Nekemiya 9:1-38
9 Muna lumbu kia 24 kia ngonde, Aneyisaele balungalakene; bafionkonuene,* bavuete ngoto ye kuyikusa mbundukutu.+
2 E mbongo a Isaele bakivambwidi muna nzenza zawonso,+ batelamene, bafungwini masumu mau ye mbi ya mase mau.+
3 Batelamene muna fulu kiau, batangidi nkand’a Nsiku+ a Yave wa Nzambi au mu ola tatu;* muna ola tatu zankaka bafunguna masumu yo fukamena Yave wa Nzambi au.
4 Yesua, Bani, Kademiele, Sebaneya, Buni, Serebeya,+ Bani yo Kenani, batelamene vana zangameno+ kia Anelevi, babokele Yave wa Nzambi au muna nding’angolo.
5 Anelevi, Yesua Kademiele, Bani, Kasebeneya, Serebeya, Odiya, Sebaneya yo Petakeya bavovele vo: “Nutelama, nuakembelela Yave wa Nzambi eno yamu mvu ya mvu.+ Yambula bakembela nkumbu aku ankembo, ina yatundalala, yavioka nsambu zawonso ye nkembo.
6 “Ngeye kaka i Yave;+ ngeye wavanga e zulu, elo, e zulu dia zulu, ye vu kiau kiawonso, e ntoto ye lekwa yawonso ina mo, kalunga ye yawonso ina mo. Otaninanga yawonso, e vu kia zulu ngeye kifukamenanga.
7 Ngeye u Yave wa Nzambi aludi, ona wasola Abarama,+ wamvaikisa muna Ure+ ya Akaladi yo kumvan’e nkumbu Abarayama.+
8 Wamona vo ntim’andi waziku vana ndose aku,+ i dianu wakangila yandi e kangu vo okumvana e nsi ya Anekenani, Anekete, Aneyamore, Aneperese, Aneyebuse ye Anengirengase ye kwa wan’andi;*+ walungisa nsilu miaku, kadi ongeye wansongi.
9 “Wamona mpasi za mase meto muna Engipito+ yo wá kazu kiau vana ndambu a Mbu Ambwaki.
10 Wasonga sinsu ye masivi kwa Faro, kwa ntaudi zandi zawonso ye kwa nkangu wawonso a nsi andi,+ kadi wazaya wo vo nkangu aku babangikanga.+ Wakivangila nkumbu yamu unu kiaki.+
11 Wavambula e mbu vana bakala kimana basaukila mbu vana ntoto ayuma,+ wadimuna alakami au muna mwasina, nze tadi ditubilu muna maza mangolo.+
12 Wabafidilanga muna lunzi dia tuti muna mwini, muna fuku muna lunzi dia tiya, diaminikanga e nzila ina bayendelanga.+
13 Wakulumuka vana mongo a Sinai,+ wabavovesa tuka kuna zulu+ yo kubavana nzengo zansongi ye nsiku mia ziku,* ye mîna miambote ye nkanikinu.+
14 Wabazayisa e Lumbu kiaku kia Vundu+ kiavauka, wabavana nkanikinu, mîna ye nsiku muna Mose wa ntaudi aku.
15 Vava bafwa nzala,+ wabavana madia* matuka kuna zulu yo kubavaikisila maza muna tadi vava bakala ye vuina,+ wabavovesa vo bakota yo vua e nsi ina wadila ndofi* vo okubavana yo.
16 “Kansi mase meto basonga lulendo,+ babadisa ntima*+ miau, ke balemvokela nkanikinu miaku ko.
17 Ke bazola kuwila ko,+ ke basungamena mavangu masivi ko mana wavanga vana bena, kansi babadisa kaka ntima miau,* basola ntwadisi kimana bavutuka kwau muna ubundu kuna Engipito.+ Kansi, wau vo ngeye u Nzambi wakubama mu loloka, u nkwa ngemba ye nkenda ye ulolo wa walakazi,+ kufunganga makasi mu nzaki ko, kwababembola ko.+
18 Kana nkutu vava bakivangila teke kiasengwa* kia mwan’a ngombe yo vova vo: ‘Endioyo i Nzambi aku wàvaikisa muna Engipito,’+ bavangidi mambu manene ma luvezo,
19 ngeye muna ulolo wa nkenda zaku, kwababembola ko muna makanga.+ E lunzi dia tuti diabafilanga muna nzila muna mwini, ke diabavavukanga ko, ngatu lunzi dia tiya diabaminikanga muna nzila ina bayendelanga mu fuku.+
20 Wabavana mwand’aku ambote muna kubavana umbakuzi,+ e mâna aku kwabayimina yo ko,+ wabavana maza vava bakala ye vuina.+
21 Mvu 40 wabadikila muna makanga.+ Ke bakondwa lekwa ko. E mvuatu miau ke miafwa ko,+ malu mau ke mavimba ko.
22 “Wabavana yintinu ye nkangu, wabakayanisina nsi ndambu ndambu,+ ozevo, babaka nsi a Sikone,+ e nsi a ntinu a Kesebone,+ ye nsi a Onge+ wa ntinu a Basani.
23 Wasayanisa wan’au nze ntetembwa za zulu.+ I bosi wabatwasa muna nsi ina wavovesa mase mau vo bakota, bavua yo.+
24 Wan’au bakota yo vua e nsi,+ ongeye wabasakidikila Anekenani,+ ana bazingilanga muna nsi, wabayekola muna moko mau ye ntinu au ye nkangu a nsi, babavanga konso una bazola.
25 Babaka mbanza zangolo+ ye ntoto a mbongo,*+ babonga nzo zazala ye lekwa yawonso yambote ye sima yatimwa ye mpatu za vinyu ye mpatu za olive+ yo ulolo wa nti miadia. Badia, bayukuta, bavonga, bayangalela muna wete waku wayingi.
26 “Kansi, yau bakolama, bàtelamena,+ bafila Nsiku aku e nima.* Bavonda ngunza zaku zina zabalukisa kimana bavutuka kwa ngeye, bavanga mambu manene ma luvezo.+
27 I kuma wabayekolwela vana moko ma mbeni zau,+ ana babamwesanga e mpasi.+ Kansi muna ntangw’a mpasi vava bakazanga kwa ngeye, wawanga tuka kuna zulu; muna kuma kia ulolo wa nkenda zaku wabavana mvuluzi muna kubavuluza vana moko ma mbeni zau.+
28 “Kansi, vava bavevokanga, bavanganga diaka mambu mambi vana ndose aku,+ wabayekolanga vana moko ma mbeni zau babayala.*+ I bosi bavutukanga diaka kwa ngeye yo lomba lusadisu,+ wawanga tuka kuna zulu, nkumbu miayingi wabavuluzanga muna kuma kia nkenda zaku zayingi.+
29 Kana una vo wabalukisa bavutuka muna Nsiku aku, kansi basonga lulendo, ke balemvokela nkanikinu miaku ko;+ basumukina kaka nsiku miaku mina vo avo muntu olemvokele mio,+ okala moyo. Bafila nima kuna lulendo lwawonso, babâdisa ntima miau, ke bawa ko.
30 Wabazizidila+ mu mvu miayingi yo kwamanana kubalukisa muna mwand’aku, muna ngunza zaku, kansi ke bazola wá ko. I dianu wabayekolwela vana moko ma nkangu mia nsi.+
31 Kansi muna ulolo wa nkenda zaku, kwabafukisa ko+ ngatu kubabembola, kadi u Nzambi a nkenda ye nkwa ngemba.+
32 “Owau, e Nzambi eto, wa Nzambi anene, nkwa ngolo ye wansisi, ona olundanga e kangu diaku yo songa walakazi,+ kuvezi mpasi zawonso ko zina zatubuila ye ntinu mieto ye akuluntu eto+ ye nganga+ ye ngunza+ yo mase ye nkangu aku wawonso, tuka muna lumbu y’atinu a Asuri+ yamu unu kiaki.
33 Ngeye wavanga owu wansongi muna mawonso matubwila, kadi wasonga mavanga ma kwikizi; kansi yeto twavanga e mbi.+
34 Atinu eto ye akuluntu ye nganga yo mase meto ke balemvokela Nsiku aku ko, ngatu wunikina nkanikinu miaku yo luludiku* luna wabavana.
35 Kana nkutu vava bakala muna kintinu kiau yo yangalala mawete mayingi mana wabavana ye nsi yasanzuka, iyimanga mbongo* ina wabavana, ke basadila ko+ ngatu yambula mavangu mau mambi.
36 Muna kuma kiaki, o unu tu abundu,+ elo, tu abundu mwamu nsi ina wavana kwa mase meto kimana badia mbongo andi ye lekwa yandi yambote.
37 Muna kuma kia masumu meto,+ o ulolo wa mbongo a nsi yayi kwa ntinu mina watusila ivewanga. Beyalanga nitu zeto ye twelezi yeto konso una bazolele, mu mpasi zayingi twina.
38 “Muna kuma kia mawonso mama, tukangidi e kangu+ diaziku, tusonekene dio, akuluntu eto ye Anelevi ye nganga zeto,+ basikidisi dio yo sia dio e dimbu.”
Mvovo vana yand'a lukaya
^ Yovo “bamini nsoki.”
^ Mvovo wa sina: “ndambu a nyá ya lumbu.”
^ Yovo “mbongo andi.”
^ Yovo “miafwana bundwa e vuvu.”
^ Mvovo wa sina: “mbolo.”
^ Mvovo wa sina: “wazangwila o koko.”
^ Mvovo wa sina: “babadisa nsingu zau.”
^ Mvovo wa sina: “babadisa nsingu zau.”
^ Yovo “kiazunzwa.”
^ Yovo “a kimvuama.”
^ Mvovo wa sina: “batuba Nsiku aku kuna nima.”
^ Yovo “bababangika.”
^ Yovo “lulukisu.”
^ Yovo “nsi a kimvuama.”