Nsiku 2:1-37
2 “I bosi, twaviluka yo kwenda kuna makanga muna nzil’a Mbu Ambwaki, wauna Yave kampovesa,+ lumbu yayingi twakangala muna nkondolok’a Mongo a Seyire.
2 I bosi, Yave wampovesa vo:
3 ‘Se kolo kiayingi nukondolokele kala mongo wau. Owau nuviluka kuna node.
4 Vana nkanikinu owu kwa nkangu: “Muna mwingilu a mpangi zeno nuviokela, e mbongo a Esau,+ ana bezingilanga muna Seyire,+ wonga bekunumona.+ Dianu vo, nufwete toma keba.
5 Ke nubanuanisi ko,* kadi kikunuvana kana ndambu a nsi au ko, kana nkutu fulu kia sia e tambi, kadi yavana o Mongo a Seyire kwa Esau se vua diandi.+
6 Nufwete sumba o madia nudia, nufwete sumba o maza nunua.+
7 Kadi, o Yave wa Nzambi aku okusambulanga muna mawonso ovanganga. Oyandi otomene zaya o nkangalu aku mu makanga mama manene. Muna mvu 40 miami, Yave wa Nzambi aku okalanga yaku, kukondelo lekwa ko.”’+
8 Muna kuma kiaki, twavenga e mpangi zeto, e mbongo a Esau,+ ana bezingilanga muna Seyire, twavenga e nzil’a Araba, e nzil’a Elate ye nzil’a Esio-ngebe.+
“Kuna kwalanda, twaviluka yo viokela muna nzil’a makanga ma Moabe.+
9 I bosi, Yave wampovesa vo: ‘Kutokanesa Moabe ko ngatu kunuanisa, kadi kikuvana kana ndambu a nsi andi ko se vua, wau vo yavana e Are kwa mbongo a Loti+ se vua.
10 (Anemime+ i bateka mo kala, akwa nkuma, ayingi ye akwa ntela mianda nga Aneyanaki.
11 Anerefa+ mpe babadikilwanga nze Aneyanaki,+ Anemoabe babayikilanga vo Anemime.
12 Anekore+ i bateka zingila muna Seyire, kansi e mbongo a Esau yabayinga yo kubafukisa yo vinga muna fulu yau,+ wauna Isaele kevanga mu kuma kia nsi ina vo i vua diau, ina kikilu Yave kekubavana.)
13 Owau nuenda, nusauka o Ndimb’a Zerede.’ Muna diadi, twasauka o Ndimb’a Zerede.+
14 Ekolo twakangala tuka kuna Kadese-banea yavana twasauka o Ndimb’a Zerede, mvu 38, yavana e mbandu yawonso ya makesa ma vita yafukiswa muna ndo, wauna o Yave kabadila e ndofi.+
15 Yave walambula o koko kwandi muna yau kimana kabafukisa muna ndo, yavana bafwa.+
16 “Vava makesa mawonso ma vita mafwa vana kati kwa nkangu,+
17 Yave wampovesa diaka vo:
18 ‘O unu, ongeye oviokela muna zunga kia Moabe, i sia vo, Are.
19 Vava ofinama Aneyamone, kubavangi mbi ko ngatu kubatonta, kadi kikuvana kana ndambu a nsi ya Aneyamone ko se vua, wau vo yavana yo kwa mbongo a Loti se vua diau.+
20 E nsi yayina yayikilwanga mpe vo nsi ya Anerefa.+ (Anerefa yau bateka mo zingila, Aneyamone babayikilanga vo Azamezumi.
21 Oyau akwa nkuma, ayingi ye akwa ntela mianda bakala nga Aneyanaki;+ kansi Yave wabafwasa vana meso ma Aneyamone, oyau babakulanesa yo vinga vana fulu kiau.
22 I diau kavanga kwa mbongo a Esau, ana bezingilanga muna Seyire,+ vava kafwasa Anekore+ vana meso mau, muna mpila yayi, babayinga yo zingila vana fulu kiau yamu unu.
23 Vo i Aneyavi, mu mavata bazingilanga yakuna Ngaza,+ yavana Anekafeto+ ana batuka muna Kafeto* babafwasa yo vinga vana fulu kiau.)
24 “‘Nutelama, nusauka o Ndimb’a Arenone.+ Tala, mpene Sikone+ wa Nyamore wa ntinu a Kesebone vana moko maku. Muna kuma kiaki, yantika baka e nsi andi, nuana yandi e vita.
25 O unu, iyantika sia e zakamu yo wonga muna nkangu awonso oku nsi a zulu ana bewá e nsangu mu kuma kiaku. Betokana yo zakama* mu kuma kiaku.’+
26 “I bosi, tuka muna makanga ma Kedemote+ yatwika anati a nsangu kwa Sikone wa Ntinu a Kesebone ye mvovo emi mia luvuvamu:+
27 ‘Yambula yaviokela omu nsi aku. Isingama kaka muna nzila, kivengomoka ku lunene ko ngatu ku lumonso.+
28 Idia kaka o madia okuntekela yo nua kaka o maza mana okuntekela. Yambula kaka yaviokela omu nsi aku kiamalu
29 —i diau bampanga e mbongo a Esau izingilanga muna Seyire ye Anemoabe ana bezingilanga muna Are—yavana isauka e Yodani yo kota muna nsi ina Yave wa Nzambi eto kekutuvana.’
30 Kansi, o Sikone wa Ntinu a Kesebone katuyambula ko twavioka, kadi o Yave wa Nzambi eto* wabadisa e ngindu zandi*+ yo ntim’andi, kimana kanyekola vana moko meto,* wauna numonanga o unu.+
31 “I bosi, Yave wampovesa vo: ‘Tala, ngiantikidi yekola Sikone ye nsi andi kwa ngeye. Yantika baka nsi andi.’+
32 Vava Sikone kavaika yo nkangu andi wawonso mu wanana yeto, twanuana e vita kuna Yaza,+
33 Yave wa Nzambi eto wanyekola kwa yeto, muna kuma kiaki twansunda kumosi yo wan’andi yo nkangu andi wawonso.
34 Muna ntangwa yayina, twakutumuna yo fwasa e mbanza zandi zawonso, kumosi ye akala, akento ye yingiana-ngiana. Ke twavukisa kana mosi ko.+
35 Twelezi kaka twabonga ye lekwa ina twasanza muna mbanza zina twakutumuna.
36 Tuka muna Arowa+ ina muna ndambu a Ndimb’a Arenone (kumosi ye mbanza ina muna ndimba), yakuna Ngiladi, ke vakala mbanza ko twalembi sunda. Yave wa Nzambi eto wayekola e mbanza zawonso kwa yeto.+
37 Kansi, ongeye kwafinama nsi ya Aneyamone ko,+ i sia vo, ndambu yawonso ya Ndimb’a Yaboke+ ye mbanza za zunga kia miongo, ngatu fulu kiankaka kina kasima o Yave wa Nzambi eto.
Mvovo vana yand'a lukaya
^ Yovo “Ke nubatonti ko.”
^ I sia vo, Kerete.
^ Yovo “mona mpasi nga mpasi za wuta.”
^ Yovo “moko maku.”
^ Mvovo wa sina: “mwand’andi.”
^ Mvovo wa sina: “Nzambi aku.”