Ntalu 13:1-33
13 Yave ovovese Mose vo:
2 “Tuma wantu benda langa* e nsi ya Kenani, ina ivana kwa Aneyisaele. Nutuma muntu mosi muna konso kanda dia mase mau, konso muntu kafwete kala mfumu+ vana bena.”+
3 Muna kuma kiaki, Mose ubatumini tuka kuna makanga ma Parani+ mun’owu wa lutumu lwa Yave. Yau awonso ntu muna Aneyisaele.
4 Ezazi i nkumbu zau: muna kanda dia Rubeni, Samua wa mwan’a Zaku;
5 muna kanda dia Simeone, Safati wa mwan’a Kori;
6 muna kanda dia Yuda, Kalebe+ wa mwan’a Yefune;
7 muna kanda dia Yisakare, Yingale wa mwan’a Yosefe;
8 muna kanda dia Eferaime, Oseya+ wa mwan’a Nuni;
9 muna kanda dia Benyamini, Paleti wa mwan’a Rafu;
10 muna kanda dia Zebulune, Ngadiele wa mwan’a Sodi;
11 muna kanda dia Yosefe,+ e kanda dia Manase,+ Ngade wa mwan’a Susi;
12 muna kanda dia Dani, Amiele wa mwan’a Ngemale;
13 muna kanda dia Asere, Setu wa mwan’a Mikaele;
14 muna kanda dia Nafetali, Nakebi wa mwan’a Vofesi;
15 muna kanda dia Ngadi, Ngwele wa mwan’a Maki.
16 Ezazi i nkumbu za wantu ana katuma o Mose mu kwenda langa e nsi. Mose ovene e nkumbu Yosua*+ kwa Oseya wa mwan’a Nuni.
17 Vava Mose kabatumini benda langa e nsi ya Kenani, ubavovese vo: “Nutombokela kuna nzil’a Nengebe, i bosi nutomboka kuna zunga kia miongo.+
18 Nutala e nsi una ina,+ nutala mpe kana vo nkangu uzingilanga mo bakumama yovo batovoka, kana vo akete yovo ayingi,
19 kana vo e nsi yambote yovo yambi, kana vo e mbanza zina bezingilanga zazungwa e yaka yovo ke zazungwa yaka ko.
20 Nutala kana vo ntoto utoma yimanga e mbongo yovo ve,+ kana vo nti mina mo yovo ve. Nukala akwa unkabu,+ nubonga e yaka bundu ya nsi.” E nsungi yayina ya uva zantete zabwaka.+
21 Muna kuma kiaki, batombokele yo langa e nsi, tuka kuna makanga ma Zini+ yakuna Rekobe,+ yakuna Lebo-Kamati.*+
22 Vava batombokele muna Nengebe, balweke muna Keberone,+ muna mwazingilanga Akimani, Sesai, Talemai+ ye Aneyanaki.+ Vo i Keberone, yatungwa mvu nsambwadi vitila Soane ya Engipito.
23 Vava balweke muna Ndimb’a Esekole,+ bazengele tayi kiakala ye kangi kimosi kia uva, kina kianatwa kwa wantu wole muna nti; batwese mpe nganata* ye bundu ya nsanda.+
24 Bayikidi e fulu kiokio vo Ndimb’a Esekole,*+ mu kuma kia kangi kina Aneyisaele bazenga vavana.
25 Kuna mfoko a lumbu 40+ ina bayenda langa e nsi, bavutukidi.
26 Bezidi kwa Mose yo Arone yo nkangu awonso a Isaele muna makanga ma Parani, kuna Kadese.+ Batwese nsangu kwa nkangu awonso yo kubasonga e bundu ya nsi.
27 Bavovele kwa Mose vo: “Tukotele muna nsi ina ututumini, ifwamfumukanga kikilu kimvumina yo wiki,+ eyayi i bundu+ ya nsi.
28 Kansi, o nkangu uzingilanga muna nsi akwa ngolo, e mbanza zina zazungwa e yaka zanene kikilu. Tumwene mo mpe Aneyanaki.+
29 O Aneyamaleke+ muna nsi ya Nengebe+ bezingilanga, Anekete, Aneyebuse+ ye Aneyamore+ muna zunga kia miongo bezingilanga, Anekenani+ vana ndambu a mbu+ bezingilanga ye muna nlambu a Yodani.”
30 O Kalebe otezele vuvika o nkangu ekolo bakedi batelama vana ndose a Mose, oku vo: “Yambula twatomboka owau, vua kikilu tuvua yo, kadi tulenda yo kweto kutumuna.”+
31 Kansi, o wantu ana batomboka yandi bavovele vo: “Ke twafwana ko mu tomboka yo nuana yo nkangu wauna, kadi batusundidi e ngolo.”+
32 Bakwamanene vana e nsangu zambi+ kwa Aneyisaele mu kuma kia nsi ina balanga, oku vo: “Muna nsi ina tuviokele kimana twalanga yo, i nsi ifwasanga awana bezingilanga mo, o wantu awonso ana tumwene mo wantu anene-nene.+
33 Tumwene mo Anefili, o wana Anaki,+ ana batuka muna Anefili, tuyimwenene nga makonko vana bena, oyau mpe batumwenene nga makonko.”
Mvovo vana yand'a lukaya
^ Yovo “tala.”
^ Yovo “Yeosua,” ina ye nsasa vo: “Yave i Luvuluzu.”
^ Yovo “fula dia Kamati.”
^ I sia vo, bundu kina nze ngavua yovo mfuluta.
^ Ina ye nsasa vo: “Kangi kia Uva.”
