Nsiku 9:1-29
9 “E Isaele, wá, o unu osauka Yodani+ mu kota yo yinga e zula ina isundidi onene yo nkuma,+ mbanza zanene ye zazungwa e yaka yamuna zulu,*+
2 wantu anene ye akwa ntela miandá, Aneyanaki,+ ana ozeye ye ana wawila e nsangu vo: ‘Nani olenda telama vana vena wan’a Anaki?’
3 Muna diadi, o unu zaya dio vo Yave wa Nzambi aku okuvita kuna ntwala.+ Oyandi tiya twambomoni,+ okubafukisa. Okubasunda vana meso meno kimana wabayinga* yo kubafwasa mu nzaki, wauna Yave kasila o nsilu.+
4 “Vava Yave wa Nzambi aku kekubayinga ova ntadisi aku, kuvovi ko muna ntim’aku vo: ‘I mu kuma kia unsongi wame o Yave kankotesele mu nsi yayi yavua yo.’+ Kansi, mu kuma kia mbi ya zula yayi+ i kabayingidi o Yave ova ntadisi aku.
5 Ke mu kuma kia unsongi waku ko yovo singama kwa ntim’aku okotela muna nsi au yo vua yo. Kansi, i mu kuma kia mbi ya zula yayi i kekubayingilanga o Yave wa Nzambi aku ova ntadisi aku,+ muna lungisa e mvovo mina Yave kadila e ndofi kwa akulu aku, Abarayama,+ Isaki+ yo Yakobo.+
6 Ozevo, zaya wo vo ke mu kuma kia unsongi waku ko o Yave wa Nzambi aku kekuvaninanga e nsi yayi yambote wavua yo, kadi nu nkangu a ntu angolo.*+
7 “Kuvilakani ko, sungamenanga una watontela Yave wa Nzambi aku muna makanga.+ Tuka muna lumbu nuasisila e nsi ya Engipito yavana nulweke va fulu kiaki, oyeno nukolamenanga Yave.+
8 Nuatonta Yave kana nkutu kuna Korebe, Yave wanufungila kikilu makasi ye wabaka nzengo za kunufukisa.+
9 Vava yatomboka kuna mongo mu tambula e babu ya matadi,+ e babu ya kangu dina Yave kakanga yeno,+ yakala kuna mongo lumbu 40, fuku yo mwini,+ kiadia lekwa ko ngatu nua maza.
10 I bosi, Yave wampana babu yole ya matadi yasonamena muna nlembo a Nzambi, muna babu yayi mwakala ye mvovo miawonso mina Yave kavova kwa yeno vana mongo, tuka vana kati kwa tiya, muna lumbu kina nuakutakana vavana.*+
11 Kuna mfoko a lumbu 40, fuku yo mwini, Yave wampana e babu yole ya matadi, e babu ya kangu,
12 Yave wampovesa vo: ‘Telama, kulumuka mu nzaki, kadi o nkangu aku una wavaikisa muna Engipito bavangidi oma mambi.+ Babendomokene mu nzaki muna nzila ina yabakanikina vo balanda. Bayivangidi teke kia sengwa.’*+
13 I bosi, Yave wampovesa vo: ‘Mbwene o nkangu wau, i nkangu a ntu miangolo.*+
14 Yambula yabafwasa yo vunzuna e nkumbu zau oku nsi a zulu, ongeye yakitula se zula kibasundidi o nkuma yo lutangu.’+
15 “I bosi, yaviluka yo kulumuka tuka kuna mongo ekolo mongo wakwamanga o tiya,+ e babu yau yole ya kangu yakala ova moko mame.+
16 Ntadidi yo mona vo Yave wa Nzambi eno nuasumukina! Nuayivangila mwan’a ngombe a sengwa.* Nuavengomoka mu nzaki muna nzila ina Yave kanukanikina vo nualanda.+
17 Muna kuma kiaki, yabonga e babu yau yole yo tuba yo vana ntoto muna moko mau mole yo wula yo vana meso meno.+
18 I bosi, yafukama vana ntadisi a Yave, nze una yateka vanga, lumbu 40, fuku yo mwini. Kiadia lekwa ko ngatu nua maza,+ mu kuma kia masumu mawonso nuavola vava nuavanga oma mambi vana meso ma Yave yo kumfungisa makasi.
19 Kadi wonga yakala wau mu kuma kia makasi mayingi mana o Yave kanufungila,+ wabaka e nzengo za kunufukisa. Kansi, o nkumbu wau mpe Yave wangwila.+
20 “Yave wafungila kikilu Arone makasi yo baka nzengo za kumfwasa,+ kansi o nkumbu wauna yadodokela mpe mu kuma kia Arone.
21 I bosi, yabonga e lekwa kiasumu kina nuavanga, o mwan’a ngombe,+ inyokele vana tiya; inkosomwene, intutidi emvimba yavana kakituka se mbundukutu, ntubidi e mbundukutu muna nkoko watukanga kuna mongo.+
22 “Vana ntandu, nuafungisa mpe Yave makasi kuna Tabera,+ kuna Masa+ ye kuna Kiberote-atava.+
23 Vava Yave kanutuma tuka kuna Kadese-banea,+ oku vo: ‘Nutomboka yo vua e nsi ina kikilu ikunuvana!’ Oyeno nuakolamena diaka lutumu lwa Yave wa Nzambi eno,+ ke nuasonga lukwikilu ko+ muna yandi ye ke nuanlemvokela ko.
24 Oyeno nukolamenanga Yave tuka yanuzayila.
25 “Muna diadi, yavumbama vana ntadisi a Yave lumbu 40, fuku yo mwini,+ yavumbama mu mpila yayi kadi Yave wavova vo fukisa kekunufukisa.
26 Yayantika dodokela Yave yo vova vo: ‘E Mfumu Yave, kufwasi nkangu aku ko. Oyau vua diaku dia kivuila,+ ana wakûla muna nkum’aku* yo kubavaikisa muna Engipito yo koko kwankuma.+
27 Sungamena e selo yaku Abarayama, Isaki yo Yakobo.+ Kusie sungididi ko muna ntu angolo a nkangu wau, muna mbi au ye sumu diau.+
28 Avo ke wau ko, o nkangu a nsi ina watubongela uvova vo: “Yave kalendele kubalwakisa ko muna nsi ina kabasila o nsilu, wau vo menga kekubamenganga, ubavaikisi omwamu kabavondela muna makanga.”+
29 Kadi oyau i nkangu aku ye vua diaku dia kivuila,+ ana wavaikisa yo nkuma aku anene yo koko kwaku kwalambuka.’+
Mvovo vana yand'a lukaya
^ I sia vo, yazungwa e yaka yandá.
^ Yovo “wabakutumuna o ntoto.”
^ Mvovo wa sina: “nsingu zangolo.”
^ Yovo “muna lumbu kia lukutakanu.”
^ Yovo “teke kiazunzwa.”
^ Mvovo wa sina: “nsingu zangolo.”
^ Yovo “azunzwa.”
^ Yovo “muna nene waku.”
