Nsiku 13:1-18
-
Una nufwete kadila ye avengomoki (1-18)
13 “Avo ngunza yovo muntu osakulanga muna ndozi ovaikidi vovo wina yo kusonga e sinsu yovo sakula diambu,
2 e sinsu yovo diambu kasakwidi kwa ngeye dialungana yo vova vo: ‘Yambula twalanda nzambi zankaka, e nzambi zina kwazaya ko, yambula twasadila zo,’
3 kuwila mvovo mia ngunza yoyo ko yovo mia nloti a ndozi ndioyo,+ kadi o Yave wa Nzambi aku okutontanga+ mu zaya kana vo ozolanga Yave wa Nzambi aku yo ntim’aku wawonso yo moyo* aku wawonso.+
4 Yave wa Nzambi aku kaka ofwete landa, yandi ofwete mona o wonga, ofwete lunda e nkanikinu miandi yo wila e nding’andi; yandi kaka ofwete sadila, yandi ofwete tatidila.+
5 Vo i ngunza yoyo nloti a ndozi ndioyo kafwete vondwa,+ kadi ukolami kayangumwini mu kuma kia Yave wa Nzambi eno—ona wanuvaikisa muna nsi ya Engipito yo kunukûla muna nsi ya ubundu*—muna kuvengomona muna nzila ina Yave wa Nzambi aku kakanikina vo walanda. Ofwete katula edi diambi ova kati kwaku.+
6 “Avo mpangi aku, wa mwan’a ngudi aku yovo mwan’aku ayakala yovo mwan’aku ankento yovo nkento aku anzolwa yovo nkundi aku otoma zolanga* ovavidi kuvukumuna kuna sweki yo vova vo: ‘Twenda, twasadila nzambi zankaka,’+ e nzambi zina ongeye ye akulu aku ke nuazaya ko,
7 e nzambi za nkangu minuzungidi, kiakala nkangu mina yaku lukufi yovo mina kwandá, tuka kuna nsuka eyi ya nsi yakuna nsuka yankaka ya nsi,
8 kuyambula ko kavukumuna ngatu kunwila,+ kufwete kumfwila nkenda ko yovo kumvukisa ngatu kuntanina;
9 kansi, ofwete kumvonda kikilu.+ O koko kwaku i kufwete vita muna kumvonda, i bosi o koko kwa nkangu wawonso.+
10 Ofwete kuntuba matadi yavana kefwa,+ wau kavavidi kuvengomona kwa Yave wa Nzambi aku, ona wavaikisa muna nsi ya Engipito, muna nsi ya ubundu.*
11 E Isaele yawonso i wá wo yo mona wonga, ke besinga vanga diaka diambu diambi nze diadi ko vovo wina.+
12 “Avo owidi muna imosi muna mbanza zina Yave wa Nzambi aku kekuvana wazingila, oku vo:
13 ‘Yimpumbulu ivaikidi vovo wina mu vukumuna wantu bezingilanga muna mbanz’au, oku vo: “Twenda, twasadila nzambi zankaka,” e nzambi zina ke nuazaya ko,’
14 ofwete toma tala e diambu diodio, toma fimpulula yo toma yuvula;+ avo dialudi vo e diambu diodio diangemi vangama divangamene vovo wina,
15 ofwete vonda kikilu o wantu bezingilanga mu mbanza yoyo muna nsosolo.+ Fwasa e mbanza muna nsosolo ye yawonso ina mo,+ kumosi ye twelezi yandi.
16 I bosi, ofwete kutika e sanzu diawonso dia mbanza vana kati kwa ntanda* yo yoka e mbanza muna tiya, e sanzu dia mbanza dikala se lukau lwamvimba kwa Yave wa Nzambi aku. E mbanza ikituka se fuku yakwele mvu. Ke isinga tungululwa nkutu ko.
17 O koko kwaku ke kufwete bonga konso lekwa ko kivambwilu mu fwaswa,*+ kimana Yave kavilula makasi mandi yo kufwila e nkenda yo kuwokesa, wauna kadila e ndofi kwa akulu aku.+
18 Kadi ofwete lemvokela* Yave wa Nzambi aku muna lundanga e nkanikinu miandi miawonso mina ikukanikinanga o unu, muna mpila yayi, ovanga owu wansongi vana meso ma Yave wa Nzambi aku.+
Mvovo vana yand'a lukaya
^ Tala Nsas’a Mvovo.
^ Mvovo wa sina: “nzo a ubundu.”
^ Yovo “nkundi aku ona wina nga i moyo aku.”
^ Mvovo wa sina: “nzo a ubundu.”
^ Yanzala kiakutakenanga nkangu mu teka, sumba lekwa yo tela mambu.
^ Yovo “konso lekwa kikitwilu kiavauka wau kisiminu.”
^ Yovo “wila e nding’a.”
