Nsiku 28:1-68
28 “Avo ngeye owila kikilu e nding’a Yave wa Nzambi aku muna sia sungididi kia lemvokela e nkanikinu miandi miawonso mina ikukanikinanga o unu, o Yave wa Nzambi aku okutundidika kikilu vana ntandu a zula yawonso yankaka ina ova ntoto.+
2 E nsambu zazi zawonso zikwiza kwa ngeye yo kulwakila,+ wau vo owididi e nding’a Yave wa Nzambi aku:
3 “Osambulwa muna mbanza, osambulwa mpe kuna mbazi a mbanza.+
4 “Besambulwa o wan’aku*+ ye mbongo a ntoto aku yo wan’antete a twelezi yaku, yo wan’a ngombe zaku yo wan’a mameme maku.+
5 “Isambulwa e mbangu aku+ ye niemenua kiaku kia mfumfu.+
6 “Osambulwa muna salu yaku yawonso.*
7 “E mbeni zaku zina zikutelamena, Yave okubasunda vana ntadisi aku.+ Mu nzila imosi bekwizila muna kunuanisa, kansi mu nzila nsambwadi zaswaswana betinina.+
8 Yave oyika e nsambu mu kuma kiaku, mu kuma kia malundilu maku+ ye mu kuma kia salu yaku yawonso, oyandi okusambula kikilu muna nsi ina Yave wa Nzambi aku kekuvana.
9 Yave okusikidisa se nkangu avauka kwa yandi,+ wauna kadila e ndofi,+ wau vo okwamanene lunda e nkanikinu mia Yave wa Nzambi aku yo diatila muna nzila zandi.
10 E nkangu miawonso ova nza mimona vo ongeye mu nkumbu a Yave oyikilwanga+ ye bekumona wonga.+
11 “Yave okuvana wana ayingi ye ulolo wa twelezi yo ntoto utoma yimanga mbongo+ muna nsi ina Yave kadila e ndofi kwa akulu aku vo okuvana yo.+
12 Yave okuziulwila e lundilu diandi diambote, i sia vo, e zulu, muna nokesa e mvula mu nsi aku muna nsungi andi+ yo sambula mawonso ovanga. Odevesa kwa zula yayingi, kansi ongeye kuvava deva ko.+
13 Avo okwamanana lemvokela e nkanikinu mia Yave wa Nzambi aku mina ikukanikinanga o unu vo walunda yo lemvokela, Yave okukitula se ntu, ke nkila ko; ongeye okala kaka vana ntandu,+ ke kunsi ko.
14 Kuvengomoka ko muna mvovo miawonso mina ikunukanikinanga o unu, kiakala ku lunene yovo ku lumonso,+ muna landa nzambi zankaka yo kubasadila.+
15 “Kansi, avo kuwila nding’a Yave wa Nzambi aku ko muna lunda e nkanikinu miandi ye nsiku miandi miawonso ikukanikinanga o unu, e sibu yayi yawonso ikwiza kwa ngeye yo kulwakila:+
16 “Osibwa muna mbanza, osibwa mpe kuna mbazi a mbanza.+
17 “Isibwa e mbangu aku+ ye niemenua kiaku kia mfumfu.+
18 “Besibwa o wan’aku*+ ye mbongo a ntoto aku yo wan’a ngombe zaku yo wan’a mameme maku.+
19 “Osibwa muna salu yaku yawonso.*
20 “Yave okutwikila sibu, mvuanga ye tumbu muna salu yaku yawonso yavana ofukiswa yo vila mu nzaki mu kuma kia mavangu maku mambi ye wau umbembwele.+
21 Yave oyambula vo kimbevo kialaminina yavana kekufukisa muna nsi ina ovua.+
22 Yave okuyelesa nkovol’a lufulu, ngianduka zangolo,+ vimba, tiya twa ngianduka, nsosolo,+ mbangazi angolo ye mbumbu;+ yawonso yayi ikulakama yavana ovila.
23 E zulu diaku dikituka se nsongo, o ntoto aku ukituka se sengwa.+
24 Yave okitula e mvula za nsi aku se senge ye mbundukutu a ntoto, eyi ikunokena tuka kuna zulu yavana ofukiswa.
25 Yave oyambula vo e mbeni zaku zasunda.+ Ongeye mu nzila imosi okwizila mu kubanuanisa, kansi mu nzila nsambwadi zaswaswana otinina; ongeye okituka se lekwa kiangemi kwa yitinu yawonso ya nza.+
26 E vimbu diaku dikituka se madia ma nuni zawonso za zulu ye bulu yawonso ya ntoto, ke vekala muntu ko okubayinga.+
27 “Yave okuyelesa mavumbu ma Engipito, mput’a vumu, makwanza ye yimbevo ya nkand’a nitu, ina kulendi sasukila ko.
28 Yave okuyelesa kimbevo kia lau ye kimpofo+ ye mvuanga.*
29 Babata obabata muna mwini, wauna o mpofo kebabatelanga muna tombe,+ mawonso ovanga ke mesikila ko; vunginikwa ovunginikwa ntangwa zawonso yo yiyua, ke vekala muntu ko okutanina.+
30 Ozitikila nkento, kansi yakala diankaka ovukana yandi mu kingolo. Otunga e nzo, kansi kukala mo ko.+ Okuna mpatu a vinyu, kansi kukuyivelela bundu yandi ko.+
31 E ngombe aku ivondelwa vana meso maku, kansi kudia kana ndambu andi ko. E buluku diaku diyiwa vana ntadisi aku, kansi ke bekuvutulwila dio ko. Mameme maku mevewa kwa mbeni zaku, kansi kukala yo muntu ko okutanina.
32 O wan’aku amakala yo wan’aku amakento bevewa kwa nkangu ankaka+ vana ntadisi aku, okala ye viangi kiau ntangwa zawonso, kansi o moko maku ke melenda vanga diambu ko.
33 E mbongo a ntoto aku ye yawonso ina okutika idiwa kwa nkangu una kuzeye ko,+ bekuvunginika yo kubangika ntangwa zawonso.
34 Olauka mu kuma kia mana o meso maku memona.
35 “Yave okuyelesa mavumbu mampasi muna makungunu ye muna malu maku, mana ke mesasukanga ko, tuka muna tambi yakuna mband’a ntu aku.
36 Ongeye yo ntinu ona okuyisolela, Yave ukununata kwa zula ina ngeye ye akulu aku ke nuazaya ko,+ okwakuna osadila nzambi zankaka, e nzambi za nti ye za matadi.+
37 Okituka se lekwa kiangemi ye kialuvezo,* okituka se kuma kiatusevo vana vena e nkangu miawonso mina Yave kekunata.+
38 “Mbongo ayingi okuna muna mpatu, kansi yakete kaka okutika,+ kadi makonko bedia yo.
39 Okuna mpatu za vinyu yo toma zo lunga-lunga, kansi kunuina mo vinyu ko ngatu vela mo konso ma,+ kadi mimvidi bedia yo.
40 Okala ye nti mia olive muna zunga kiaku kiawonso, kansi kukala ye mazi ma kuyikusa ko, kadi olive zaku zibetomoka.
41 Owuta wan’amakala yo wan’amakento, kansi kukwamanana kala yau ko, kadi mu kinkole bekwenda.+
42 E buka ya vangwa yamoyo* idia e nti miaku miawonso ye mbongo a ntoto aku.
43 O nzenza ozingilanga vovo wina okwamanana tundalala, ekolo ongeye okwamanana kuluka.
44 Oyandi okudevesa, kansi ongeye kukundevesa ko.+ Oyandi okituka se ntu, ongeye okituka se nkila.+
45 “E sibu yayi yawonso+ ikwiza kwa ngeye, ikulakama yo kulwakila yavana ofukiswa,+ kadi kuwididi nding’a Yave wa Nzambi aku ko muna lundanga e nkanikinu miandi ye nsiku miandi mina kakanikina.+
46 E sibu yayi ikwamanana omu ngeye ye muna wan’aku se sinsu kia mvu ke mvu ye lulukisu,+
47 kadi kwasadila Yave wa Nzambi aku ko muna kiese yo luyangalalu lwa ntima vava wakala ye ulolo muna lekwa yawonso.+
48 Yave otwika e mbeni zaku banuanisa, ongeye okubasadila+ ekolo okala ye nzala+ ye vuina ye mvuatu miakete yo kondwa e lekwa yawonso. Osia vangu kia sengwa muna nsingu aku yavana kekufukisa.
49 “Yave okutwasila zula kituka kwandá,+ kuna nsuk’a nza; e mbeni ikunuanisa mu nzaki wauna e ngo-zulu itilumukinanga mu baka e lekwa,+ e zula kivova e ndinga olembi bakula,+
50 e zula kia wantu bena ye ndose zakwitama, ana ke bezitisa nunu ko ngatu songa dienga kwa nleke.+
51 Oyau bedia o wan’a twelezi yaku ye mbongo a ntoto aku yavana ofukiswa. Ke bekusisila lekwa ko, kana mbwaza, kana vinyu ampa yovo mazi, kana wan’a ngombe yovo wan’a mameme yavana bekufwasa.+
52 Bekuzunga yo kukangidila muna mbanza zaku zawonso* muna nsi aku yavana ibwa e yaka yaku yanda ye yangolo ina obundanga e vuvu. Elo, oyau bekuzunga kikilu muna mbanza zaku zawonso muna nsi ina Yave wa Nzambi aku kekuvana.+
53 Wau vo mbeni zaku bekuzunga e nzunga yangolo yo kumwesa e mpasi, ongeye odia wan’aku,* e nsuni mia wan’aku amakala yo wan’aku amakento+ ana Yave wa Nzambi aku kavene.
54 “Kana nkutu i yakala disundidi ngemba ye zingu kiambote vovo wina, ke kala ye nkenda ko muna mpangi andi yovo muna nkento andi anzolwa ngatu muna wan’andi ana besala,
55 ke kubakayila kana ndambu a nsuni mia wan’andi ko ana kedia, wau vo ke kala ye lekwa kiankaka ko kia dia mu kuma kia nzunga yangolo ozungwa ye mpasi omweswa kwa mbeni aku omu mbanza zaku.+
56 Kana nkutu i nkento a ngemba ye zingu kiambote vovo wina, ona ke yindulanga nkutu diata va ntoto ko wau vo zingu kiambote kikilu kena kiau,+ ke kala ye nkenda ko muna yakala diandi dianzolwa, muna mwan’andi ayakala ye muna mwan’andi ankento,
57 ke kubakayila kana nkutu ngudi-a-mwana ko ina ivaikidi vana kati kwa malu mandi yo wana kewuta. Oyandi okubadila kuna nsweki mu kuma kia nzunga yangolo ozungwa ye mpasi omweswa kwa mbeni aku omu mbanza zaku.
58 “Avo kusia sungididi ko kia lemvokela e mvovo miawonso mia Nsiku wau wasonama mu nkanda wau+ yo lembi vumina e nkumbu yayi yankembo ye imwesanga wonga,+ e nkumbu a Yave+ wa Nzambi aku,
59 Yave otwasa kwa ngeye ye kwa wan’aku vuku yampasi, vuku yampwena ye ilembi fokoka,+ yimbevo yangolo ye ilembi sasukanga.
60 Okutwasila diaka yimbevo yawonso ya Engipito, ina wamwenang’o wonga, e yimbevo yayi ikulaminina kikilu.
61 Vana ntandu, Yave okunutwasila yimbevo yawonso ye vuku ina ke yasonama ko mu nkand’a Nsiku wau yavana nufukiswa.
62 Kana una vo nuwokele kwayingi nze ntetembwa za zulu,+ akete kaka muna yeno besala,+ kadi kuwididi nding’a Yave wa Nzambi aku ko.
63 “Wauna Yave kakadila ye kiese kia kunuvuamisa yo kunuwokesa, i wauna mpe Yave kekadila ye kiese kia kunufwasa yo kunufukisa; nuvuzwa muna nsi ina ovua.
64 “Yave okumwanganisa vana vena zula yawonso, tuka ku nsuka eyi ya ntoto yakuna nsuka yankaka ya ntoto,+ okwakuna osadila nzambi za nti ye za matadi, zina kwazaya ko, ongeye ye akulu aku.+
65 Kukala ye luvuvamu ko vana vena e zula yayi+ ngatu fulu kia vundisila malu maku. Kadi okwakuna, Yave okuvana ntim’a zaka-zaka,+ yoya kwa meso yo kondwa kwa vuvu.*+
66 O moyo aku mu vonza kiampwena ukala, wonga omona muna fuku ye muna mwini; kukala ye ziku ko kana vo ovuluka.
67 Muna mene ovova vo: ‘Ekwe kele vo kikala kwandi nkokela!’ Muna nkokela ovova vo: ‘Ekwe kele vo kikala kwandi mene!’ mu kuma kia wonga omona muna ntima aku ye mu kuma kia mana o meso maku memona.
68 Yave okuvutula kieleka kuna Engipito muna nzaza, muna nzila ina ivovese vo: ‘Kusinga yo mona nkutu diaka ko,’ okwakuna nukuyiteka kwa mbeni zeno se ntaudi zamakento ye ntaudi zamakala, kansi ke vekala muntu ko okusumba.”
Mvovo vana yand'a lukaya
^ Mvovo wa sina: “e mbongo a vumu kiaku.”
^ Mvovo wa sina: “Osambulwa vava okota, osambulwa vava ovaika.”
^ Mvovo wa sina: “e mbongo a vumu kiaku.”
^ Mvovo wa sina: “Osibwa vava okota, osibwa vava ovaika.”
^ Yovo “luzengeneko lwa ntima.”
^ Mvovo wa sina: “ye kingana.”
^ Yovo “E makonko.”
^ Mvovo wa sina: “mavitu maku mawonso.”
^ Mvovo wa sina: “e mbongo a vumu kiaku.”
^ Yovo “lutovoko lwa moyo.”
