Nsiku 15:1-23
15 “Kuna mfoko a konso mvu nsambwadi, ofwete yambulwila e mfuka.+
2 I wau wuwu nuyambulwila e mfuka: konso nsompeki kafwete yambulwila e mfuka ina o mfinangani andi kandia. Kafwete komekena mfinangani andi ko yovo mpangi andi kafuta e mfuka, kadi nkoki wa yambulwila e mfuka ubokelo kuna kwa Yave.+
3 Olenda lomba e mfuka kwa nzenza,+ kansi ofwete yambulwila konso lekwa kina o mpangi aku kadeva.
4 Ozevo, ke muntu ko ova kati kwaku ofwete kituka se nsukami, kadi o Yave sambula kikilu kekusambula+ muna nsi ina Yave wa Nzambi aku kekuvana se vua,
5 avo olemvokele kaka e nding’a Yave wa Nzambi aku una ufwene yo toma lunda o nkanikinu wau wawonso una ikukanikinanga o unu.+
6 Kadi o Yave wa Nzambi aku okusambula wauna kasila o nsilu, ongeye odevesa* kwa zula yayingi, kansi ongeye kuvava deva ko;+ oyala zula yayingi, kansi oyau ke bekuyala ko.+
7 “Avo mosi muna mpangi zaku vovo wina okitukidi se nsukami muna imosi muna mbanza za nsi ina Yave wa Nzambi aku kekuvana, kukangi ntima ko ngatu batikina koko mu kuma kia mpangi aku una vo nsukami.+
8 Kansi, ofwete ziwilwila mpangi aku o koko kuna mvevo,+ ofwete kikilu kundevesa* konso lekwa kazolele yovo kakondelo.
9 Toma keba walembi kala ye ngindu ezi zambi muna ntim’aku, oku vo: ‘O mvu wansambwadi una vo i mvu wa yambulwila e mfuka, ufinamene,’+ muna diadi oyambwidi kayila mpangi aku una vo nsukami yo lembi kumvana lekwa. O mpangi aku avo obokele kwa Yave mu kuma kiaku, ediadi dikala se sumu kuna kwa ngeye.+
10 Ofwete kunkayila kuna mvevo,+ ongeye kufwete* kunkayila mu ntim’a mbi ko, kadi kiaki i kuma Yave wa Nzambi aku kesambulwila mambu maku mawonso ye salu yaku yawonso.+
11 Kadi asukami bekala kaka muna nsi.+ Ekiaki i kuma ikukanikinanga vo: ‘Ofwete ziula koko kwaku kuna mvevo mu kuma kia mpangi aku una mu mpasi ye nsukami omu nsi aku.’+
12 “Avo mosi muna mpangi zaku, yakala yovo nkento wa Nyibere otekelo kwa ngeye, kasadila mu mvu sambanu, ozevo muna mvu wansambwadi ofwete kumvevola.+
13 Vava okumvevola, kunyambula kenda moko mankatu ko.
14 Kuna mvevo wawonso, ofwete kumvana lekwa muna twelezi yaku, muna bundilu diaku ye muna kaminu diaku dia mazi ye vinyu. Wauna kekusambulwila o Yave wa Nzambi aku, i una ofwete kumvanina.
15 Sungamena vo ngeye mbundu wakituka muna nsi ya Engipito, Yave wa Nzambi aku wakûla. Kiaki i kuma o unu ikukanikinanga vo wavanga wo.
16 “Kansi, avo uvovese vo: ‘Kikusisa ko!’ wau vo zola ke kuzolanga ye esi nzo aku, una ye kiese kia kusadila,+
17 ofwete kunata vana mwelo yo kuntobola o kutu muna ntumbu, oyandi okituka se ntaudi aku muna zingu kiandi kiawonso. Idiau mpe ovanga kwa ntaudi aku ankento.
18 Kumoni dio diampasi ko vava okumvevola, oyandi kasisa, kadi e salu kasadidi muna mvu sambanu kiviokele nkumbu miole e salu kia nsadi ona ofutwanga, Yave wa Nzambi aku usambwidi muna mambu mawonso.
19 “Ofwete vaulwila Yave wa Nzambi aku konso mwan’antete a koko a ngombe aku yo mwan’antete ameme ye nkombo aku.+ Kufwete sadila mwan’antete a ngombe aku ko mu sala konso salu ngatu saka e mika mia mwan’antete ameme diaku.
20 Ongeye ye esi nzo aku nufwete kundila vana ntadisi a Yave wa Nzambi aku mvu ke mvu, vana fulu kina Yave kesola.+
21 Kansi, avo fu kena kiau—ntedingi,* mpofo yovo konso fu kiankaka—kufwete kuntambika ko se kimenga kwa Yave wa Nzambi aku.+
22 Ofwete kio dila muna mbanza zaku,* o muntu wafunzuka yo muntu wavelela balenda kio dia kwau, wauna udilwanga e nkayi yovo mvanda.+
23 Kansi, kufwete dia menga mandi ko;+ ofwete mo yitila vana ntoto nga maza.+
Mvovo vana yand'a lukaya
^ Yovo “odevesela muna nsimbi.”
^ Yovo “odevesela muna nsimbi.”
^ Mvovo wa sina: “o ntim’aku ke ufwete.”
^ Yovo “kinsoto.”
^ Mvovo wa sina: “mavitu maku.”
