Ngana 15:1-33
15 E mvutu za malembe* nganzi zilembekanga,+Kansi, e mvovo milwekanga makasi misakisanga.+
2 O lubini lw’akwa ngangu lutoma sadilanga zayi,+Kansi o nu’a mazowa ufwafumuna uzowa.
3 O meso ma Yave mena mwawonso,Metalanga wantu ambi ye wantu ambote.+
4 O lubini lwa lembama* i nti a moyo,+Kansi mvovo miambi ntantu mitwasanga.*
5 E zowa longi dia se diandi kevezanga,+Kansi o nlungaladi otambulwilanga lusembo.*+
6 Muna nzo a nsongi muna ye tusalu twayingi,Kansi mbongo* a kimpumbulu mpasi itwasanga.+
7 E befo ya nkwa ngangu, zayi imwanganesanga,+Kansi o ntim’a zowa ke uvanganga wo ko.+
8 E kimenga kia yimpumbulu kiangemi kuna kwa Yave,+Kansi e sambu ki’ansongi kia luyangalalu kwa yandi.+
9 E nzil’a kimpumbulu yangemi kwa Yave,+Kansi ozolanga ndiona ovavanga unsongi.+
10 E longi, diambi* dikalanga kwa ndiona ovengomokene muna nzila,+Kansi ndiona omenganga lusembo fwa kefwa.+
11 E Ziami* ye fulu kia lufwasu* kina vana meso ma Yave.+
Musungula ntima mia wantu!+
12 O mvezi ke zolanga ndiona okunsingikanga ko.+
Ke yuvulanga akwa ngangu ko.+
13 O ntim’a kiese ndose ukiesesanga,Kansi o ntima wakendalala mwanda ukosomonanga.+
14 O ntim’a nkwa umbakuzi, uvava nzayilu,+Kansi e nua mia mazowa uzowa midianga.*+
15 E lumbu yawonso ya mumbona-mpasi yambi,+Kansi nkwa ntim’a kiese* okalanga kaka ye lambu.+
16 Diambote mu kala ye fiakete yo vumi wa Yave,+Ke mu kala ye kimvuama kiayingi ko ye ntokani zayingi.*+
17 E longa dia makaya disundidi o wete vana vena o zola+Ke mu ngombe a mazi ko vana vena lumengo.+
18 Ndiona ofunganga makasi mu nzaki, nkindu keyangumunanga,+Kansi ndiona olembi funganga makasi mu nzaki, ntantani kelembekanga.+
19 E nzil’a molo ina nze yaka kia nsende,+Kansi e yendelo dia nsongi dina nze nzila yalelama.+
20 Mwan’a ngangu se diandi kemwesanga kiese,+Kansi e zowa ngudi andi kevezanga.+
21 Uzowa uyangidikanga munkondwa-ngangu,*+Kansi nkwa umbakuzi ke vengomokanga ko.+
22 Vana vakondelo mbokena* makani mefunganga,Kansi vana vena aludiki ayingi o makani mesikilanga.+
23 O muntu omonanga kiese muna mvutu zandi zambote,*+Ekwe wete e diambu divovelo muna ntangw’ambote!+
24 E nzil’a moyo ifilanga nkwa ngangu kuna ntandu,+Ye kumvengesa muna nzil’a Ziami* kuna nsi.+
25 Yave obangula nzo ya nkwa lulendo,+Kansi otatidila mwingilu a nkento wafwilwa yakala.+
26 Makani ma kimpumbulu mangemi kuna kwa Yave,+Kansi e mvovo miambote miavelela kwa yandi.+
27 Ndiona obakanga nluta mialembi songa, esi nzo andi ketwasilanga e mpasi,*+Kansi ndiona omenganga mbabu okwamanana zinga.+
28 O ntim’a nsongi uteka yindulanga muna vana e mvutu,*+Kansi nu’a kimpumbulu uwulumunanga mambu mambi.
29 Yave wavavuka yimpumbulu,Kansi owanga e sambu ki’ansongi.+
30 Meso matoma kiá memwesanga ntima e kiese;E nsangu zambote visi zisiamisanga.*+
31 Ndiona owanga lusembo luvananga moyoVana vena akwa ngangu kekalanga.+
32 Ndiona otinanga e longi moyo andi kebembolanga,+Kansi ndiona owanga lusembo umbakuzi* kevuanga.+
33 O vumi wa Yave ngangu ulonganga,+O lulembamu luvitanga nkembo.+
Mvovo vana yand'a lukaya
^ Yovo “ngemba.”
^ Yovo “O lubini luwukanga.”
^ Mvovo wa sina: “mwanda mikosomonanga.”
^ Yovo “tumbu.”
^ Yovo “mfutu.”
^ Yovo “diampasi.”
^ Yovo “Seol,” i sia vo, ziami kia wantu awonso. Tala Nsas’a Mvovo.
^ Yovo “Abadone.”
^ Yovo “mivavanga.”
^ Yovo “ntim’ambote.”
^ Yovo “mvuanga.”
^ Mvovo wa sina: “munkondwa-ntima.”
^ Yovo “valembi vuandwa e mfulu.”
^ Mvovo wa sina: “muna mvutu za nu’andi.”
^ Yovo “Seol,” i sia vo, ziami kia wantu awonso. Tala Nsas’a Mvovo.
^ Yovo “nsoni.”
^ Yovo “utoma badikanga mana kevutula; oyindulanga vitila kavova.”
^ Mvovo wa sina: “visi zisianga mazi.”
^ Mvovo wa sina: “ntima.”
