Nsiku 1:1-46
1 Mama i mambu mana Mose kavovesa Isaele yawonso muna zunga kia Yodani muna makanga, muna makanga mana matalana ye Sufa, vana kati kwa Parani, Tofele, Labani, Kaserote ye Dizabi.
2 (Avo muntu otukidi kuna Korebe kenda kuna Kadese-banea+ muna nzila ikwendanga kuna Mongo a Seyire, lumbu 11 kevanga.)
3 Muna mvu wa 40,+ muna ngonde ya 11, muna lumbu kiantete kia ngonde, Mose ovovese Aneyisaele* mawonso mana Yave kankanikina vo kabazayisa.
4 Ediadi diavangama vava kasunda Sikone+ wa ntinu a Aneyamore, ona wazingilanga muna Kesebone ye vava kasunda Onge+ wa ntinu a Basani kuna Ederei,+ ona wazingilanga muna Asitarote.
5 Muna zunga kia Yodani muna nsi ya Moabe, Mose oyantikidi sasila o Nsiku wau,+ oku vo:
6 “Yave wa Nzambi eto watuzayisa kuna Korebe vo: ‘Kolo kiayingi se nuina mu zunga+ kiaki kia miongo.
7 Nukubama, nuenda kuna zunga kia miongo kia Aneyamore+ ye kwa mfinangani zau zawonso muna Araba,+ muna zunga kia miongo, muna Sefela, muna Nengebe, muna nlambu a mbu,+ e nsi ya Anekenani, muna Lebanone,*+ yakuna nzadi anene, e nzadi a Uferate.+
8 Tala, nsidi e nsi yayi ova ntadisi eno. Nukota, nuavua e nsi ina Yave kadila e ndofi kwa mase meno, Abarayama, Isaki+ yo Yakobo+ vo ovana yo kwa yau ye kwa mbongo au ikubalandila.’+
9 “Muna ntangwa yayina, omono yanuzayisa vo: ‘Kilenda kunufila mono mosi ko.+
10 O Yave wa Nzambi eno unuwokese, o unu kiaki nuwokele nga ntetembwa za zulu.+
11 Yambula Yave wa Nzambi a akulu eno kanuwokesa+ nkumbu funda vioka lutangu nuina o unu, yambula kanusambula wauna kanusila o nsilu.+
12 Aweyi ndenda natina e zitu dia mambu meno yo zizidila e ntantani zeno+ mono mosi?
13 Nusola awana bena ye ngangu, balungalala ye bazikuka muna makanda meno, ikubatumbika se ntu vovo nuina.’+
14 Oyeno nuamputula vo: ‘Dina utuvovese vo twavanga diambote.’
15 Muna kuma kiaki, yabaka e ntu mia makanda meno, awana bena ye ngangu ye bazikuka yo kubatumbika se mfumu za mafunda, mfumu za nkama, mfumu za makumatanu, mfumu za kumi ye akengi muna makanda meno.+
16 “Muna ntangwa yayina yakanikina afundisi eno vo: ‘Avo wantu babakanene diambu vana vena o nkangu yo kwiza kwa yeno, nufwete fundisila e diambu muna unsongi,+ kiakala vana vena Aneyisaele wole yovo vana vena Nyisaele yo nzenza ozingilanga ova kati kweno.+
17 Ke nusie mpambula ko muna mfundu.+ Mpila mosi nufwete wila o nkwa tunda yo muntu wakondwa e tunda.+ Ke numoni wonga wa muntu ko,+ kadi vava nufundisa, Nzambi nusunzula;+ avo e diambu diampasi kikilu kwa yeno, nufwete dio sunzula kwa mono, omono iwá dio.’+
18 Muna ntangwa yayina, yanukanikina mawonso nufwete vanga.
19 “I bosi, twakatuka kuna Korebe, twaviokela muna makanga+ mawonso mampwena ye mansisi mana nuamona muna nzil’a zunga kia miongo kia Aneyamore,+ wauna o Yave wa Nzambi eto katukanikina. Kuna kwalanda, twalwaka kuna Kadese-banea.+
20 I bosi, yanuvovesa vo: ‘Nulweke omu zunga kia miongo kia Aneyamore, kina o Yave wa Nzambi eto kekutuvana.
21 Tala, Yave wa Nzambi aku uven’e nsi. Tomboka, vua e nsi, wauna o Yave wa Nzambi a akulu aku kavovesa.+ Kumoni wonga ko ngatu vumiswa.’
22 “Kansi, yeno awonso nuamfinama yo vova vo: ‘Yambula twatuma wantu kuna ntwal’eto batulangila e nsi yo kututwasila e nsangu za nzila ina tufwete kwendela ye mpila mbanza tuwana.’+
23 Yamona vo e ngindu zeno zambote, muna kuma kiaki yasola wantu 12 vovo nuina, mosi muna konso kanda.+
24 Oyau bayenda, batomboka kuna zunga kia miongo,+ balwaka kuna Ndimb’a Esekole yo langa wo.
25 Babonga e yankaka muna bundu ya nsi yo kututwasila yo, batutwasila mpe nsangu, oku vo: ‘E nsi ina Yave wa Nzambi eto kekutuvana yambote.’+
26 Kansi, oyeno ke nuazola tomboka ko, nuakolamena o nkanikinu a Yave wa Nzambi eno.+
27 Nuayidimanga muna nzo zeno za ngoto, oku vo: ‘O Yave menga kekutumenganga i kuma katuvaikisila muna nsi ya Engipito katuyekola vana moko ma Aneyamore kimana batufukisa.
28 Nkia mpila fulu tukwendanga? E mpangi zeto batuyoyese*+ ntima, oku vo: “O nkangu una ko utusundidi o nene yo ntela, e mbanza zau zanene ye zazungwa e yaka yakuna zulu,*+ tumwene ko o wan’a Aneyanaki.”’+
29 “Muna kuma kiaki yanuvovesa vo: ‘Ke nuvumiswa ko ngatu mona wonga mu kuma kiau.+
30 Yave wa Nzambi eno okunuvita o ntu yo nuana mu kuma kieno,+ wauna kavanga kuna Engipito vana meso meno.+
31 Muna makanga, wamona una Yave wa Nzambi aku kanatina, wauna o muntu kenatinanga o mwan’andi, konso kuna nuayendanga yavana nulweke ova fulu kiaki.’
32 Kana una vo i wau, ke nuakwikila muna Yave wa Nzambi eno ko,+
33 ona wanuvitanga o ntu muna nzila kimana kasolola e fulu kina nusikidisa e ndo. Muna fuku, wamonekanga muna tiya, muna mwini, wamonekanga muna tuti muna kunusonga e nzila ina nufwete kangalela.+
34 “Muna kolo kiakina kiawonso Yave wawá mana nuavovanga, wakendalala yo dia e ndofi vo:+
35 ‘Ke mosi ko muna mbandu yayi yambi omona e nsi yambote ina yadila e ndofi vo ivana yo kwa mase meno,+
36 nanga vo Kalebe kaka wa mwan’a Yefune. Oyandi omona yo, ivana kwa yandi ye kwa wan’andi e nsi ina kadiete, kadi olende Yave yo ntima wawonso.*+
37 (Yave wamfungila nkutu makasi mu kuma kieno, wavova vo: “Ongeye mpe kukota mo ko.+
38 O Yosua wa mwan’a Nuni, wa selo kiaku,*+ yandi okota muna nsi.+ Unkumika,*+ kadi yandi ofila Isaele mu vua e nsi.”)
39 Vana ntandu, e yingiana-ngiana yeno ina nuvovele vo bekituka se sanzu+ yo wan’eno ana ke bazeye mbi ye mbote ko o unu, yau bekota mo, ikubavana e nsi se vua.+
40 Vo i yeno, nuviluka, nuenda kuna makanga muna nzil’a Mbu Ambwaki.’+
41 “Muna kuma kiaki, oyeno nuampovesa vo: ‘Yave tusumukini. Owau, tutomboka yo nuana, wauna Yave wa Nzambi eto katukanikina!’ Muna diadi, konso muntu mu yeno wavuata e nuaninua yandi ya vita, edi nuabanza vo diambu diakete mu tomboka kuna mongo.+
42 Kansi Yave wampovesa vo, ‘Ubavovesa vo: “Ke nutomboki ko yo nuana, kadi kikala yeno ko.+ Avo nuele ko, sundwa nusundwa kwa mbeni zeno.”’
43 Muna kuma kiaki yavovana yeno, kansi ke nuawá ko. Nuakolamena nkutu nkanikinu a Yave, kuna lulendo lwawonso nuateza tomboka kuna mongo.
44 Aneyamore ana bazingilanga kuna mongo bavaika nga mbuinginina* mu wanana yeno yo kunukulanesa, banuyinganese muna Seyire yakuna Korema.
45 I bosi, nuavutuka yo yantika o dila vana ntadisi a Yave, kansi Yave kanuwá ko ngatu kunusia e sungididi.
46 Ekiaki i kuma nuzingilanga mu Kadese ekolo kiaki kiawonso.
Mvovo vana yand'a lukaya
^ Mvovo wa sina: “wan’a Isaele.”
^ Nanga i nlong’a miongo mia Lebanone.
^ Mvovo wa sina: “batuzelwele.”
^ I sia vo, yazungwa e yaka yandá.
^ Mvovo wa sina: “una ufwene; muna mawonso.”
^ Mvovo wa sina: “ona otelamene ova ndose aku.”
^ Nanga, “Nzambi unkumikini.”
^ Yovo “nuki.”
