Ntalu 12:1-16
12 Mireyame yo Arone bayantikidi vovela Mose e mbi mu kuma kia nkento a musi Kuse kasompa, kadi o nkento kasompa musi Kuse.+
2 Bavovele vo: “Nga o Yave mu Mose kaka kavovela? Nga kavovela mpe mu yeto ko?”+ O Yave wawanga dina bavovanga.+
3 Kansi, o Mose i muntu wasunda o lembama vana vena wantu awonso*+ ova ntoto.
4 Vana vau, Yave ovovese Mose, Arone yo Mireyame vo: “Nuvaika yeno atatu, nuenda kuna saba kia wananina.” Yau atatu bavaikidi.
5 Yave okulumukini muna lunzi dia tuti,+ otelamene vana mwelo a saba, obokele Arone yo Mireyame. Yau awole bafinamene.
6 I bosi ovovele vo: “Dodokolo, nuwá e mvovo miame. Kele vo vakala ngunz’a Yave vovo nuina, omono yadi kuyisunzula kwa yandi muna mona-meso+ ye yadi mokena yandi muna ndozi.+
7 Kansi, kuna kwa Mose wa selo kiame ke diau ko ivanganga! Wavewa kiyekwa kia nzo ame yawonso.*+
8 Imokenanga yandi+ o mantalani,* ke kukinsweki ko, ke mu ngwala ko; omonanga e mpw’a Yave. Ozevo, ekuma nukabukidi vovela Mose wa selo kiame e mbi?”
9 Muna kuma kiaki, o makasi ma Yave mabafusukidi, okatukidi vana bena.
10 E tuti dikatukidi vana ntandu a saba, vana vau Mireyame obakamene wazi wampembe nga mvula ampembe.+ I bosi, Arone ovilukidi kwa Mireyame, omwene vo Mireyame obakamene wazi.+
11 Vana vau, Arone ovovese Mose vo: “Idodokel’e mfumu ame! Do, kuyambula ko vo twatumbwa mu kuma kia sumu diadi! Dina tuvangidi dia uzowa.
12 Dodokolo, kuyambula Mireyame ko kakwamanana nga mwana owutukidi wafwa, ona oyantikidi wola e nitu!”
13 Mose oyantikidi dodokela Yave, oku vo: “E Nzambi dodokolo, sasula Mireyame Do!”+
14 Yave ovutwidi Mose vo: “Kele vo se diandi kantaulwila mete vana lose, nga kadi fusuka nsoni mu lumbu nsambwadi ko e? Yambula kasiwa va fulu kia yandi kaka mu lumbu nsambwadi kuna mbazi a ndo,+ i bosi, olenda kwandi twaswa muna ndo.”
15 Muna kuma kiaki, Mireyame osilu va fulu kia yandi kaka kuna mbazi a ndo mu lumbu nsambwadi,+ o nkangu ke walondoka ko yavana o Mireyame katwaswa muna ndo.
16 I bosi, o nkangu ulondokele tuka muna Kaserote,+ wele sikidisa e ndo muna makanga ma Parani.+
Mvovo vana yand'a lukaya
^ Yovo “wasunda kuyikulula vana vena wantu awonso.”
^ Mvovo wa sina: “Muna nzo ame yawonso, oyandi osonganga vo nkwa kwikizi.”
^ Mvovo wa sina: “Imokenanga yandi nua yo nua.”
