Nsiku 31:1-30
31 I bosi, o Mose ovovele mvovo miami kwa Isaele yawonso,
2 oku vo: “O unu, kimbuta kia mvu 120 se ngina.+ Kilendi diaka kunufila ko,* kadi Yave wampovesa vo: ‘Ongeye kusauka Yodani yayi ko.’+
3 O Yave wa Nzambi aku yandi osauka kuna ntwal’aku, yandi kibeni ofukisa e zula yayi ova ndose aku, ongeye ovua e nsi au.+ O Yosua yandi okunufila mu sauka,+ wauna Yave kavova.
4 Yave okubavanga wauna kavanga kwa Sikone+ yo Onge,+ atinu a Aneyamore ye nsi au vava kabafukisa.+
5 Yave okubasunda mu kuma kiaku, ongeye okubavanga mun’owu wa nkanikinu wawonso inuvene.+
6 Kala yo unkabu, kumama.+ Kumoni wonga ko ngatu zakama vana ndose au,+ kadi o Yave wa Nzambi aku yandi okangalanga yaku. Ke kuyambula ko ngatu kubembola.”+
7 I bosi, Mose obokele Yosua yo kumvovesela vana meso ma Isaele yawonso vo: “Kala yo unkabu,+ kumama, kadi ngeye onata o nkangu wau muna nsi ina Yave kadila ndofi kwa akulu au vo okubavana yo, ongeye okubavana yo se vua.+
8 O Yave yandi okangalanga kuna ntwal’aku, oyandi okwamanana kala yaku.+ Ke kuyambula ko ngatu kubembola. Kumoni wonga ko ngatu vumiswa.”+
9 I bosi, Mose osonekene Nsiku wau+ yo vana wo kwa anganga, i sia vo, Anelevi, ana benatanga e nkel’a kangu dia Yave ye kwa akuluntu awonso a Isaele.
10 Mose ubakanikini vo: “Kuna mfoko a konso mvu nsambwadi, muna ntangwa yasikidiswa muna mvu wa yambulwila e mfuka,+ muna nsungi a Nkinzi a Sudi,*+
11 vava Isaele yawonso ikwenda vana ntadisi a Yave+ wa Nzambi aku vana fulu kina kesola, ofwete tanga o Nsiku wau kimana Isaele yawonso yawá wo.+
12 Kutakesa o nkangu,+ akala, akento, wana* yo nzenza aku ona ozingilanga omu mbanza zaku,* kimana bawá yo longoka oma ma Yave wa Nzambi aku yo kumvumina yo sia sungididi kia lemvokela e mvovo miawonso mia Nsiku wau.
13 Ozevo, o wan’au ana ke bazeye Nsiku wau ko bewá+ yo longoka vumina Yave wa Nzambi eno muna lumbu yawonso ina nuzingila muna nsi ina nuvua vava nusauka Yodani.”+
14 I bosi, Yave ovovese Mose vo: “Tala, e ntangw’a lufwa lwaku ifinamene.+ Bokela Yosua, nuenda* muna saba kia wananina, kimana yantumbika se mfidi.”+ Muna kuma kiaki, Mose yo Yosua bele yo kuyisunzula kuna saba kia wananina.
15 Yave omonekene vana saba muna lunzi dia tuti, e lunzi dia tuti ditelamene vana mwelo a saba.+
16 Yave ovovese Mose vo: “Tala, ke kolo ko ofwa,* o nkangu wau uyantika sambila* nzambi za nzenza zina zikubazunga muna nsi ina bekwenda.+ Oyau bekumbembola+ yo kulula e kangu diame dina yakanga yau.+
17 Muna ntangwa yayina, makasi mame mekubafusukila,+ ikubabembola+ yo kubasweka e ndose ame+ yavana befwaswa. I bosi, vava bebwilwa sumbula ye mpasi zayingi,+ bevova vo: ‘Nga mu kuma kia sia vo Nzambi eto kena diaka va kati kweto ko i tubwidilu e sumbula kiaki?’+
18 Kansi, muna lumbu kiakina ikwamanana sweka e ndose ame, mu kuma kia mambu mawonso mambi bavangidi, wau bavilukidi kwa nzambi zankaka.+
19 “Owau, nusoneka nkunga wau,+ nulonga wo kwa Aneyisaele.+ Nubalonga wo* kimana o nkunga wau wakala se mbangi ame mu kuma kia nkangu a Isaele.+
20 Vava ikubanata muna nsi yadila e ndofi kwa akulu au+—nsi ifwamfumukanga kimvumina yo wiki+—badia, bayukuta yo vatumuka,*+ beviluka kwa nzambi zankaka yo kubasadila, bekumveza yo kulula e kangu diame.+
21 Vava bebwila sumbula ye mpasi zayingi,+ o nkunga wau ukala se mbangi kwa yau (kadi o wan’au ke bafwete wo vilakana ko), kadi ntomene zaya makani bena mau+ vitila nkutu yabakotesa muna nsi yadila e ndofi.”
22 Muna kuma kiaki, Mose osonekene nkunga wau muna lumbu kiakina yo longa wo kwa Aneyisaele.
23 I bosi, Oyandi* otumbikidi Yosua+ wa mwan’a Nuni yo vova vo: “Kala yo unkabu,+ kumama, kadi ngeye okotesa Aneyisaele muna nsi ina yabadila e ndofi,+ omono ikwamanana kala yaku.”
24 Vava Mose kafokola soneka e mvovo miami miawonso mia Nsiku wau muna nkanda,+
25 Mose okanikini Anelevi, anati a nkel’a kangu dia Yave, oku vo:
26 “Nubonga nkanda wau wa Nsiku+ yo sia wo vana ndambu a nkel’a kangu+ dia Yave wa Nzambi eno, wakala se mbangi muna kunufundisa.
27 Kadi mono kibeni ntomene zaya ukolami waku+ yo lulendo lwaku.+ Avo nukolamenanga Yave wau ngina moyo ova nuina, ozevo aweyi dikala vava ifwa?
28 Unkutakesela akuluntu awonso a makanda meno ye akengi eno, yavova e mvovo miami muna matu mau, yambula awonso bena kuna zulu y’ova ntoto bakala se mbangi zame mu kuma kiau.+
29 Kadi ntomene wo zaya vo kuna nima lufwa lwame, oyeno nuvanga mambu mambi+ yo vengomoka muna nzila ina inukanikini. E sumbula kikunubwila kieleka+ muna lumbu ilanda, wau vo nuvanga mambu mambi vana meso ma Yave, nukumfungisa makasi mu kuma kia salu ya moko meno.”
30 I bosi, muna matu ma nkutakani yawonso ya Isaele, Mose ovutukidi e mvovo mia nkunga wau tuka kuna lubantiku yakuna mfoko, oku vo:+
Mvovo vana yand'a lukaya
^ Mvovo wa sina: “Kilendi vaika diaka ko yovo kota.”
^ Yovo “Saba ya Zingila mu Kolo Kiakete.”
^ Mvovo wa sina: “yingiana-ngiana.”
^ Mvovo wa sina: “mavitu maku.”
^ Yovo “nubonga e fulu yeno.”
^ Yovo “tá zumba kia mwanda ye.”
^ Mvovo wa sina: “ke kolo ko oleka yo mase maku.”
^ Mvovo wa sina: “Nusia wo muna nua miau.”
^ Mvovo wa sina: “vonga.”
^ Nanga Nzambi uyikanga.
