Nsiku 23:1-25
23 “Konso yakala una ye nkandi zabofoka yovo wazengwa e kiyakala, kalendi kota mu nkutakani a Yave ko.+
2 “O mwan’a zumba kalendi kota mu nkutakani a Yave ko.+ Kana nkutu yamuna mbandu yakumi, ke mosi ko muna mbongo andi okota muna nkutakani a Yave.
3 “Ke mosi ko muna Aneyamone yovo Anemoabe okota muna nkutakani a Yave.+ Kana nkutu yamuna mbandu yakumi, ke mosi ko muna mbongo au okota muna nkutakani a Yave,
4 kadi ke bayiza kunusadisa ko muna nzila muna kunuvana madia yo maza vava nuavaika muna Engipito,+ ye banubokelela Bilami wa mwan’a Beo kuna Peto ya Mesopotamia kimana kanusiba.+
5 Kansi, Yave wa Nzambi aku kazola wila Bilami ko.+ Yave wa Nzambi aku wakitula e sibu se nsambu kuna kwa ngeye,+ kadi Yave wa Nzambi aku wazola.+
6 Muna zingu kiaku kiawonso, kufwete kubasadisa ko bazingila muna luvuvamu yo umvuama.+
7 “Kumengi musi Edome ko, kadi oyandi mpangi aku.+
“Kumengi musi Engipito ko, kadi ongeye nzenza wakituka muna nsi andi.+
8 O wan’au, tuka muna mbandu ina yatatu, balenda kota muna nkutakani a Yave.
9 “Vava osikidisa e ndo mu nuanisa mbeni zaku, ofwete venga konso mfunzuka.*+
10 Avo yakala ofunzukidi wau kavaikidi malume muna fuku,+ kafwete vaika kuna mbazi a ndo, kavutuki mu ndo ko.
11 Muna nkokela, kafwete yowela muna maza, vava ntangwa idimuka olenda kwandi vutuka muna ndo.+
12 Vafwete vaulwa fulu* kuna mbazi a ndo, i kûna ofwete kwenda.
13 Ofwete kala ye timinua muna sadilwa yaku. Vava okonkama kuna mbazi, ofwete tima e wulu muna timinua yo fuka mvindu aku a vumu.
14 Kadi o Yave wa Nzambi aku okangalanga muna ndo aku+ muna kuvuluza yo yekola e mbeni zaku vana moko maku. Muna kuma kiaki, e ndo aku ifwete kala yavauka,+ kimana kalembi mona konso lekwa kiafunzuka ova kati kwaku yo yambula kwenda yaku.
15 “Avo ntaudi otayidi o mfumu andi yo kwiza kwa ngeye, kumvutula kwa mfumu andi ko.
16 Olenda zingila ova kati kwaku, konso fulu kina kesola muna imosi muna mbanza zaku, konso fulu keyangalela. Kufwete kumbangika ko.+
17 “Ke mosi ko muna wan’amakento a Isaele okituka nkembi*+ a tempelo ngatu mosi muna wan’amakala a Isaele okituka nkembi a tempelo.+
18 E nzimbu zifutilu kwa nkembi a nkento* ye nzimbu zifutilu kwa nkembi a yakala* ke zifwete natwa ko muna nzo a Yave wa Nzambi aku muna lungisa nsilu, kadi yau yole lekwa yangemi kuna kwa Yave wa Nzambi aku.
19 “Kulombi nluta ko muna kina wadevesa mpangi aku,+ kiakala nzimbu, madia yovo konso lekwa.
20 Olenda kwaku lomba nzuka kwa nzenza,+ kansi kufwete lomba nluta ko kwa mpangi aku,+ kimana o Yave wa Nzambi aku kasambula muna salu yaku yawonso muna nsi ina ovua.+
21 “Avo osidi nsilu kwa Yave wa Nzambi aku,+ kuzingila ko mu lungisa wo.+ Kadi o Yave wa Nzambi aku lomba kekulomba wo; avo ke wau ko, dikala se sumu kwa ngeye.+
22 Kansi, avo kusidi nsilu ko, kunata sumu ko.+
23 Ofwete lungisa e mvovo mia befo yaku+ yo vanga mana nua aku usidi o nsilu se lukau lwa mvevo kuna kwa Yave wa Nzambi aku.+
24 “Avo okotele mu mpatu a vinyu ya mfinangani aku, olenda kwaku dia e uva konso una ozolele yavana oyukuta, kansi kufwete sia kana uva mosi ko muna natinua kiaku.+
25 “Avo okotele mu mpatu a witi ya mfinangani aku, olenda tolola e ntu mia witi yakola muna koko kwaku, kansi kufwete viokesa sakilwa ko muna witi wa mfinangani aku.+
Mvovo vana yand'a lukaya
^ Yovo “mawonso mambi.”
^ I sia vo, nzo yakete.
^ Yovo “nkento a ndumba.”
^ Yovo “nkento a ndumba.”
^ Mvovo wa sina: “kwa mbwa.”
