Nsiku 3:1-29
3 “I bosi, tuvilukidi yo tombokela muna nzil’a Basani. O Onge wa ntinu a Basani ovaikidi kumosi yo nkangu andi wawonso kawanana yeto muna kutunuanisa kuna Ederei.+
2 Muna kuma kiaki, Yave umpovese vo: ‘Kumoni wonga wandi ko, kadi iyekola Onge vana moko maku kumosi yo nkangu andi wawonso ye nsi andi. Ongeye ovanga kwa yandi wauna wavanga kwa Sikone wa ntinu a Aneyamore, ona wazingilanga muna Kesebone.’
3 Muna diadi, Yave wa Nzambi eto mpe wayekola Onge wa ntinu a Basani yo nkangu andi wawonso vana moko meto, twabavonda yavana ke vasala kana mosi ko muna nkangu andi.
4 I bosi, twakutumuna e mbanza zandi zawonso. Ke vakala mbanza ko twalembi kubakutumuna—mbanza 60, e zunga kiawonso kia Arengobe, e kintinu kia Onge muna Basani.+
5 E mbanza zazi zawonso zazungwa e yaka yandá, mavitu ye mbindi. Zakala mpe ye ulolo wa mavata.
6 Kansi, twafwasa e mbanza zawonso,+ wauna twavanga kwa Sikone wa Ntinu a Kesebone, twafwasa e mbanza zawonso kumosi ye akala, akento ye yingiana-ngiana.+
7 Twabonga e twelezi yawonso ye sanzu dia zimbanza.
8 “Muna ntangwa yayina, twakutumuna e nsi ya atinu wole a Aneyamore+ ana bakala muna zunga kia Yodani, tuka kuna Ndimb’a Arenone yakuna Mongo a Keremone+
9 (esi Sidone bayikilanga o mongo wau vo Sireyone, Aneyamore bayikilanga wo vo Seni).
10 Twakutumuna e mbanza zawonso zakala vana mongo alelama, e Ngiladi yawonso, e Basani yawonso yakuna Saleka ye Ederei,+ e mbanza za kintinu kia Onge muna Basani.
11 Kadi o Onge wa Ntinu a Basani yandi kaka wasala muna Anerefa. E nkel’andi ya luziku yasengwa yakala, ina kuna Raba ya Aneyamone yamu unu. Ina ye yinkoso vua* muna lá ye yinkonso yá muna lambuka, mun’owu wa tezelo isadilwanga.
12 Muna ntangwa yayina, twavua e nsi yayi: eyi yatuka kuna Arowa,+ eyi ina muna Ndimb’a Arenone ye ndambu a zunga kia miongo kia Ngiladi. Yavana e mbanza za nsi yayi kwa Anerubeni ye Anengadi.+
13 E ndambu ya Ngiladi ina yasala ye Basani yawonso ya kintinu kia Onge mpene yo kwa bula-kati kwa kanda dia Manase.+ E zunga kiawonso kia Arengobe, eki kivuilu kwa Basani, kiazayakana vo i nsi ya Anerefa.
14 “O Yaire+ wa mwan’a Manase wabaka e zunga kiawonso kia Arengobe+ yakuna mwingilu a Anemingesu ye Anemaka,+ ovene mavata ma Basani e nkumbu a yandi kibeni, Kavote-yaire*+ yamu unu.
15 Mpene Ngiladi kwa Makire.+
16 Kuna kwa Anerubeni ye Anengadi,+ mpene zunga kia Ngiladi yakuna Ndimb’a Arenone (vana kati kwa ndimba i mwingilu), yakuna Yaboke, o ndimba una vo i mwingilu a Aneyamone.
17 Mpene mpe Araba, nkoko a Yodani yo nlambu andi, tuka kuna Kinerete yakuna Mbu wa Araba, i sia vo, Mbu a Mungwa,* vana sina dia miongo mia Pisenga kuna este.+
18 “I bosi, yanuvana nkanikinu owu: ‘Yave wa Nzambi eno unuvene nsi yayi nuavua yo. O makesa meno mawonso mevuata e nuaninua yo sauka vana ntadisi a mpangi zeno, Aneyisaele.+
19 Akento eno kaka ye yingiana-ngiana ye twelezi (ntomene wo zaya vo twelezi yayingi luna yau) bekwamanana zingila muna mbanza inuvene,
20 yavana o Yave kevana e vundu kwa mpangi zeno, nze una kavangidi kwa yeno, oyau mpe bevua e nsi ina Yave wa Nzambi eno kekubavana kuna simu dia Yodani. I bosi nuvutuka, konso muntu muna vua diandi dina inuvene.’+
21 “Muna kolo kiakina yakanikina Yosua vo:+ ‘Omwene muna meso maku mana Yave wa Nzambi eno kavangidi kwa atinu wole awaya. O Yave ovanga diau dimosi kwa yintinu yawonso ina kuna simu dina osauka.+
22 Ke nubamoni wonga ko, kadi Yave wa Nzambi eno, yandi okununuaninanga.’+
23 “Muna kolo kiakina, yadodokela Yave vo:
24 ‘E Mfumu Yave, ongeye yantikidi songa kwa selo kiaku o nene waku yo koko kwaku kwankuma,+ kadi nkia nzambi ina kuna zulu yovo ova ntoto olenda vanga mavangu mama mankuma nze ngeye?+
25 Dodokolo, yambula yasauka yamona e nsi yambote kuna simu dia Yodani, e zunga kiaki kiambote kia miongo ye Lebanone.’+
26 Kansi o Yave wakwamanana kumfungila makasi mu kuma kieno,+ kazola kungwila ko. Yave wampovesa vo: ‘Sila vovo! Kumpovesa diaka diambu diadi ko.
27 Tomboka kuna mbat’a Pisenga+ yo tala kuna weste, kuna node, kuna sude ye kuna este, wamona e nsi muna meso maku, kadi kusauka Yodani yayi ko.+
28 Tumbika Yosua+ se mfidi, unkasakesa yo kunkumika, kadi yandi ovita kuna ntwal’a nkangu wau muna sauka,+ yandi mpe okubasadisa bavua e nsi ina omona.’
29 Mawonso mama mavangama ekolo twakala muna ndimba, mantalani ye Bete-peo.+
Mvovo vana yand'a lukaya
^ Ina ye nsasa vo: “Mavata ma Yaire ma Nzo za Ngoto.”
^ I sia vo, Mbu Afwa.