Nsiku 29:1-29
29 Emiami i mvovo mia kangu dina Yave kakanikina Mose vo kakanga yo nkangu a Isaele muna nsi ya Moabe, vana ntandu a kangu dina kakanga yau vana Korebe.+
2 Mose obokele Isaele yawonso yo kubavovesa vo: “Oyeno nuamona mawonso mana Yave kavanga vana meso meno muna nsi ya Engipito, kwa Faro ye ntaudi zandi zawonso ye nsi andi yawonso,+
3 e tumbu yanene ina yamona meso maku,* e sinsu yayina yanene ye masivi.+
4 Kansi, o Yave kanuvene ntima wa bakulwila ko yovo meso ma mwena ngatu matu ma wila yamu unu kiaki.+
5 ‘Ekolo yanufilanga mu mvu 40 muna makanga,+ e mvuatu nuavuata ke miafwasuka ko muna nitu zeno, e nsampatu nuavuata ke zafwasuka ko muna malu meno.+
6 Ke nuadia mbolo ko, ke nuanua vinyu ko ngatu konso lekwa kiankolwa, kimana nuazaya wo vo mono i Yave wa Nzambi eno.’
7 I bosi, nulweke ova fulu kiaki, o Sikone wa ntinu a Kesebone+ yo Onge wa ntinu a Basani,+ batuvaikila mu kwiza kutunuanisa, kansi twabasunda.+
8 Twabaka e nsi au yo vana yo se vua kwa Anerubeni, Anengadi ye kwa bula-kati kwa kanda dia Anemanase.+
9 Muna kuma kiaki, nulunda e mvovo mia kangu diadi yo lemvokela mio, kimana mawonso nuvanga matoma sikila.+
10 “O unu, yeno awonso nutelamene ova ntadisi a Yave wa Nzambi eno: e ntu mia makanda meno, akuluntu eno, akengi eno ye akala awonso a Isaele,
11 wan’eno, akento eno+ ye nzenza zeno+ ana bena ova kati kwa ndo eno, tuka muna ndiona okutiaminanga e nkuni yamu ndiona okutekelanga o maza.
12 Ongeye wina vava kimana wakota muna kangu dia Yave wa Nzambi aku ye muna ndofi andi, ina Yave wa Nzambi aku kedia yaku o unu+
13 kimana kakitula se nkangu andi o unu,+ oyandi kakala Nzambi aku,+ wauna kasila o nsilu ye wauna kadila e ndofi kwa akulu aku Abarayama,+ Isaki+ yo Yakobo.+
14 “Owau, ke kwa ngeye kaka ko ikanganga e kangu diadi yo dia ndofi yayi,
15 kansi kwa awana batelamene yeto o unu ova ntadisi a Yave wa Nzambi eto ye kwa awana ke bena yeto ko o unu ovava.
16 (Kadi nutomene zaya una wakala e zingu kieto muna nsi ya Engipito ye una twaviokela vana kati kwa zula yayingi muna nkangalu eto.+
17 Oyeno nuamona e lekwa yau yangemi, i sia vo, teke yau yangemi*+ ya mabaya ye matadi, ya palata ye wolo, ina yakala vana bena.)
18 Nuyikenga kimana vovo nuina o unu valembi kala yakala yovo nkento, vumu yovo kanda divengomona ntim’andi muna Yave wa Nzambi eto yo kwenda sadila nzambi za zula yoyo,+ valembi kala mpe mwanzi vovo nuina uwuta mbongo a mpondi ye a ndudi.+
19 “Kansi, avo muntu owidi e mvovo mia ndofi yayi, kayisana muna ntim’andi oku vo: ‘Mu luvuvamu ikala, kana nkutu nkwamanene diatila muna nzila za ntim’ame;’ muna mpila yayi, kafwasa yawonso* ina muna nzil’andi,
20 Yave ke zola kunloloka ko.+ Kansi, o makasi mayingi ma Yave mefusukila muntu ndioyo, e sibu yawonso yasonama mu nkanda wau ikunlwakila,+ Yave ovunzuna e nkumbu a muntu ndioyo oku nsi a zulu.
21 I bosi, Yave okumvambula ye makanda mawonso ma Isaele kimana e mpasi zanlwakila, mun’owu wa sibu yawonso ya kangu diasonama mu nkanda wau wa Nsiku.
22 “Vava e mbandu ilanda ya wan’eno ye nzenza ana betuka kwandá bemona e vuku ya nsi, e yimbevo ina Yave katwese mu nsi—
23 lengo, mungwa yo tiya, kimana e nsi yawonso yalembi kunua yovo mena mbongo ngatu mena konso titi, nze una wafwasilwa Sodoma ye Ngomora,+ Adema ye Seboime,+ ina Yave kafwasa muna makasi mandi ye muna nsita zandi—
24 oyau ye zula yawonso beyuvula vo: ‘Ekuma Yave kavangidi diambu diadi mu nsi yayi?+ Nki kitwese makasi mama mayingi?’
25 Ozevo bevutula vo: ‘E kuma kadi kangu dia Yave babembola,+ o Nzambi a akulu au, e kangu dina kakanga yau vava kabavaikisa muna nsi ya Engipito.+
26 Kansi, oyau bayenda sadila nzambi zankaka yo kubavumbamena, e nzambi zina ke bazaya ko, zina o Nzambi kabavanina nswa ko vo basambila.+
27 I bosi, makasi mayingi ma Yave malwakila e nsi yayi mu twasila yo e sibu yawonso yasonama mu nkand’a nsiku.+
28 Muna kuma kiaki, Yave wabavuza muna nsi au muna makasi mandi, nsita+ ye fwenka diayingi yo kubanata ku nsi yankaka, kuna bena o unu.’+
29 “O mambu maswekama i ma Yave wa Nzambi eto,+ kansi o mambu masengomonua i meto ye ma wan’eto yakwele mvu, kimana twalemvokela e mvovo miawonso mia Nsiku wau.+
Mvovo vana yand'a lukaya
^ Yovo “ntonta zanene zina zamona meso maku.”
^ O mvovo wa Kiyibere usadilu ovava nanga ngwizani wina yo mvovo “doti,” usadilwanga se mvovo a luvezo.
^ Mvovo wa sina: “kafwasa ina yatoma nuikwa o maza kumosi y’eyi yayuma.”
