Nsiku 11:1-32
11 “Ofwete zola Yave wa Nzambi aku+ yo kwamanana lungisa kiyekwa kiaku kwa yandi ye mîna miandi, nzengo zandi za mfundisa ye nkanikinu miandi.
2 Nuzeye wo vo, o unu kwa yeno ivovanga, ke kwa wan’eno ko ana ke bazeye ko ngatu mona una kanusingikila o Yave wa Nzambi eno+ yovo mona o nene wandi,+ koko kwandi kwankuma+ yo koko kwandi kwalambuka.
3 Oyau ke bamona sinsu ya Nzambi ko yo mavangu kavanga muna Engipito kwa Faro wa ntinu a Engipito ye muna nsi andi yawonso;+
4 yovo mana Nzambi kavanga kwa vu ya Engipito, kwa mvalu mia Faro yo makalu ma vita, mana mafukwa kwa maza ma Mbu Ambwaki vava banulandanga, Yave wabafwasa emvimba mu nkumbu mosi.*+
5 Oyau ke bamona ko mana Nzambi kavanga mu kuma kieno* muna makanga yavana nulweke va fulu kiaki,
6 yovo mana Nzambi kavanga kwa Datani yo Abirami, o wan’a Eliabe wa mwan’a Rubeni, vava ntoto waziuka vana meso ma Isaele yawonso+ yo kubamina, kumosi y’esi nzo zau ye nzo zau za ngoto yo wantu ye bulu bakala yau.
7 O meso meno mamona mavangu mawonso manene kavanga o Yave.
8 “Nufwete lunda nkanikinu miawonso mina ikukanikinanga o unu, kimana nuakituka se nkangu wankuma yo sauka kuna nsi, nuavua yo,
9 kimana nuazinga kolo kiayingi+ muna nsi ina Yave kadila e ndofi vo ovana yo kwa akulu eno ye kwa mbongo au,+ e nsi ifwamfumukanga kimvumina yo wiki.+
10 “E nsi ina okwenda vua ke ifwanane ye nsi ya Engipito ko, muna nuatuka, muna wakuninanga e mbongo aku yo mwangina yo maza muna kulu kwaku,* nze mpatu a mvudia.
11 Kansi, e nsi ina osauka mu vua yo, i nsi ya miongo ye ndimba.+ Nsi inuanga maza ma mvula;+
12 i nsi ina Yave wa Nzambi aku kelunga-lunganga. O meso ma Yave wa Nzambi aku mekalanga mûna, tuka kuna lubantiku lwa mvu yakuna nsuk’a mvu.
13 “Avo nulemvokela nkanikinu miame una ufwene mina ikunukanikinanga o unu yo zola Yave wa Nzambi eno, nuansadila yo ntim’eno wawonso yo moyo* eno wawonso,+
14 inokesa mpe mvula muna nsi aku muna ntangw’andi, mvula zantete ye mvula za kintombo, ongeye okutika e mbongo aku ye vinyu aku yampa yo mazi maku.+
15 Imenesa e titi muna nzanza miaku mu kuma kia twelezi yaku, ongeye odia yo yukuta.+
16 Nuyikenga kimana e ntima mieno mialembi vukumunua yo vengomoka nuasambila nzambi zankaka yo kubafukamena.+
17 Avo ke wau ko, o makasi ma Yave mekunufusukila, oyandi okanga e zulu kimana dialembi noka e mvula,+ o ntoto ke uyima mbongo andi ko, oyeno nufukiswa mu nzaki muna nsi yambote ina Yave kekunuvana.+
18 “Nufwete soneka e mvovo miame miami muna ntima mieno yo sadila mio muna zingu kieno, nukanga mio muna moko meno se luyindwilu ye mifwete kala vana lose lweno nga tenda kia ntu.*+
19 Nulonga mio kwa wan’eno, mokenena mio vava ofonga muna nzo aku, vava okiya muna nzila, vava oleka ye vava osikama.+
20 Soneka mio muna malunzi ma mwelo a nzo aku ye muna mavitu maku,
21 kimana oyeno yo wan’eno nuazinga kolo kiayingi+ muna nsi ina Yave kadila e ndofi vo ovana yo kwa akulu eno,+ muna kolo kiawonso e zulu dikala ova ntandu a ntoto.
22 “Avo nulunda o nkanikinu wau ikunukanikinanga yo lemvokela wo una ufwene, nuazola Yave wa Nzambi eno,+ nuakangalelanga muna nzila zandi zawonso yo kuntatidila,+
23 Yave oyinga e zula yayi yawonso vana ntadisi eno,+ oyeno nukutumuna ntoto wa zula inusundidi o nkuma yo wokela.+
24 Konso fulu kidiata e tambi yeno kikituka se kieno.+ O mwingilu eno utuka kuna makanga yakuna Lebanone, tuka kuna Nzadi, e nzadi a Uferate, yakuna mbu a weste.*+
25 Ke vena muntu ko okunutelamena.+ O Yave wa Nzambi eno osayanesa e zakamu yo wonga mu kuma kieno muna nsi yawonso nuviokela,+ wauna kanusila o nsilu.
26 “Tala, o unu nsidi e nsambu ye sibu ova ntadisi eno:+
27 nusambulwa, avo nulemvokela e nkanikinu mia Yave wa Nzambi eno mina ikunukanikinanga o unu,+
28 nusibwa, avo ke nulemvokela nkanikinu mia Yave wa Nzambi eno+ ko yo vengomoka muna nzila ina ikunukanikinanga o unu nuadiatila yo landa nzambi zina ke nuazaya ko.
29 “Vava Yave wa Nzambi aku kekukotesa muna nsi ina ovua, ofwete yika* e nsambu vana Mongo a Ngerezime yo yika e sibu vana Mongo a Ebale.+
30 E miongo miami kuna simu dia Yodani mina, kuna weste,* muna nsi ya Anekenani ana bezingilanga muna Araba, mantalani ye Ngilengale, vana ndambu a nti mia More.+
31 Kadi oyeno nusauka e Yodani mu kota yo vua e nsi ina kekunuvana o Yave wa Nzambi eno.+ Vava nuvua e nsi yo zingila mûna,
32 nufwete keba kimana nualungisa e nsiku miawonso ye nzengo za mfundisa zina isianga ova ntadisi eno o unu.+
Mvovo vana yand'a lukaya
^ Yovo “yamu unu kiaki.”
^ Yovo “kwa yeno.”
^ Yovo “yitila yo maza muna kulu kwaku,” i sia vo, sadila e ngolo za kulu mu zietomona lungungu lwa tombolwela maza muna wulu yovo vanga yo ziula e nsuku mia maza.
^ Tala Nsas’a Mvovo.
^ Mvovo wa sina: “vana kati-kati kwa meso maku.”
^ I sia vo, Mbu Anene, Mediterrâneo.
^ Yovo “vana.”
^ Yovo “kuna kudimukinanga e ntangwa.”
