda dimosi ye mpangi zeto,* o wan’eto bena nze wan’au; kansi musindika tuna wan’eto amakala ye amakento muna ubundu, akaka muna wan’eto amakento basilu kala muna ubundu.+ Katuna ye ngolo ko mu kakidila diambu diadi, kadi mavia meto ye mpatu zeto za vinyu kwa wantu akaka zivuilu.”
6 Vava yawa kazu kiau ye mvovo miami, yafunga kikilu makasi.
7 Ozevo, ntomene yindula mambu mama muna ntim’ame, ntantane ye azitu ye alandi a nguvulu, ibavovese vo: “Nluta mialembi songa* nutambulanga konso muntu muna mpangi andi.”+
Vana ntandu, nkubikidi lukutakanu lwampwena mu kuma kiau.
8 Ibavovese vo: “Tuvangidi mawonso muna sumbulula mpangi zeto Ayuda ana batekwa kuna kwa zula; kansi owau nuzolele teka mpangi zeno?”+ Se betekwa diaka kwa yeto e? Muna diadi, babutamene kaka, ke bakedi y’edi bavova ko.
9 Mpovele vo: “Ke diambote ko nuvanganga. Nga ke nufwete diatila muna vumi wa Nzambi eto+ ko kimana twalembi vezwa kwa esi zula, bena vo i mbeni zeto?
10 Mono ye mpangi zame ye selo yame, twabasompeka mpe nzimbu yo masa. Dodokolo, tuyambula sompeka ye kani dia tambula nluta.+
11 Dodokolo, o unu kiaki nubavutulwila mavia mau+ ye mpatu zau za vinyu ye mpatu za olive ye nzo zau, kumosi ye nluta mia* nzimbu zau, mia masa, mia vinyu ye nluta mia mazi mina nukubalombanga.”
12 I bosi, bavovele vo: “Vutula tukubavutulwila e lekwa yayi, ke tukubalomba lekwa ko. Tuvanga mawonso mana ovovele.” Mbokele anganga, ndisisi wantu awaya e ndofi kimana balungisa nsilu wau.
13 I bosi, nkubwidi nswiku mia mvuatu miame,* oku vo: “O Nzambi aludi i mpila yayi kekubulwila konso muntu muna nzo andi yo muna vua diandi, ona olembi lungisa nsilu wau, i mpila yayi kekubulwilwa yo sala moko mankatu.” Muna kuma kiaki, e nkutakani yawonso ivovele vo: “Amen!”* Bakembèle Yave, o nkangu uvangidi mun’owu wa nsilu au.
14 Vana ntandu, tuka ntangwa ina kansola yakala se nguvulu au+ muna nsi a Yuda, tuka muna mvu una wa 20+ yamuna mvu una wa 32+ wa luyalu lwa Antakesate wa Ntinu,+ mvu 12, omono ye mpangi zame ke twadia madia ma kinguvulu ko.+
15 Kansi e nguvulu zina zavita basia mazitu kwa nkangu, babazengela sekele* 40 za palata muna sumbila madia ye vinyu konso lumbu. E selo yau mpe badiatidila nkangu. Kansi mono kiavanga wo ko,+ muna kuma kia vumi wa Nzambi.+
16 Vana ntandu, yatoma vana moko muna salu kia tungulula e yaka kiaki, ke twasumba kana via ko;+ selo yame yawonso bakutakana kûna muna salu.
17 Vakala 150 ma Ayuda ye alandi a nguvulu badilanga vana meza mame ye awana bayizanga kwa yeto tuka muna zula.
18 E lumbu yawonso yakalanga ye wantu bakubikanga ngombe mosi, mameme masambanu matoma solwa ye nuni, muna lumbu kumi, nkumbu mosi twakalanga ye ulolo wa vinyu za mpila zawonso. Kansi, kisidi vava madia mavewanga kwa nguvulu ko, kadi o nkangu wakikadila ye zitu dia salu.
19 E Nzambi ame, unsungamena muna wete, muna mawonso mpangidi muna wete dia nkangu wau.+
Mvovo vana yand'a lukaya
^ Mvovo wa sina: “e nitu zeto zina nze nitu za mpangi zeto.”
^ Yovo “nzuka.”
^ Mvovo wa sina: “tini kia nkama kia,” i sia vo, konso ngonde.
^ Mvovo wa sina: “nkubwidi nkat’ame.”
^ Yovo “yambula diakala wowo!”
